Sir jos uô cov huv đros trâur nuv chính quyênx tiv phaz 2 cấp nhoz Điện Biên

          Txix hnuz xiêz 1/7/2025 uô trâur nuv chính quyênx tiv phaz 2 cấp, tỉnh Điện Biên tưz txu grês txix 129 taz viv hành chính cấp xã yuôr 45 xã. Hâux lưv cxuôv por tsês cấp huyện, thành phố paz txu grês bộ meir taz sik ho chuôz cxaz hâux lưv trâu chính quyênx cấp xã. Viv têx vênhv thix ar têz, cxiv tsa, nhiêx txiêx, yưv pênhr côngz, zaoz zux, y tế lok sik car chêx ntâuz ntơưr hành chính puôr lênhx tâu krêz uô txix ciês tiv phaz. Pos Lù Thị Mai Sinh, cán bộ Phongx vênhx huôv, xã hội xã Mường Pồn, tỉnh Điện Biên pheiz kênh: “ Nhiv no mak cấp xã cê uô hâux lưv đros tsôngv px, cê uô jênhv vưv kuz taz sik tsênhv uô cxaz jênhv vưv yiêz thiêz. Cán bộ cê cơưv, cê uô, cê shưv jux jus đros têx hâux lưv lênhx tưs cux tsuv uô lok six ntâu jênhv vưv đros zuk li hâux lưv uô nhiv no”.

          Chuôz cxaz vax huôv trâu cấp xã tsi taz zos chuôz cxaz txơưx jênhv mak tsênhv khav tênhv qơư tsov txos seiz tsôngv px zos tsênhv qơư, muôz tsơưr lươngv phưx vưv zos kror seiz shuôk bộ meir li chêx cuk uô hâux lưv. Zơưv Nguyễn Văn Lương, Chủ tịch UB xã Mường Pồn xar tiêk, đrâuv hâux lưv ntâu, cán bộ xã cux njiz phêv liv viv zoz qơưx ziv hnuz ziv siêz lok tsơưr lươngv phưx vưv tsôngv px, hlôngr yiêz hành chính thiêz hlôngr yiêz số. “ Cán bộ công chức xã Mường Pồn txos nhiv no tưz tuôv zênhv zoz qơưx jênhv vưv hâur qênhx shênhx yiêz. Taz sik tiv zoz qơưx jênhv vưv, hâux lưv ntâu; tiv zix zos đros iz cxiê cán bộ công chức tsuv uô têx jênhv vưv txơưr tsi trơưk zuk chuyên môn tâu thox cxov. Chênhr viv li tsênhv njiz phêv liv thiêz tsi tâu uô tâu jông thâuv tâu choz jênhv vưv”.

          Đrâuv chêx cuk tax tâu, hâux lưv uô trâur nuv chính quyênx tiv phaz 2 cấp nhoz iz cxiê qơư tsênhv yuôr têx tsi tâu uô tâu, chêx cuk tsi siêz; iz cxiê cán bộ cấp xã li pênhr xưv txux chi tsi tâu tuôv zênhv tâu zoz qơưx jênhv vưv; muôx tsi txâuk cán bộ hâur têx vênhv thix chuyên môn li: công nghệ thôngz xor mông, ar têz, kôngz nuv, cxiv tsa, nhiêx txiêx; ntâu cán bộ tsuv uô cxaz têx vênhv thix đrâuv chuyên môn tâu thox cxov tưz uô zênhr shar txos tsơưr lươngv, six hơưv uô hâux lưv. Zơưv Cháng A Nủ cán bộ phongx vênhx huôv xã hội xã Na Sang puz pâuz: “ Têx đồng chí phưv txơưx uô ntâu hâux lưv, tâu choz ntâu jênhv vưv đuô thiêz zoz qơưx uô jênhv vưv siêz đuô. Viv li lơưr cux chiv chir thôngz sâu thiêz muôz siêz yênhx tưv chuyên môn chiê uô tiêr jênhv vưv tâu choz”.

          Xav tênhv muôz siêz chinhr quyênx tiv phaz 2 cấp li chêx cuk zos tas nro cxix luôk chính trị li jênhv vưv lêx ntêr. Tỉnh uỷ Điện Biên tưz lênhs tov, chox kriê krêz uô hâux lưv tso công chức, viên chức cấp tỉnh muk uô côngz xưv ntơưv xã, phường tsi tâu muôx txâuk biên chế, tsi muôx chuyên nganhx huv đros. Tỉnh tưz tso 2 cxênhz 300 ntau lênhx cán bộ, công chức, xa 14 cxênhz 270 ntâu lênhx viên chức, nênhs lox tôngv muk uô hâux lưv ntơưv têx xã yiêz. Zơưv Lê Đình Tuyên, Phưv GĐ Sở nội vụ tỉnh Điện Biên puz pâuz: “ Tỉnh cux muôx lok six ntâu tsưr ziv chiê taz trâu huôx tôngv cấp xã li kriê cxaz chuyên môn nghiệp vụ, seiz shuôk đuô chor cán bộ công chức khối Đảng, đoanx thêv, chính quyênx chiê muôx tsưr ziv hlôngr qơư uô côngz xưv cov huv đros. Đrâuv co zos chuôz tsar cán bộ cấp tỉnh muk têx xã uô jênhv vưv chuôz tsar zôngv công nghệ thôngz xor mông thâuv car chêx hâux lưv”.

