Paz trâu pêx xênhv thiêz doanh nghiệp đơưk kho têx phiv liv đhâu trâus ntux nas chuô ruôr hiêv

Zos iz hâur chor nênhs tsik so kir txêik nhiêx hâur Zênhx hangx Agribank chi nhánh huyện Văn Yên, Công ty TNHH Thương mại dịch vuv Hồng Hà Phát, nhoz tôv dân phôr 11, thị trấn Mậu A nhiv no kir txêik 8 tiv đeiv chiê uô nox, kinh doanh chor txiês ntông xuôk hmôngr ntông uô. Taz sik, jiês đêx ngaz hâur coz chuô tiv 3 nhiv kruôr đhâu tưz nhaz tas nro chor vax tsêr, têx chuôz zênhx, chuôz tav thiêz cuôr yôngz tas nro công ty têx hax huv, njuôk xav trâus hiêv tas muôx 500 tsov đêiv ntâu. Đros muôx cxuô cấp chinhr quyền li têx paz, công ty tưz sir jos đơưk kho têx trâus ntux nas, đêx ngaz cuôr ruôr hiêv, tror kriz uô nox trâu kaz hli 10 nhiv kruôr đhâu. Pos Nguyễn Thị Hồng, Giám đốc Công ty TNHH Thương mại dịch vuv Hồng Hà Phát puz pâuz: “Đhâu trâus đêx ngaz cuôr mak pêz tưz tror kho đuô tâu xar muôx 90% têx trâus ruôr hiêv. Pêz uô tsâus ntâu txos zênhx hangx têx tsênhv chêi tưz paz ndar six hơưv trâu pêz, txo grêk têx nhiêx liv chiê pêz đơưk kho tâu têx trâus ruôr hiêv”.

Jiês đêx ngaz cuôr hâur hli 9 nhiv kruôr đhâu cux uô trâu ziv chuôz zis uô kinh doanh Thảo Hợi, nhoz khu phố sôr 1, thị trấn Mậu A, huyện Văn Yên trâus ruôr hiêv ntâu lok cxuô zav, njuôk xav nhiêx txiêx tas muôx 400 tsov đêiv. Zơưv Trần Văn Thảo, tsưr chuôz zis kinh doanh puz pâuz, đhâu trâus đêx ngaz cuôr, tsuv tsik huôx tôngv muôx 1 hlik ntâu chiê kho đuô thiêz nhiv kruôr tror huôx tôngv xưz, chênhr viv li chor nhiêx liv thiêz nhiêx kir txêik hâur zênhx hangx muôx 5 tiv đêiv uô trâu chuôz zis lok six cxơưx. Zênhx hangx txo grêk tsơưs nhiêx liv 0,5% trâu chor nhiêx chuôz zis tsênhv kir txêik tưz paz phênhv tưs trâu chuôz zis sir jos kho đuô têx trâus ntux nas, đêx ngaz cuôr uô ruôr hiêv txos: “Cur tsik tâu pov muôx jiês đêx ngaz cuôr tưs lox li no, taz sik đhâu trâus đêx ngaz cuôr mak thiêx pov tâu chor ban, nganhx li têx sir jos paz; chor zênhx hangx cux tuôx sêiz nus, phêiz kênh, thiêz paz mak txos nhiv no tưz truôx tuk jux juk lơưv. Zênhx hangx cux txo grêk nhiêx liv, tsik tâu sâu chor nhiêx kir txêik chiê chuôz zis tror sir jos uô nox”.

Zơưv Nguyễn Văn Chí, Giám đốc Zênhx hangx Agribank chi nhánh huyện Văn Yên puz pâuz, coz chuô sôr 3 tưz uô yênhx cxênhz lênhx nênhs kir txêik nhiêx hâur zênhx hangx Agribank chi nhánh huyện Văn Yên njiz trâus phiv liv, têx vax tsêr, chuôz tav trâus ruôr hiêv. Hâur co, muôx 13 nênhs kir txêik nhiêx trâus ruôr hiêv hnhar lok cxuô zav muôx tâu txix chor pênhr nhiêx kir txêik, đros nhiêx kir txêik yuôr ndê txos muôx 110 tiv đêiv ntâu: “Trơưk yênhx lênhx nênhs kir txêik nhiêx li têx trâus ruôr hiêv mak pêz tưz paz txo grêk nhiêx liv kir txêik, paz trâu chor nênhs kir txêik nhiêx tror sir jos uô tâu nox, kinh doanh”.

