Têx txir ntông Mường Bú paz tsôngv pêx xênhv jux juk huôv tsar uô bluô nux

             Tix lâus Lò Văn Thương, heir nênhs Poz Ziz nhoz jok 2, xã Mường Bú, tỉnh Sơn La ntâu shông lok no cux tsênhv tâu tsôngv box hâur thax tsav pâuz txos zos lênhx hluôk nênhs huôv tsar uô nox uô hâuk coz, txơưx uô bluô nux ntơưv qơư. Txix iz lênhx pêx xênhv tsi tâu cơưv đhâu têx txux chi tưs hlo, taz sik txix têx pâuz tâu tsênhv tsênhz, lar heik zos sir jos hlôngr yiêz tsoz chos nox txir sâuv ar têz nxaz trơưk li tỉnh tsưr ziv fuô kriê, tix lâus yênhx lix HTX Minh Thương, muôx 10 lênhx nênhs. Huôv tsar, uô lax luôv 54 ha ntâu txir mo môngk, txir lưv tsiz sôngz, mo mix, txir tuôz ziz...., HTX têx xiv huv tưz muôs tâu pôngz trâu ntâu ciêz đrôngs hâur thiêz đrâuv 2 chas tỉnh, jux juk muôs trâu 2 chas thax tsav, têz qơưk đrâuv, gra lok phênhv sâu tâu 1,3 tyv đeiv iz shông. “Đros nhoz thiêz uô hâux lưv hâur HTX mak tâu buôk ti txos têx tsưr ziv uô nox yiêz, cux muôs tâu têx xiv huv zôngx ziv đuô, chênhr viv li huôv tsar uô trơưk HTX cui tinhv truôx tuk đuô”.

             HTX kôngz nuv Mường Bú muôx 10 lênhx nênhs ntơưv qơư, sơưr thơưx zos niêv lâul Nguyễn Thị Toán, huôv tsar uô kôngz hâur 50 ha ntâu liêx têz, phênhv ntâu zos txir mo môngk, lưv tsiz sôngz. Têx shông đhâu tưz sir jos sik côngv têk huôv tsar uô chiê muôs tâu gri, iz chas ntơư, cxiv tsa thax tsav huôv tsar chos ntâu; uô trơưk têx tsưr ziv yiêz hâur chos, tu....; hlôngr yiêz zuz nôngz tsoz chos; bax sik côngv đros cxuô taz viv hâur ngênhx kôngz nuv ntơưv qơư chiê tâu heik kriê xeir qơư huôv tsar uô nox huv đros; kriê tsưr ziv tsoz phưz, sâu đê, por hưv xiv huv trơưk cui tinhv VietGAP: “Nhiv no tsi tiêk hâur ciêz đrôngs, lênhx nênhs sir zôngv lênhx tưs cux xar cov têx xiv huv truôx tuk, jông, nox kaz. Chênhr viv li zuk xar huôv tsar uô tâu truôx mak tsuv uô trơưk cui tinhv thiêz hur jông”.

          Khov uô trơưk têx tsưr ziv, cui tinhv truôx tuk, HTX kôngz nuv Mường Bú têx xiv huv kôngz nuv tưz muôs tâu trâu ntâu ciêz đrôngs thiêz tâu lênhx nênhs sir zôngv xeir tsov, nhiêv zuôr txos. Xav kror đruôz đraz iz shông, HTX tưz muôs tâu 3 cxênhz ntâu tênhr jâuz, txir, kok cxuô zav trâu ciêz đrôngs thiêz tsôngv pêx xênhv hâur thax tsav. Ciês chor nênhs uô hâux lưv hâur HTX, yưx tas têx nhiêx txiêx zuôr yuôx tuô caz hmoz, qir trâu jâuz tâuv uz no..., iz chuôz zis cux tâu muôx 100-150 tsov đeiv iz ha iz shông. “Pêz HTX têx xiv huv phênhv ntâu zos muôs trâu ciêz đrôngs lox BiG C, Thăng Long C hà Nội, têx qơư zuôr muôs ntâu jâuz tâuv đrav Hà Nội; iz chas co zos têx tỉnh li: Quảng Ninh, Hải Phòng, Hà Nội..... thiêz pêz muôs trâu iz cxiê qơư zuôr muôs hax huv hâur tỉnh têx xor xưv tsưr tsix ntơưv cxuô thax tsav qơư”.

