Ciêr chênhr bax trâu jiês thik: Lào Cai uô jông hâux lưv sik côngv đros shux xênhz

          Têx hnuz no, cux xưk li ntâu tsêr cơưv cxênhx 3 txơưr nhoz tỉnh Lào Cai, 500 ntau lênhx shux xênhz ntơưv tsêr cơưv cxênhx 3 Nguyễn Huệ, phường Yên Bái li hâux lưv kriê cxaz cơưv nzir tsênhv tâu tsưr tsix uô jông. Sâuv têx lớp cơưv, cưk kriê tsi so kriê cxaz shux xênhz uô têx đề thi siv, kriê cxaz yênhx tưv tsênhv trâu shux xênhz lớp 12.

          Đhâu 2 jiês thik siv, tas nro chêx cuk tâu seiz shuôk jông chiê pheiz shux xênhz lơưr yênhx paz muôx pênhr xưv txux chi txơưr. Txix co, cưk kriê cxiv tsa tsưr ziv kriê cxaz cov huv đros, cê paz shux xênhz njuôs xav thik tsi tâu ntơưr thik tâu cxênhx 3, cê kriê cxaz yênhx tưv trâu shux xênhz cơưv hênhr chiê tâu xeir zuôr muk cơưv têx tsêr cơưv đại học lox. Cưk kriê Bùi Thị Thuý, Phưv Hiệu trưởng tsêr cơưv cxênhx 3 Nguyễn Huệ puz pâuz:“Tsêr cơưv tưz thiêz tsênhv sir jos kriê cxaz chiê shux xênhz truôx siêz hla trâu jiês thik lox. TSêr cơưv cux kriê têx yênhx tưv tsênhv, shâuv uô ntâu zav đề thik zos Bộ zaoz zux cxiv sâu. Pêz zuor tror tsưr tsix thik siv jiês 3 chiê shux xênhz chiv chir ntâuk grê zuk li têx hlôngr yiêz đhâu têx jiês cơưv nzir thiêz muôx cxaz tsưr ziv chiê cơưv cxaz cov thik tâu jông”.

          Sir jos cơưv cxaz cơưv nzir chiê bax jông trâu jiês thik, taz sik đros shux xênhz lớp 12 mak cux lok six cxơưx. Ntâu lênhx shux xênhz xeir tsưr ziv cơưv nzir jông đuô, tsov cưv tsoz phưz jông đas jos chiê bax trâu jiês thik. Shux xênhz Nguyễn Quốc Khánh, cơưv lớp 12D1 puz pâuz:“Cur chêx chôngk lok 2 vênhv thix tsênhv, tiv iz zos tuôr jông đas jos, chinhz yênhx chiê thâuv thik ntơưr uô tâu chêx cuk siêz tiv zix. Tiv oz zos sir jos cơưv ntơưr, uô têx jax thik hâur niêx hnuz chiê pâuz zuk uô zos lok sik tsi zos kror tưs cov kho đuô”.

          Yuôr ntơưv tsêr cơưv cxênhx 3 Trần Nhật Duật, nhoz xã Yên Bình, côngz xưv kriê cxaz cơưv nzir cux tâu sir jos krêz uô. Đhâu têx jiês thik siv, cưk kriê seiz shuôk yênhx lênhx shux xênhz muôx điểm kis chiê kriê cxaz. Txơưv cơ sở cxuô zav tsênhv phêv liv, taz sik tsêr cơưv cux truox siêz tuôr truôx hâux lưv shux xênhz thik tiêr cxênhx 3 tax 100% li têx shông tov ntêx. Cưk kriê Hoàng Thị Quỳnh Liên, Tuêv tsar tuêv KH tự nhiên pheiz kênh:“Tas nro têx cưk kriê puôr lênhx chêx chôngk, tsov cưv txos yênhx lênhx shux xênhz chiê kriê cxaz, paz shux xênhz cơưv tsi hênhr sir jos cơưv nzir chiê thik tâu ntơưr. Tsêr cơưv cux cxiv tsa têx cxeix laov huv đros yênhx lênhx shux xênhz chiê muôz trâu shux xênhz uô siv, tsov lơưr têx đề thi cxênhx 3 têz qơưk”.

          Zơuv Luyện Hữu Chung, Giáo đốc Sở zaoz zux tỉnh Lào cai puz pâuz, jiês thik cơưv tiêr cxênhx 3 shông 2026, tas nro tỉnh muôx 1 hội đôngx thik đros 58 qơư thik tso ntơưv 39 xã, phường. Njuôs xav zuor muôx 19 cxênhz 800 lênhx shux xênhz đăng cir thik, muôx nhos 850 qar thik đros muôx 4 cxênhz 500 lênhx cán bộ, cưk kriê, nhân viên cxaz chuôz phưx vưv jiês thik. Txos nhiv no tas nro côngz xưv chuyên môn, cơ sở cxuô zav thiêz tsưr ziv taz por trâu jiês thik tsênhv tâu krêz uo jông, muôx chêx cuk thiêz trơưk cui tênhv:“Đros jiês xeir zuôr shux xênhz cơưv cxênhx 3 shông 2026, Sở zaoz zux tưz heik trâu Ub tỉnh yênhx lix Ban chox kriê jiês thik; Sở cux tưz tsưr tsix kriê cxaz nghiệp vụ côngz xưv thik trâu têx taz viv tsêr cơưv; chox kriê têx tsêr cơưv chuôz tsar cơưv cxaz, kriê cxaz trâu shux xênhz. Txos nhiv no, côngz xưv bax trau jiês thik tâu krêz uô jông, taz por trơưk zoz qơưx”./.

                                                                                                                    Thừa Xuân-Txâur Vax cxênhk nhênhv