Sik côngv tês viv luz nênhx truôx tul nhoz sâuv niêv pas đêx Thác Bà, tỉnh Lào Cai

Tsưr ziv huôv tsar uô nox sâuv niêv pas đêx Thác Bà, hnuz tưs, zơưv Đặng Văn Lập nhoz xã Yên Bình, tỉnh Lào Cai cux muk cxov njêk, thâux jâuz, krâur trâu njêk nox hâur qơư thêir zus hâur đêx. Viv pâuz tsênhz thax tsav qơư, zơưv Đặng Văn Lập cux li ntâu lênhx nênhs txơưr muôx cêr cor cav muk fuôx gox tsi hnar yo phao, tiv zix zos thâuv muk jê ntus đêx lok sik thâuv đêx tsi ntưs lox. Taz sik, đhâu txuz txiêz nanv zov chênhr uô ntâu lênhx nênhs trâus tuôs, đros lưx lươngv muôx txơưx jênhv yax six muk qênhz yuôx, heik kriê, zơưv Đặng Văn Lập tưz hlôngr yiêz siêz xar, chiv chir tsưv ziv đuô thâuv muk fuôx gox: “Thâuv ntêx cur cux tsi tsov cưv, heik cxuô mak zos tsi pâuz nyei. Fênhx yax muk fuôx gox lox thiêx li hnar yo phao, yuôr têx fuôx gox mê mak phênhv ntâu tsi muôx yo. Taz sik jiês no, ciês thâuv muk fuôx gox mak cur tưz hnar yo phao thiêz cux tsưv ziv đuô thâuv muk lok sâuv đêx”.

          Niêv pas Thác Bà đar 19 cxênhz hecta ntâu, ntêr 60 cei cêr, đar muôx nhos 30 cei cêr, đros thiêz muôx 1 cxênhz 300 kê ar lox zâu. No zos yênhx cxênhz ziv chuôz zis nhoz huyện Yên Bình thiêz Lục Yên kuz li qơư huôv tsar uô nox. Nhiv no niêv pas muôx 70 ntâu luz yêz gox đêx đăng cir, đăng kiểm muôx fuôx gox ju lix, fuôx gox thâux kruô, thâux hax huv, đrâuv co tsênhv muôx 1 cxênhz ntâu yêz fuôx gox zos tsôngv px li zôngv phưx vưv tsiv uô thiêz muk lok sâuv đêx. Đros 2 qơư tsav fuôx gox tsênhv muôx muôx nhos 20 qar tsav fuôx gox chiv chir lox zâu.

          Sâu jênhv txix tsênhv tsênhz sâuv niêv pas, ntâu tsưr fuôx gox thiêz lênhx nênhs tsar fuôx gox tưz muôx têx hlôngr yiêz jông hâur uô têx cui tênhv lok taz por zaoz thôngz cêr đêx. Tix lâuk Đỗ Ngọc Hà, tsar fuôx gox thâux kruô YB 0677 puz pâuz heik tsôngv kruô hnar yo phao cxix cxuô thiêz tsi thâux chôngz lênhx nênhs tsi trơưk cui tênhv. Zos kruô tsi uô trơưk cui tênhv mak zuôr tsi phưx vưv viv chiê taz por zaoz thôngz muk lok sâuv đêx: “Tsênhz mênhx, côngz xưv yax mông thiêz seiz car tưz tâu têx chiz coaz muôx txơưx jênhv uô ntâu. Taz sik, kror coaz tsôngv zos cxuô lênhx nênhs li siêz xar uô jông hâux lưv por vêv trâu zuk. Đros huôx tôngv kinh doanh thâux kruô, pêz ziv muôz siêz txơưx jênhv taz por đuô. Pir li, thâuv yêz muk lok tsuv heik tsôngv kruô hnar yo phao cxix cxuô. Zos qiv hơưv tsi jông tsi taz por mak tsi muk...”

          Thâuv ntêx ntâu lênhx nênhs tsi xar hnar yo phao viv vâuv thiêz tsi jông nhoz, taz sik nhiv no tưz chuv tôngv heik tsưr fuôx gox cungz yo chiê taz por trâu zuk thiêz uô trơưk PL li cui tênhv. Yax six muk lok hâur têx xã Thác Bà, bảo Ái, Cảm Nhân, tix lâuk Lê Văn Vượng pheiz kênh: “Zos fuôx gox tsi taz por lok sik thâux chôngz lênhx nênhs tsi trơưk cui tênhv mak cur tsi muk. Viv tsi taz por trâu zuk thiêz cur chuôz zis. Thâuv tưz muk, cxuô lênhx nênhs tsuv uô jông têx cui tênhv tsưr fuôx gox heik kriê, viv têx cui tênhv tâu tso tơưv puôr lênhx zos chiê taz por trâu zuk li txox siê thiêz têx lênhx nênhs txơưr”.