            Hâur zuôr xar 3.500 ha tsoz chos nox txir hâur xã, nhiv no tưz muôx zuôr xar 50 ha tsoz chos tâu muôz ntơưr côngk nhav truôx tuk, hur jông, trơưk cui tinhv VietGAP; 24 qơư muôz ntơưr côngk nhav chos, muôx 500 ntâu ha muôx têx muôs trâu ciêz đrôngs Trung Quốc, Mỹ, Úc, Liên minh châu Âu. Xã têx xiv huv kôngz nuv tâu muôs ntơưv têx ciêz lox hâur Hà Nội, chor qơư zuôr muôs jâuz tâuv, txir ntông hur ntơưv Sơn La thiêz 2 chas tỉnh nhoz jê iz ndis; piêr kriê, muôs sâuv điện tử. Xã muôx 4 xiv tâu côngk nhav OCOP zos: Txir tuôz ziz Ánh Vàng, txir tuôz ziz Hưng Thịnh, txir mo môngk Mường La, txir tsơưz phô mai. Zơưv Lù Văn Quý, Chủ tịch Ủy ban xã Mường Bú, tỉnh Sơn La heik pâuz: “Hâur ntu zuôr txos, pêz zuôr qênhz shuôs, njuôk hov đuô têx thax tsav chos ntâu tsoz chos nox txir muôx nhiv no, muôz têx zuz jông trâu pêx xênhv chos thiêz cxơưz cxiz sik côngv uô, tror yax kriê, vênhv tôngv pêx xênhv moz siêz txos yưv pênhr huôv tsar uô nox, lar heik zos đhok uô qơư zưs đêx cov ar nông, trâu qir thiêz tu jông chiê muôx tâu têx txir ntông jông gâux, truôx tuk, muôs tâu gri”.

             Txix huôv tsar thax tsav chos tsoz chos nox txir, tsôngv pêx xênhv Mường Bú luz nênhx iz hnuz tưz hlôngr yiêz jux juk, txos kaz shông 2025, chor chuôz zis pluôs hâur tas nro xã txo grêk yuôr xar muôx 3%. Thiêz xã Mường Bú xav tinhv, tror đros pêx xênhv, HTX sik côngv têk huôv tsar uô nox, uô trơưk têx tsưr ziv yiêz chiê uô tâu hax huv truôx tuk; iz chas ntơư sir jos piêr kriê têx xiv huv, cxơưz cxiz muôv muôs, krêz đar qơư sâu zuôr, jux juk cxơưz têx txir ntông hâur Mường Bú, tỉnh Sơn La muôs tâu trâu ntâu ciêz đrôngs./.

VOVTB-Riê Lâux cxeik, nhênhv

Ndo njôngr phax tar moz hâur cheix ntux cuz sor, lok nas tsi so

         Cheix ntux cuz sor shông no qiv hơưv yar ntux cuz sor zov chênhr, truz ntêr hnuz, đros co zos têx coz nas lox, chuô lox pov muôx yưv nhoz ntâu tiv phaz. Qiv hơưv no tsi taz uô zênhr shar txos hâux lưv tsêz chos, luz nênhx mak tsênhv uô ntâu zav moz riêz nênhs huôv xênhz.

        Ntơưv ntâu tiv phaz nhoz tox siêz thiêz tsôngv box mênhx cxưx tsơưs nênhs, đhâu têx jiês ntux lok nas lox, đêx sâuv têx pas đêx, tul đêx pur siêz, đêx tênhr sâuv chuôz zênhx iz ndis tsêr nhoz zos qơư chiê zôngr ntês kê. No zos qir tiv uô moz suôz liêz chuôz ndê. Đrâuv co, têx zav moz lok cêr nox hâuk, tês tơư kror ndâux, moz kror muôl liêz thiêz têx zav moz lok cêr uô pa cux chuôz ndê hâur ntu ntux cuz sor, lok nas txơưr txar.

          Txix qênhx shênhx co, pox nhuôk tsuv yax six uô vêv xênhz tênhx qơư, luôx đrox, krêz thôngz cưx đês, qêz suô têx vuôz tsuôz kiês nênhs, lâuz têx đêx thiêz muôz por tsês têx chuôz zênhx muôx đêx tênhr hâur co. No zos têx tsưr ziv zôngx ziv uô taz sik phax tar têx zav moz cik txix zôngr lok six muôx chêx cuk.

          Têx chuyên gia y tế heik, cxuô ziv chuôz zis tsuv uô jông tsưr ziv nox siêr, hâuk bâu; zôngv đêx hur; yax six zôngv yuôx phongx nzuôr tês uô ntêx thâuv nox hâuk lok sik thâuv muk tơưv trôngx lok. Đros mê nhuôk zâu, têx lênhx uô niêv uô txir tsuv seiz njôngr mê nhuôk li đas jos, thâuv pov mê nhuôk uô cuz, gênhs gênhs, thox plaz, tơưv poz liêz sâuv tơưr greix tsuv ciêr chênhr chox ciês muk qơư y tế chiê tâu seiz njuôs shuôk moz./.              

Tsu Vưx- Txâur Vax cxeik nhênhv