Tsôngv box tox siêz Mù Cang Chải chos siv dâu tây tso lok chêx cuk siêz

Têx hnuz no, chuôz zis tix lâuk Lý A Vàng nhoz tuêv 3, thị trấn Mù Cang Chải (Yên Bái) li vax txir dâu tây chos muôx nhos 1 cxênhz tsoz lok six chôngz lênhx nênhs tuôx ndis seiz, đê thiêz zuôr txir dâu tây. Tiv zix zos têx hnuz kaz ciêz, kruô tuôx đê txir thiêz zuôr dâu tây lok six chôngz, muôx têx thâuv tsi muôx chiê muôs.

          Tix lâuk Vàng puz pâuz, nhiv kruôr zos chiv xuz thơưx taz sik cux lok six jông siêz, đhâu 4 luz hlik tsoz phưz, têx tsoz txir dâu tây tưz txi lok six ntâu. Đros grê muôs chungz fênhx txix 100 cxênhz txos 120 cxênhz đeiv iz cir, tix lâuk chuôz zis tưz sâu liv tâu yênhx châuv tsov đeiv: “Cur pov Mù Cang Chải qiv hơưv ar têz lok six huv chiê chos dâu tây, tsoz chos no tso lok phênhv sâu siêz đuô têx tsoz chos txơưr. Shông zuôr txos cur zuôr chos cxaz ntâu đuô chiê phưx vưv pox nhuôk”.

          Tix lâuk Zax A Sở chuôz zis nhoz jos Háng Gàng, xã Lao Chải, huyện Mù Cang Chải cux muk cơưv shâuv ntâu qơư thiêz nhênhz chơưv lok six jông lok qiv hơưv, ar têz nhoz zuk têz qơưk uô ntêx thâuv chox dâu tây lok chos. Kaz shông tov ntêx, tix lâuk zuôr 3 cxênhz 200 tsoz txir dâu tây txix Sơn La lok chos sâuv 3 cxênhz yiv ndis. Txos nhiv no, mênhv chêx dâu tây tưz tsoz lok phênhv sâu, nhiv kruôr hâur 2-3 xuz thơưx hâur chiv cheix, chuôz zis tưz sâu tâu zuôr xar 20 tsov đeiv.

          Lơưr tix lâuk Sở, đros mênhv chêx ar, tsoz dâu tây tso lok phênhv sâu siêz đuô 2-3 jiês pir đros chos blêx, poz cưk, tsoz phưz mak tsi khưr đuô hor ntâu. Viv li hâur ntu zuôr txos, chuôz zis zuôr tror hlôngr têx mênhv chêx chos blêx, uô vax chos dâu tây chiê huôv tsar kinh têr chuôz zis.

Tix lâuk Zax A Sở nhoz jos Háng Gàng, xã Lao Chải, huyện Mù Cang Chải heik: “Cur xav zos chos blêx sâuv mênhv chêx no mak sâu tâu 20 sênhr blêx, muôs trâu niêv ciêz mak tâu 10 tsov đeiv taz sik zos chos dâu tây mak txos thâuv muôs tas chiv txir dâu tây zuôr sâu tâu 35-40 tsov đeiv. Cur zuôr cơưv shâuv cxaz tsưr ziv chos thiêz chuôz cxaz mênhv chêx chos dâu tây hâur ntu zuôr txos”.

          Tsi taz muôx phênhv sâu txix hâux lưv txir, tsôngv box Hmôngz nhoz Mù Cang Chải li vax dâu tây tsênhv zaz zâuv tsôngv kruô tuôx ndis seiz, njuôs xav zuôr yênhx qơư ju lix jông tov kaz no. Niêv lâuk Phùng Mùi Lai, nhoz thị trấn Mù Cang Chải, huyện Mù Cang Chải puz pâuz, niêv lâuk cux li ntâu tsôngv kruô txơưr lok six shir phaz thâuv pov tsôngv box Hmôngz nhoz no li têx vax dâu tây nhoz no: “Seiz tsênhv tsênhz nhoz no mak lơưr tsoz phưz lok six taz por. Dâu tây cur cux zuôr ntơưv têx qơư txơưr lơưv taz sik muk txos ciês ntơưv vax đê nox thiêx li pov kaz”.

          Chiê dâu tây huôv tsar jông, têx ziv chuôz zis chos dâu tây nhoz Mù Cang Chải tưz chos shơư têx tsoz chos txơưr li đos, kêx...Hâux lưv no tsi taz paz muôx cxaz phênhv sâu sâuv iz qơư tsêz chos, mak tsênhv paz lơưr têx caz thiêz phax tar iz cxiê zav moz tiv caz hmoz uô huôv xênhz; tsôngv box cux tsi zuôr zôngv cxaz têx yuôx por vêv đrox tsuôs uô hiêv txos đas jos.

          Hâur ntu zuôr txos, chiê trâur nuv chos dâu tây phuôx huiz chêx cuk jông đuô, pox nhuôk nôngx mênhx nhoz huyện tox siêz no cux xar njôngr chính quyênx thiêz nganhx muôx txơưx jênhv muôx cxaz têx paz txưv lok pênhr nhiêx, kỹ thuật...đhâu co, paz tsôngv pox nhuôk muôz siêz phênhv sâu, cxuôv yeiz thiv pluôk truôx tul./.