          Truôx siêz yưr lir txos qơư, lưx lươngv cảnh sáy zaoz thôngz cêr đêx tỉnh Lào Cai tưz chuôz tsar qênhz yuôx, seiz car jông sâuv niêv pas Thác Bà. Txix hâur shôngk shông 2026 txos nhiv no, lưx lươngv cảnh sát zaoz thôngz cêr đêx tưz krêz uô zuôr xar 200 jiês qênhz yuôx, đros zuôr xar 1 cxênhz jiês cán bộ chiến sĩ cxaz chuôz, pov zuôr xar 30 lênhx nênhs uô cxâuv, xưv bluô zuôr xar 160 tsov đeiv, sâu tsês 10 yêz fuôx gox thiêz 18 ntâuz ntơưr cxuô zav. Đros co, tsưr tsix zuôr xar 1 cxênhz 700 jiês yax mông txos tsôngv px, tsưr fuôx gox thiêz lênhx nênhs tsar fuôx gox. Lưx lươngv muôx txơưx jênhv tsênhv uô têx nhóm zalo chiê canhv pov tsi muk lok zos muôx ntux nas, pok huôz, lok sik qiv hơưv tsi jông. Chêx cuk zos 90% ntâu lênhx nênhs muôx yêz gox đêx tưz bax yo phao, 100% fuôx gox thâux kruô, ju lix thiêz thâux hax huv taz por cxuô zav, iz cxiê fuôx gox tsi taz por mak tsi puz huôx tôngv. Trung tá Nguyễn Thanh Hải, Phưv tuêv tsar tuêv CS cêr đêx số 2, Phongx CS zaoz thôngz, CA tỉnh Lào Cai puz pâuz: “Pêz zuôr tror seiz shuôk thiêz uô jông côngz xưv qênhz yuôx, chêx chôngk lok fuôx gox thâux kruô, uô ju lix thiêz thâux hax huv. Têx lênhx nênhs tsar fuôx gox tsuv muôx chứng chỉ chuyên môn cux xưk li fuôx gox tsuv muôx txâuk têx theox chênhv taz por lơưr PL li cui tênhv. Tror sik côngv đros công an xã uô jông côngz xưv yax mông trâu nênhs tsar fuôx gox thiêz tsôngv kruô thâuv cxaz chuôz zaoz thôngz cêr đêx tsuv uô trơưk chei zaoz thôngz cêr đêx”./.

Trịnh Xuân-Txâur Vax cxeik nhênhv

Luz nênhx hlôngr yiêz nhoz 2 saz ntus đêx Đà Giang

Ntơưv jok Phiêng Hua Nà, xã  Mường La, niêv lâul Cà Thị Bông luôs hâux lưv xor thêir qơư tu zus njêl  tưz gra lok phênhv sâu tâu truôx tuk. Thâuv ntêx, niêv lâul chuôz zis phênhv ntâu zos khưr uô liêx têz, phênhv sâu tsi truôx, luz nênhx njiz trâus ntâu phiv liv. Shông 2019, thâuv cxiv uô tâu tsêr meir tênhv Sơn La, têx đêx hâur pak đêx tênhv pur siêz, muôx jông qơư trâu huôv tsar tu zus shuôz njêl, niêv lâul Bông tưz sir jos xor thêir iz qơư tu zus siv njêl hâur pak đêx tênhv.

Khov moz siêz cơưv shâuv tsưr ziv tu zus, xeir tâu têx nôngz njêl huv đros, viv li njêl hloz lox jông, ntâuk muôz tâu ntâu muôs trâu tuz luôv ciêz đrôngs, chênhr zos li heik co, niêv lâul tror yưv pênhr, krêz uô qơư lox đar đuô chiê huôv tsar tu zus njêl. Niêv lâul Cà thị Bông shir phaz heik: “Shông no chuôz zis muôx phênhv sâu tâu ntâu đuô pir li cxiê shông, viv li chuôz zis lok six shir phaz; pêz xar cov cxuô cấp hâu nov ntơưv qơư tror paz max chiê chuôz zis muôx nzir pênhr huôv tsar tu zus ntâu đuô chiê cxaz nzir phênhv sâu”.

