Jauz caz tuôx njuôz jông sâuv thax tsav trâus ntux nas ruôr hiêv

   Tiv trâus jiês đêx ngaz zov chênhr muôx yưv thâuv hli 9 tsêz no, huyện Trấn Yên li 700 hecta ntâu mênhv chêx jâuz caz trâus đêx ngaz, ar vôngz tas, hâur co muôx nhos 100hecta trâus tuôs thiêz tsuv chos yiêz. Đros chính quyênx tiv phaz thiêz pox nhuôk nôngx mênhx li sir jos, txos nhiv no têx mênhv chêx trâus ruôr hiêv tsơưs tưz hôx phưx tas nro, chor mênhv chêx tsuv chos yiêz zuôr sâu tâu hâur chiv ntux lax.

          Pos Trần Thị Liên nhoz jos Trúc Đình, xã Thành Thịnh, huyện Trấn Yên puz pâuz: Zuôr xar 2 luz hlik đhâu jiês ntux nas, têx ziv chuôz zis trâus ruôr hiêv tưz tâu têz qơưk paz zuz nôngz, qir zuôv, uô đuô ar chiê chos yiêz.

          Lơưr pos Liên, thâuv tror chos đuô jâuz caz, iz shông pos chuôz zis sâu tâu 600-700 cir xor caz, chox lok phênhv sâu 120 tsov đeiv ntâu.

          “Xuz thơưx mak tu zus caz txix nzeix shôngz, đhâu co muôx tsaz yênhx yiêz mak tu zus txix nzeix ntông, xor caz sâu tâu đơưz jông đuô, tuz luôv nhiêv đuô”.

          Đhâu zuôr xar 20 shông tâu chos nhoz Trấn Yên, txos nhiv no, thax tsav chos jâuz caz tưz krêz đar txos 1 cxênhz hecta ntâu nhoz ntâu xã buôk 2 ntus tul niêv đêx Liêz li: Tân Đồng, Báo Đáp, Thành Thịnh, Y Can, Quy Mông, Minh Quân. Iz cxiê xã tox siêz li Hưng Khánh, Hồng Ca, Lương Thịnh cux chêx chôngk krêz đar mênhv chêx chos buôk têx tul đêx. Têx liêx jâuz caz njuôz jông tưz paz uô hlôngr yiêz zuôr xar 2 cxênhz ziv chuôz zis tsôngv box nhoz no txix hâux lưv tu zus caz chaz xor.

          Thâuv ntêx, têx chuôz zis phênhv ntâu tu zus caz sâuv nzeix shôngz, tov kaz no hlôngr tu zus hâur plas tsêr, tiv mênhv chêx tu zus greiv, lax tsoz phưz, lax uô vêv xênhz viv li caz khênhr trâus moz. Muôx nhos 4 shông tror lok no, ntâu ziv chuôz zis tsôngv box hâur huyện  hlôngr tu zus cxênhx txuôk đuô, tsơưs trâus moz thiêz zus tâu xor caz jông đuô.

          Pos Nguyễn Thị Hồng Lê nhoz xã Thành Thịnh pheiz kênh, hâux lưv tu zus caz chaz xor sâuv nzeix tso lok chêx cuk jông, paz txu grês côngz lox tôngv, zôngx ziv uô vêv xênhz, caz tsơưs trâus moz, hloz lox jông...

          “Phênhv sâu txix tsoz jâuz caz siêz đuô 3 jiês pir đros chos blêx, poz cưk, nhiv no tu zus caz cux tsi khưr li thâuv ntêx thiêz...”

          Têx shôngk đhâu, yênhx puôk ziv chuôz zis tu zus caz chaz xor, tsôngv box li caz tâu têz qơưk paz txưv cxiv tsa, kho đuô txix pênhr tsaz yênhx têz qơưk li qơư tsov txos thiêz têx chính sách paz huôv tsar kôngz, jôngr nuv hâur tỉnh. Phênhv ntâu têx ziv chuôz zis muôx tsêr tu zus caz trơưk cui tênhv, taz por têx kỹ thuật tu zus caz. Zơưv Nguyễn Minh Thanh, Bí thư Đảng ủy xã Thành Thịnh, huyện Trấn Yên puz pâuz:

          “Xã Thành Thịnh nhiv no muôx 285 hecta jâuz caz, tsov cưv huôv tsar đuô thiêz mak shông 2025 xã tưz chos yiêz 30hecta ntâu. Chiê chuôz tsar tsơưr lươngv mak cux chox lok chos têx nôngz jâuz caz yiêz zuôr txix Lâm Đồng lok. Nhiv no, mênhv chêx jâuz caz yiêz huôv tsar jông, mênhv chêx kuz mak tâu tsoz phưz thiêz hlôngr yiêz. Hâur ntu zuôr txos xã zuôr tror vênhv tôngv tsôngv box uô ar chuôz tsar mênhv chêx chos jâuz caz...”

          Huyện Trấn Yên nhiv no muôx 12 trâur nuv sik côngv txix tsêz chos - sâu zuôr- tsiv uô zos têx HTX sơưr sik côngz cungz zuz nôngz, chuôz zênhx, caz chaz xor trâu nôngx mênhx, đhâu co sâu zuôr xor caz trâu doanh nghiệp tsiv uô. Tiv zix, khov muôx tsưr meir tsiv uô xor caz lox ntơưv tiv phaz, tsôngv box thâuv tưs cux tso siêz huôv tsar, krêz đar mênhv chêx chos. Zơưv Vũ Xuân Trường, Giám đốc Công ty CP jâuz caz Yên Bái puz pâuz:

          “Saz Công ty mak pêz tưz paz pox nhuôk lok kỹ thuật, heik kriê têx qơư cungz zuz nôngz tsoz chos, nôngz caz, chuôz zênhx, qir zuôv....Khov pox nhuôk li huôv tsar thiêz thax tsav chos, pêz zuôr krêz đar tsêz chos, đhâu co uô tâu xiv huv xơưk pax ntâuz jông...”

          Đros tsưr ziv muôz siêz tsơưr lươngv, chêx cuk tsaz yênhx chos jâuz caz, tu zus caz chaz xor, huyện Trấn Yên tsênhv chox kriê têx tiv phaz chêx chôngk paz nôngx mênhx krêz đar thax tsav chos, zôngv KHKT yiêz lok tsiv uô chiê muôz siêz tsơưr lươngv jâuz caz thiêz xor caz. Txix co, hâux lưv chos jâuz caz tu zus caz chaz xor zuôr phuôx huiz chêx cuk jông đuô, tsôngv box luz nênhx zuôr ziv hnuz ziv tâu muôz siêz./.

Đinh Tuấn-Txâur Vax cxeik nhênhv