Hlôngr bê trâu tôv dân phố ntơưv Lào Cai cov zôngx ziv pâuz, ndo tâu

Phường Yên Bái tâu yênhx lix txix chiê 5 phường nhoz thành phố Yên Bái kuz zos: Hồng Hà, Nguyễn Thái Học, Yên Ninh, Minh Tân, Đồng Tâm lok uô cê. Ntơưv chor phường no, thâuv ntêx tsik so sir zôngv sôr chiê tik bê trâu chor tôv dân phố, viv li đhâu chiê lok uô cê, muôx siz yôngx ntâu. Lơưr co, tôv dân phố sôr 5 nhoz phường Nguyễn Thái Học (kuz) zuôr yôngx trâu tôv dân phố sôr 5 nhoz phường Minh Tân (kuz); tôv dân phố sôr 2 phường Yên Ninh (kuz) zuôr yôngx trâu Tôv dân phố sôr 2 nhoz phường Đồng Tâm (kuz)…

Xav jênhv kror no zuôr uô phiv liv trâu pêx xênhv, tiv zix zos nriêr pâuz têx qơưk, zuôr muôs hax huv, phường Yên Bái tưz chox kriê chor tôv dân phố sêi đrơưv cơưv zuôr pêx xênhv ziv chênhv lok tik bê, hlôngr bê chor tôv dân phố đhâu chiê lok uô cê. Tix lâus Nguyễn Mạnh Hùng, Tôv zuôr pêx xênhv nhoz phường Minh Tân kuz têx ziv chênhv puz pâuz:

“Pêz yax mông txos trâu pêx xênhv thôngz đhâu tôv dân phố zalo, lơưr chor ntơưr tâu phường Yên Bái muôz trâu chor tôv dân phố chiê pêz zuôr pêx xênhv têx ziv chênhv. Pêx xênhv lok six shir phaz viv thâuv muôx luz bê Minh Tân tror tâu tik hu mak lơưr pov lok six huv đros, cê huv zos lơưr cxôngx nzor cê hlôngr yiêz jông”.

Lơưr phường Yên Bái li tsưr ziv hlôngr bê mak bê hu chor tôv dân phố yiêz tâu tik trơưk bê hu chor phường thâuv ntêx chiê lok uô cê đros muô chor sôr tâu tso đros. Iz zav li: Tôv dân phố 9, phường Minh tân kuz hlôngr yênhx tôv dân phố Minh Tân 9; tôv dân phố 12 phường Yên Ninh kuz hlôngr yênhx tôv dân phố Yên Ninh 12… Kror no puôr lênhx huv đros lơưr pêx xênhv sâuv thax tsav li siêz xar viv muôx bê huv tsênhz mênhx, zôngx ziv sêiz car, tuôr tsês tâu cxuô kror nhoz chor phường kuz, paz trâu pêx xênhv thiêz tsôngv kruô zôngx ziv nriêr pâuz tâu têx thax tsav qơư hâur phường Yên Bái yiêz lok six lox đar no. Zơưv Trường Văn Lương, tôv dân phố Đồng Tâm 9 phêiz kênhz:

“Thâuv ntêx no zos tôv 9 phường Đồng Tâm nhiv no tâu hlôngr yênhx Đồng Tâm 9 mak lơưr cur lok six jông, zuôr phênhz tâu tsênhz nhoz yênhx thax tsav”.

Zơưv Phùng Tiến Thanh, Chủ tịch Ủy ban phường Yên Bái puz pâuz, chiê paz muôx tâu thôngx ziv hâur pêx xênhv, phường Yên Bái tưz kriz uô zuôr cử tri li ziv chênhv trơưk têx thênhv tsênhv tsênhz, txix co, chor tôv dân phố hâur phường đhâu kho đuô muôx cxiv luôs bê hu huv đros thiêz zôngx ziv sêiz car, paz trâu pêx xênhv zôngx ziv nriêr pâuz:

“Hlôngr bê tôv dân phố mak pêz tưz choz trâu Phòng Vênhx huôv, Xar hôiv tso tơưv tsưr ziv, đhâu co Thường trực Đảng ủy, Ban Thường vuv muôx ziv chênhv thiêz Ban Chấp hành Đảng bôv thôngz đhâu. Đhâu co lơưr tsưr ziv mak xa txos trâu chor tôv dân phố chiê zuôr pêx xênhv ziv chênhv. Tưz muôx 17.649 ziv chuôz zis tâu cơưv, tâu hêik pâuz txos hâux lưv hlôngr đuô bê tôv dân phố, xưk li tas nro sơưr đơưk puôr lênhx thôngx ziv đros, tax tâu muôx 99% ntâu”.

Tưz tsik zos ntơưv phường Yên Bái mak ntâu xar, phường nhoz tỉnh Lào Cai yiêz cux kriz uô hlôngr đuô bê trâu chor jêx jok, tôv dân phố cov tsik siz yôngx, zôngx ziv nriêr pâuz, txix co tưz tsik zos paz zôngx ziv trâu côngz xưv sêiz car hành chính ntơưv thax tsav qơư đhâu kho đuô mak tsênhv tâu pêx xênhv thôngx ziv đros thiêz ntâuk gri siêz./.