          Zuôr xar iz shông uô trâur nuv chính quyênx tiv phaz 2 cấp tso pov, no zos trâur nuv uô huv đros. Bộ meir tâu txu grês, txơưx jênhv tsênhz mênhx đuô, ntâu hâux lưv tâu car cheix sei đuô, chính quyênx thiêz tsôngv px tâu siz jê đuô. Tỉnh Điện Biên nhiv no tsênhv yênhx trus car chêx têx phêv liv lok pênhr xưv cán bộ, lok lênhx nênhs uô hâux lưv, cơ chế huôx tôngv thiêz tsưr ziv seiz car chiê traur nuv no tsênhz tsênhz phuox huiz tâu chêx cuk lêx ntêr thiêz truôx tul. No cux zos tỉnh Điện Biên li tsưr ziv uô chiê tror cxiv tsa chor cán bộ muox txâuk pênhr xưv txux chi tuôv zênhv zoz qơưx seiz car yiêz, seiz tsôngv px thiêz doanh nghiệp li jông siêz zos kror chiê ntâuk grê uô trâur nuv no./.

Vũ Lợi-Txâur Vax cxeik nhênhv

Lào Cai: Muôz ar uô cêr chiê cxiv tsa thax tsav qơư ziv hnuz ziv huôv tsar jông

            Txox cêr muk lol chênhr hâur jok zuôr tâu luôv suôz jêz, xi măng txos ntuô trâu jok Đát Lụa, ntêr zuôr xar iz cêik, đar 5 thiêr ntâu, hâur co luôv suôz jêz, xi măng đar 3 thiêr ntâu. Co iz txưv zos cêr ar, đar tưz tsi muôx 3 thiêr, phiv liv muk lol. Iz txox cêr jêx jok tâu uô jông thiêz lox đar li heik sâuv zos tsôngv pêx xênhv jok Đát Lụa cêr xar njôngr thâuv nzor lok, chênhr viv li thâuv muôx tsưr ziv yưv pênhr cxiv uô, kho đuô, tsôngv pêx xênhv sơưr đơưk tưz jông siêz hlo muôz ar uô cêr. Zơưv Nguyễn Văn Bắc chuôz zis zos iz hâur têx ziv chuôz zis muôz ntâu ar đuô hur si uô cêr heik: “Cur muôz ntâu ar cơưk uô cêr, xav hur si tas muôx 300 ntâu xưv phaz. Hâur no muôx iz jok nênhs Cho, chor tuz nhuôs puôr lênhx nhoz hov hnuz nhôngs muk cơưv ntơưr, thâuv lok nas ciês zuk tưz muk lol tsi yuô tâu, viv li cur 2 niêv txir tưz seiz lax zos muôx tsaz yênhx uô cêr mak zuôr jông siêz hlo muôz ar têz uô. Têz qơưk uô đar pêk tsơưs mak chuôz zis muôz ar trâu uô cêr bâuv co”.

            Cux xưk li zơưv Nguyễn Văn Bắc chuôz zis, pos Hoàng Thị Lý chuôz zis cux heik li no: “Cur chuôz zis cux shir phaz, thôngx ziv đros uô txox cêr no, cur cux muôz 200 ntâu xưv phaz ar têz, hâur co tưz chos 200 ntâu tsoz chos ciêv fix chiê uô cêr muk lol”.

             Zơưv Hoàng Văn Đoàn, tsar jok Đát Lụa, xã Bảo Ái, tỉnh Lào Cai heik, chiê phưx vưv uô cêr muk lol, têx chuôz zis pêx xênhv tưz jông siêz, thôngx ziv muôz 500 ntâu thiêr ar têz trơưk 2 saz ntus cêr, xav hur si muôx zuôr xar 2 cxênhz xưv phaz. Co zos pêx xênhv cêr sik thôngx siêz, thôngx ziv lar kruôs txos, viv hâur têx ar têz ntơư puôr lênhx tsênhv chos tsoz chos tsi tâu tâu jông sâu. Trơưk li tsưr ziv, txox cêr heik sâuv zuôr tâu uô tiêr trâu hli 6 shông no, cxuô chuôz zis pêx xênhv tsênhv zênhx max ntor txiêr têx tsoz chos chiê choz ar uô cêr muk lol jêx jok. “Pêx xênhv tưz thôngx ziv đros uô li chas cov uô tiêr tâu nzor cêr muk lol. Phênhv ntâu zos tsôngv pêx xênhv muôz ar têz uô cêr, tiv 2 ntor txiêr iz cxiê zav tsoz chos li: Tsoz chos nox txir, ciêv fix por tsês; hâur ntơư ciêv fix zos tsoz chos tưz tsi tâu jông txiêr sâu, taz sik tsôngv pêx xênhv cux jông siêz đros jok muôz têx tsoz chos txiêr por tsês chiê choz ar uô cêr zôngx ziv muk lol”.

            Xưk ntâu thax tsav qơư txơưr đuô, têx cêr muk lol jêx jok tâu krêz uô lox đar xưk li ntơưv jok Đát Lụa thâuv uô tiêr, zuôr uô hlôngr yiêz têx thax tsav tox siêz. Xav hâur ntu 2021-2025, tas nro tỉnh Lào Cai tưz cxiv kho 3.850 ntâu cêik cêr jêx jok chiê zôngx ziv muk lol, krêz uô yiêz zuôr xar 500 cêik. Tsôngv lax pêx xênhv tưz paz 1.380 tyv đeiv, hâur ntơư muôx nhiêx txiêx, hnuz côngz đas jos thiêz lar heik zos muôz ar têz uô cêr muk lol. Txix co, tỉnh Lào Cai tso tơưv hâux lưv, krêz uô yiêz thiêz kho đuô 2.500 cêik cêr hâur ntu txuôk nzir, chiê txos shông 2030, 80% ntâu cêr muk lol jêx jok hâur cxuô xã tâu luôv suôz jêz, xi măng zôngx ziv muk lol huôv tsar uô nox./.

Đinh Tuấn-Riê Lâux cxeik, nhênhv