Đinh Tuấn-Txâur Vax cxeik nhênhv

Lai Châu sir jos hla trâu mênhx cxưx ntu hlôngr yiêz thiêz huôv tsar

Zos thax tsav zov chênhr hâur por vêv tsưr qênhx ntus đriv têz qơưk, ngaz tuk mênhx cxưx nhoz tox siêz, ngaz tuk đêx trâu huôv tsar truôx thax tsav tiêx đras Bắc Bộ; zos qơư muôx ntâu têx chiv xênhz, đrox tsuôs jông jav đros têx jôngr ntông, kôngz nuv, khoangr yax, năng lượng… Lai Châu tưz tâu Đảng, Têz qơưk ntâuk gri, xav jênhv zos thax tsav zov chênhr hâur huôv tsar kinh têr-xar hôiv thiêz uô jông côx phax ngaz tuk, ngaz tuk ntus đriv têz qơưk. Jiês cơưv tiv 4, Côx hôiv khóa 11 tưz thôngz đhâu Nghị quyết sôr 22/2003 lok hâux lưv phêiz thiêz kho đuô thax tsav hành chính iz cxiê tỉnh; lơưr co tỉnh Lai Châu tưz tâu phêiz yênhx tỉnh Lai Châu (yiêz) thiêz tỉnh Điện Biên.

Đhâu 20 shông phêiz, yênhx lix tỉnh tưz khav tênhv tâu Đảng thiêz Têz qơưk li tsưr ziv uô huv đros, paz muôx tâu ntâu kror jông chiê Lai Châu đros tas nro têz qơưk hla trâu mênhx cxưx ntu hlôngr yiêz thiêz huôv tsar. Đros muôx 265 cêik cêr ntus đriv, Lai Châu zos thax tsav zov chênhr hâur côngz xưv por vêv ntus đriv têz qơưk, no zos jênhv vưv chinhr triv sơưr thơưx chiê por vêv truôx tuk tsưr qênhx, ntus đriv têz qơưk.

Chiê bax hla trâu mênhx cxưx ntu hlôngr yiêz thiêz huôv tsar, Lai Châu li jênhv vưv chinhr triv sơưr thơưx, uô ntêx hlo zos uô cov tâu jông cxiv luôs Chinhr triv li tsưr ziv kho đuô, ntov jông tsưr tsix bôv mêir; tso tsês cấp huyện, chiê iz cxiê taz viv cấp xar lok uô cê; uô lơưr tsưr ziv thax tsav qơư 2 cấp cov ntov jông, uô tâu truôx jông têx hâux lưv đuô.

Kriz uô tâu jông cxiv luôs chinhr triv li tsưr ziv kho đuô, ntov jông tsưr tsix bôv mêir zos kror zov chênhr chiê txo grêk tsơưs têx phiv liv, siz yôngx hâur chox kriê, uô tsênhz mênhx tâu Đang,Têz qơưk têx chủ trương, cêr chêi; kho đuô taz viv hành chính cấp xar zuôr paz uô tâu jông đuô têx hâux lưv, chox kriê txix tỉnh txos thax tsav qơư. Kho đuô cxiv luôs chinhr triv li tsưr tsix bôv mêir zos Đảng thiêz Têz qơưk li tsưr ziv uô huv zos zuôr paz muôx tâu iz kror yiêz trâu huôv tsar têz qơưk hêik cxuô cux li ntơưv Lai Châu.

Đros muôx Đảng thiêz Têz qơưk li têx paz, Lai Châu tsênhv đros chor bôv, nganhx cik txos kriz uô tâu jông Trung ương chor pênhr yưv uô li dưv anr ntu cêr txuôk Lai Châu trâu txox cêr muk chênhr Nội Bài-Lào Cai, dưv anr cêr kror ar muk đhâu trôngz Hoàng Liên txuôk thị xar Sa Pa (tỉnh Lào Cai) đros huyện Tam Đường (tỉnh Lai Châu)… zuôr paz trâu Lai Châu txuôk đros tâu jông đuô trâu têx tỉnh hâur thax tsav thiêz tas nro têz qơưk chiê tror huiz tôngv têx pênhr jos, kror liv trâu huôv tsar paz uô tâu jông đuô Bôv Chinhr triv li Nghị quyết 11-NQ/TW, hnuz 10/2/2022 lok tsưr ziv huôv tsar kinh têr-xar hôiv, uô tâu jông côx phax ngaz tuk, ngaz tuk thax tsav trung du thiêz tox siêz Bắc Bộ txos shông 2030, tsưr ziv uô txos shông 2045.

Lai Châu nhiv no tsik so pâuz tsênhz txos kror hâux lưv lox tâu Đảng, Têz qơưk choz zok hâur hâux lưv tuôr truôx jông tsưr qênhx ntus đriv têz qơưk nhoz faz Tây Bắc têz qơưk; hâux lưv cxiv tsa sik côngv siêz cxuô mênhx cxưx, truôx tuk chinhr triv nhoz thax tsav tox siêz, paz cov huôv tsar siz bâus, cxix cxuô, cxuô nro nhoz cxuô mênhx cxưx, gôngr côngv trâu truôx tuk, huôv tsar cxuô hâur têz qơưk. Đảng bôv, Chinhr quyền, Pêx xênhv cxuô mênhx cxưx Lai Châu tsik so phuôx huiz chax chês sik côngv siêz, nhiêv têz qơưk, hlôngr yiêz xar tơưv, huiz tôngv cxuô pênhr jos trâu huôv tsar, sir jos cxiv tsa tỉnh Lai Châu huôv tsar cov jông jav, truôx đrênhk, sir jos đros tas nro têz qơưk hla trâu mênhx cxưx li ntu hlôngr yiêz thiêz huôv tsar./.

CTV Lê Đức Dục-Lik Thox cxêik nhênhv