Đinh Tuấn-Lik Thox cxêik nhênhv

Txox cêr muk chênhr Hòa Bình-Mộc Châu (Sơn La) cxơưz paz đas jos huôv tsar thax tsav faz Bắc

Dưv anr yưv pênhr cxiv tsa txox cêr muk chênhr Hòa Bình-Mộc Châu, ntu đhâu thax tsav tỉnh Sơn La nhoz txox cêr ar muk chênhr CT3 txix Hà Nội trâu chor tỉnh Hòa Bình, Sơn La thiêz Điện Biên. Txox cêr co ntêr 32 cêik ntâu, qir txix cêik cêr 53+00 hâur thax tsav xã Chiềng Yên, huyện Vân Hồ, tỉnh Sơn La kuz, nhiv no zos xã Vân Hồ, tỉnh Sơn La (txuôk đros thiêz Dưv anr cêr ar muk chênhr Hòa Bình-Mộc Châu ntu đhâu thax tsav tỉnh Hòa Bình kuz, nhiv no zos tỉnh Phú Thọ) muk xâuk trâu cêik cêr 85+262, yuôv txox cêr lox 43 (ntu muk đhâu phường Vân Sơn, thị xã Mộc Châu kuz). Zơưv Hoàng Quốc Khánh, Bí thư Tỉnh ủy Sơn La heik pâuz:

“Cur njênhs tiêk thâuv muôx cêr muk chênhr mak cxuô zav zuôr txơưr lok six ntâu, muk Hà Nội zuôr zôngx ziv đuô; yêz muk lok zôngx ziv zuôr paz cxơưz kinh tế xã hội huôv tsa, iz zav li cxơưz cxiz huôv tsar hax huv, muôz jông qơư, jông six hơưv trâu tỉnh Sơn La huôv tsar. Lar heik, cur njênhs tiêk thâuv muôx cêr muk chênhr mak tỉnh Sơn La tênhx qơư hu zâuv yưv pênhr uô cux zuôr truôx jông đuô thiêz zuôr hu zâuv tâu ntâu lênhx nênhs yưv pênhr tuôx trâu Sơn La; đhâu co, muôz hâux lưv uô trâu nênhs lox tôngv thiêz paz muôx nzir nhiêx txiêx trâu tỉnh ntâu đuô”.

Dưv anr yưv pênhr cxiv uô cêr muk chênhr Hòa Bình-Mộc Châu, ntu đhâu thax tsav tỉnh Sơn La tâu pheiz yênhx 3 dưv anr, đros thiêz 03 tsưr yưv pênhr uô têx ntu: Txix cêik cêr 53 txos cêik cêr 63+500; Txix cêik cêr 63+500 txos cêik cêr 74+500 thiêz txix cêik cêr 74+500 txos cêik cêr 85+262. Hâur ntu xuz thơưx zos yưv pênhr uô plas cêr đar muôx 12 thiêr; ntu uô tiêr mak zuôr đar muôx 22 thiêr. Njuôk xav txox cêr co muôx 04 qơư cêr siz yuôv, ntơưv têx ntu siz yuôv đros lưv txox cêr muk lol hâur thax tsav mak zuôr cxiv uô qox lok sik cêr hla đhâu taz por truôx tuk, muk lol tâu zôngx ziv.

Chiê phưx vưv trâu luôs hâux lưv krêz côngz uô dưv anr, 2 thax tsav hâur tỉnh Sơn La muôx cêr muk chênhr đhâu zos Vân Hồ thiêz Mộc Châu kuz txos nhiv no tưz uô tiêr luôs hâux lưv zuôr ar uô cêr; qir krêz côngz cxiv tsa têx qơư yêik txar tsôngv box nhoz chiê zuôr qơư uô cêr; iz chas ntơư, tưz njuôk hov chor qơư trâu têx chuôz zênhx uz no cxiv uô cêr thiêz qơư nquôr têx vuôz tsuôz, kiêk nênhs phưx vưv uô dưv anr.....

Zơưv Mai Văn Chính, Ủy viên T.Ư Đảng, Phưv Thủ tướng Chính phủ khav tinhv, xav huôv tsar côngz trênhx zoz thôngz, lar heik zos cêr muk lol sâuv ar zos iz hâur têx hâux lưv zov chênhr. Dưv anr cêr muk chênhr Hòa Bình-Mộc Châu zos iz kro jông trâu Đảng, têz qơưk sir jos yưv pênhr cxiv uô têx côngz trênhx, tiv zix zos têx thax tsav tsênhv yuôr ntâu txov nhêv li Tây Bắc, cxơưz paz đas jos trâu Tây Bắc huôv tsar.

“Đros thiêz dưv anr têx jông, muôx liv, cur heik cxuô bộ, ngênhx T.Ư tsuv tsi so moz siêz fuô kriê, chox kriê uô dưv anr, zênhx max đơưk têx phiv liv lok ntâuz ntơưr, qơư uô cêr, têx hâux lưv uz no cik txos trơưk cui tinhv. Đros thiêz tỉnh Sơn La, tsuv sir jos chox car, kriê fuô uô dưv anr taz por uô tiêr tâu jông têx luôs hâux lưv trơưk tsưr ziv tso tơưv. Hok lok sâuv lênhx nênhs cxiv tsa thiêz nênhs piêr kriê uô dưv anr mak tsuv sir jos lês uô jông têx hâux lưv zok muôz trơưk cui tinhv, trơưk siêz xar; heik tas nro sơưr đơưk sik đros sir jos uô cov tiêr dưv anr tâu nzor đuô pir li tsưr ziv tso tơưv”.

Njuôk xav, dưv anr uô txox cêr muk chênhr Hòa Bình-Mộc Châu, ntu đhâu thax tsav tỉnh Sơn La zuôr tâu cxiv uô hâur 3 shông, txix shông 2025 txos shông 2028; xav hur si pênhr yưv uô côngz trênhx tas 4.445 tyv đeiv, zos T.Ư thiêz tỉnh Sơn La nhiêx txiêx yưx uô./.

Thu Thùy-Riê Lâux cxeik, nhênhv