Đhâu coz chuô sôr 3, ntơưv huyện Trấn Yên cux muôx yênhx cxênhz lênhx nênhs kir txêik nhiêx hâur zênhx hangx trâus ruôr hiêv ntâu. Đros zos qơư paz trâu kôngz nuv, pêx xênhv, hâur thiêz đhâu trâus đêx ngaz cuôr, chor zênhx hangx tưz tsik so nus txos chor nênhs kir txêik nhiêx, nriêr pâuz, qênhz shuôk têx trâus ruôr hiêv chiê hêik pâuz, kriz uô têx tsưr ziv paz. Zơưv Bùi Đức Duy, Chuôz zis kir txêik nhiêx nhoz jok Tân Long, xar Báo Đáp, huyện Trấn Yên puz pâuz: “Coz chuô sôr 3 uô ruôr hiêv tas lok six ntâu, zênhx hangx cux tuôx sêiz nus, paz txo grêk chor nhiêx liv kir txêik trâu pêz chiê pêz huôv tsar tâu uô nox, pêz uô tsâus ntâu hênhr. Zuôr txos no pêz cux zuôr muk kir txêik tâu nzir hâur zênhx hangx chiê huôv tsar uô kinh têr”.

Lơưr Zênhx hangx Têz qơưk chi nhánh tỉnh Yên Bái li thôngz sâu, coz chuô sôr 3 tưz uô ruôr hiêv txos muôx 8.600 ntâu lênhx nênhs kir txêik nhiêx hâur chor zênhx hangx sâuv thax tsav đros tas nro chor nhiêx kir txêik trâus ruôr hiêv zuôr xar 11 cxênhz tiv đêiv. Zơưv Hoàng Ngọc Giang, Giám đốc Zênhx hangx Tsênhv chêi xar hôiv chi nhánh huyện Văn Yên puz pâuz: “Pêz sik côngv đros cấp ủy, chinhr quyền thax tsav chor xar, thị trấn chiê nriêr pâuz lok têx trâus hiêv txix chor pênhr nhiêx, tiv oz zos chor chuôz zis tsik tâu kir txêik pênhr nhiêx taz sik cux trâus ruôr hiêv lok cxuô zav. Pêz qênhz shuôk chor chuôz zis xar kir txêik nhiêx chiê đơưk kho đhâu trâus đêx ngaz cuôr ruôr hiêv tsik li mak zuôr muôz trâu kir txêik nhiêx chiê lơưr nzor đơưk kho tâu uô nox kinh doanh”.

Txos nhiv no, tưz muôx zuôr xar 1.900 lênhx pêx xênhv, doanh nghiệp sâuv thax tsav tỉnh Yên Bái tâu kho đuô six hơưv thêv têx nhiêx kir txêik, txo grêk têx nhiêx liv kir txêik cov huv đros, ndar six hơưv, txix co paz muôx nzir qơư khov, qơư njênhs chiê hla đhâu têx phiv liv, nzor đơưk kho tâu têx trâus ntux nas chuô, đêx ngaz cuôr ruôr hiêv txos./.

Đinh Tuấn-Lik Thox cxêik nhênhv

Sir jos hla đhâu cêr pluôs nhoz thax tsav ntus đriv Bát Đại Sơn

Muk txos xã ntus đriv Bát Đại Sơn, huyện Quản Bạ, tỉnh Hà Giang hâur iz hnuz yar ntux đris, tâu zơưv Vũ Ngọc Toản, Bí thư Đoanx hluôk nênhs xã tơư kriê pêz muk seiz shuôs têx trâur nuv huôv tsar kinh tế hâur thax tsav qơư. Thâuv muk trâu jok Mố Lùng, tix lâus Toản heik kriê xã têx muôx jông chiê huôv tsar uô nox, lar heik zos kriê chor hluôk nênhs uô ntêx nyuôs hâur cxuô luôs hâux lưv, sir jos khưr huôv tsar uô nox uô hnar. Hâur co muôx Lênhx Xênhv Cưr, zos iz hâur têx lênhx hluôk nênhs sir jos hla đhâu phiv liv chiê huôv tsar kinh tế.

Xênhz thiêz hloz lox hâur chuôz zis txov nhêv, đhâu thâuv cxiv tsa chuôz zis thiêz pheiz chuôz Lênhx 2 niêv txir gơưk muk nhoz gơưk, muôx 2 tus nhuôv mak Lênhx Xênhv Cưr 2 niêv txir luz nênhx ziv txov nhêv đuô. Shông 2017, Lênhx muk uô jos trâu iz luz Công ty nhoz tỉnh Hải Dương, tiv muôx moz Covid-19 huôv xênhz, têx hâux lưv uô iz hnuz tsơưs jux juk, tsi truôx tuk, Lênhx tưz quyết tinhv tror lok tsêr huôv tsar uô nox. Seiz pov chuôz zis têx liêx têz lok six ntâu, Lênhx tưz xar tsưr ziv huôv tsar bluô nux sâuv chênhr zuk li qơư nhoz. Đros trâu siêz truôx, car xar car uô, Lênhx tưz muôz chor liêx têz uô poz cưk hlôngr chos têx tsoz chos nox txir chiê sâu đê txir muôs, muôx grik kinh tế đuô.