Tsi tiêk xor thêir qơư tu zus njêl, têx đêx sông Đax pur siêz tsênhv muôz qơư lox đar, đêx nxiêz si, jông huôv tsar ju lix côngv thôngx ndis shuôs tox trôngz câuv har uô si. Seiz pov têx jông co, tix lâus Lù Văn Nhu, cux nhoz jok Phiêng Hua Nà tưz yưv pênhr huôv tsar ju lix, cxiv uô qơư sâuv pak đêx tênhv txeik tok kruô tuôx ndis shuôs têz qơưk uô si.

Lơưr tix lâus Nhu, shông 2023, tix lâus chuôz zis qir huôv tsar uô luôs hâux lưv txeik tok kruô tuôx ndis seiz tox trôngz câuv, pak đêx tênhv đros trâu seiz nênhs Poz Ziz ntơưv qơư têx txux chi vênhx huôv, cêr nênhx xênhz huôx. Đhâu ntơư, tsi tiêk muôz hâu cêr huôv tsar uô nox trâu chuôz zis, tsênhv paz piêr kriê thiêz đros por hưv tsês têx muôx jông ntơưv qơư. Ciês shông 2025 nhiv kruôr đhâu, tix lâus Nhu chuôz zis qơư txeik tok kruô co tưz tok muôx iz cxênhz lênhx kruô tuôx nhoz so, ndis seiz têz qơưk uô si, gra lok phênhv sâu tâu xar muôx 150 tsov đeiv: “Hâur ntu zuôr txos, xar cov hâu nov ntơưv qơư thiêz cxuô ngênhx muôx vax huôv tror moz siêz, paz max; cxơưz tiês đros pêx xênhv huôv tsar uô ju lix côngv thôngx, muôz hâux lưv uô, cxaz nzir phênhv sâu tâu trâu pêx xênhv ntơưv qơư”.

Xã Mường La nhiv no muôx pak đêx đar 40 ha, zôngv huôv tsar tu zus shuôz njêl thiêz uô ju lix. Txos nhiv no, tas nro xã muôx 650 ntâu qơư xor thêir li heik sâuv tu zus njêl, iz shông ntâuk muôz tâu 400 ntâu tênhr, gra lok phênhv sâu 24 tyv đeiv ntâu, yênhx ntâu chuôz zis pêx xênhv nhoz jê 2 saz ntus đêx cêr huôv tsar kinh tế chênhr.

Taz sik, luôs hâux lưv huôv tsar tu zus shuôz njêl hâur thax tsav cux tsênhz njiz trâus tsi tsơưs phiv liv li: Huôv tsar tu zus tsơưs, tsi yuô tâu muôx txux chi tsưr ziv tu zus, piêr kriê têx xiv huv thiêz tsi muôx qơư sâu zuôr truôx tuk. Lơưr zơưv Bùi Việt Cường, Chủ tịch ủy ban xã Mường La, tỉnh Sơn La, ntơưv qơư tưz yax kriê, vênhv tôngv pêx xênhv sik côngv tsưr ziv huôv tsar uô nox, uô trơưk têx tsưr ziv yiêz, iz chas ntơư hux jos đros cxuô ngênhx muôx vax huôv paz cxiv tsa suôz bê, đros sâu zuôr têx shuôz njêl, xiv huv uô tâu: “Iz chas xor thêir qơư thiêz tu zus shuôz njêl trơưk li chor lâul thâuv ntêx tsưr ziv iz txưv tu zus, hâur ntu zuôr txos, xã muôx tsưr ziv kriê pêx xênhv krêz đar qơư huôv tsar zus, zov chênhr zos tsuv hlôngr pâur tsưr ziv chiê tu zus tâu trơưk têk, muôs tâu gri đuô”.

       Txix têx qơư tu zus njêl hâur pak đêx tênhv, txos trâu huôv tsar uô ju lix côngv thôngx, tsôngv pêx xênhv nhoz jê 2 saz ntus đêx Đà Giang muôz cêr njênhs njôngr trâu Đảng, têz qơưk luz nênhx tsênhv hlôngr yiêz, tsâu sor, vav mênhx jux juk khov sir jos sik tưr huôv tsar uô nox, uô bluô nux./.

Trấn Long-Riê Lâux cxeik, nhênhv