Nhiv no, chor liêx têz thâuv ntêx uô poz cưk ntơư tưz yênhx iz têx vax tsoz chos nox txir jông njuôz xiêz, txi txir ndư li: Txir thênhx caz, txir quýt, txir lưk pax, mo môngk, txir pur lux têz...., iz zav muôx txix 100 txos zuôr xar iz cxênhz tsoz. Txix cêr sir jos khưr, moz siêz tu jông têx tsoz chos nox txir trơưk tsưr ziv kriê, viv li tix lâus Lênhx chuôz zis têx tsoz chos nox txir huôv tsar jông, tsơưs trâus caz hmoz tho nox uô ruôr hiêv, sâu đê tâu nju. Xuz thơưx, iz shông, têx txir ntông tưz gra lok phênhv sâu tâu trâu tix lâus chuôz zis muôx 40-60 tsov đeiv.

Sơưr nhoz hâur xuz têx ntông txir mo môngk txi txir ndư kâuz niêz, tix lâus Lênhx heik: “Cur tưz muôx jiês muk ndis seiz hluôk nênhs ntâu trâur nuv huôv tsar uô nox, uô kinh tế txix kôngz nuv thiêz seiz pov chos têx tsoz chos nox txir zos jông đuô thiêz muôx liv đuô hur si. Đhâu thâuv ndis seiz têx tsưr ziv huôv tsar uô nox nhiêk txơưr nhiêk tsi siz thôngx nhoz ntâu thax tsav qơư txơưr đuô, cur tưz qir yưv pênhr thiêz huôv tsar uô trơưk zuk siêz xar. Đhâu 4 shông, têx luôs hâux lưv ntơư tưz uô tâu trơưk tsưr ziv, kinh tế ziv chuôz zis iz hnuz huôv tsar jux juk, luz nênhx tsâu sor, vav mênhx đuô”.

Thav lok tix lâus Lênhx Xênhv Cưr tsưr ziv huôv tsar uô nox heik sâuv, tix lâus Cuôv Xênhv Thox, Phưv Chủ tịch Ủy ban xã Bát Đại Sơn heik pâuz: “Co zos trâur nuv uô tâu lok six jông. Lênhx zos iz tus car xar car uô, sir jos cơưv shâuv luôs lưv tus cêr huôv tsar uô nox, muôx tsưr ziv jông thiêz thâuv tưs tưz moz siêz zok nriêr têx tsưr ziv yiêz huôv tsar uô nox uô hnar chiê uô trơưk hâur luz nênhx tsênhv tsênhz. Lênhx tsưr ziv muôz têx liêx têz hlôngr chos lưv zav tsoz chos, muôs tâu gri đuô zos iz kro jông, zos hluôk nênhs uô ntêx nyuôs sir jos hla đhâu phiv liv chiê huôv tsar uô nox uô hâuk coz hâur thax tsav qơư; Iz chas ntơư, zos qơư jông chiê tsôngv pêx xênhv sơưr đơưk cơưv shâuv, uô trơưk thiêz sik kriê tsưr ziv uô nox”.

Txix ziv chuôz zis pluôs, khov sir jos khưr huôv tsar uô nox thiêz pâuz cxênhx txuôs nhiêx txiêx, txos nhiv no, tix lâus Lênhx chuôz zis tưz hla đhâu chuôz zis pluôs, cxiv uô tâu vax tsêr jông, khor truôx thiêz txoz cxơưx trâu têx tuz nhuôs muk cơưv txux chi txos qơư. Xav tinhv huôv tsar uô nox huv đros, nhiv no tix lâus Lênhx Xênhv Cưr tưz yênhx iz hâur têx chuôz zis hluôk nênhs bluô nux hâur thax tsav qơư, muôx luz nênhx truôx tuk, tsâu sor, co chênhr zos têx Lênhx Xênhv Cưr sir jos khưr hâur yênhx hnuz, niêx shông chiê muôx tâu li nhiv no.

Phênhv “Nôngx mênhx zuôr tsuv pâuz” hnuz no tsuôk muôx li no xưz. Phênhv no zos Cơ quan Đeix nta suôz Việt Nam nhoz thax tsav faz Bắc đros Tsênhv qơư cxiz kôngz têz qơưk uô./.

Vừ Chu VOVTB-Riê Lâux cxeik, nhênhv