Tsưr ziv paz tsoz chos huôv tsar sâuv têx liêx têz uô iz chiv kôngz nhoz Lai Châu

Tix lâus Lò Văn Phấn, nhoz jok Hua Sẳng, xã Bản Bo, huyện Tam Đường (Lai Châu) chuôz zis muôx 4 cxênhz ntâu xưv phaz ar uô kôngz. Tiv muôx tsi txâuk đêx uô, viv li chor liêx têz co ntâu shông lok no tâu tix lâus chuôz zis uô iz chiv kôngz xưz, yuôr đuô li mak tưz uô tsi tâu đaz tsi hlo. Txơưv tas ntâu côngz đas jos uô, taz sik chor blêx chuôz zis hlêis sâu tâu cux tsuôk txâuk chuôz zis nox hâur iz shông.

Tix lâus Lò Văn Phấn heik: Chuôz zis chor liêx têz uô iz chiv kôngz tưz muôz trâu doanh nghiệp ntiêr thiêz iz shông doanh nghiệp thêv 2,5 tênhr blêx, bâuv li chor blêx chuôz zis uô thiêz hlêis sâu tâu hâur niêx shông. Doanh nghiệp ntiêr, lơưr tưz muôz hlôngr chos tsoz chos sắn dây thiêz ntiêr chuôz zis tu, seiz car. Txix chor nhiêx choz tu thiêz seiz shuôs zos 100 tsov đeiv đros trâu têx blêx doanh nghiệp ntiêr ar thêv tuôx, shông nhiv kruôr đhâu chuôz zis tưz hla đhâu cêr pluôs: “Txix uô iz chiv blêx nhiv no muôz hlôngr chos tsoz chos heik sâuv tưz gra lok phênhv sâu tâu siêz đuô. Tsi tas li, chuôz zis tsênhv tâu doanh nghiệp ntiêr uô hâux lưv, seiz car thiêz tu têx liêx têz co hur si. Chuôz zis muôx 4 lênhx nênhs mak 3 lênhx buôk ti uô hâux lưv tu têx tsoz chos co thiêz muôx phênhv sâu tâu txix têx nuv uô ntơư, viv li kinh tế cux truôx tuk đuô”.

Tsoz chos sắn dây tưz lok six sưv đros tsôngv pêx xênhv nhoz têx tỉnh tiêx đras, taz sik tsôngv box cxuô heir nênhs tox siêz mak co zos iz zav tsoz chos yiêz. Seiz pov hâur xã Bản Bo jông huôv tsar chos tsoz chos heik sâuv, hâur shôngk shông 2023 HTX Hồng Phát tưz xeir jok Hua Sẳng chiê fuô uô siv chos zav tsoz chos co. Khov tâu tsôngv pêx xênhv jông siêz, thôngx ziv, taz viv tưz ntiêr 10 ha ar uô blêx iz chiv hâur jok Hua Sẳng chiê chos 4 cxênhz sắn dây.

Zơưv Trương Văn Hùng, Giám đốc HTX Hồng Phát heik pâuz: Iz ha taz viv thêv 5.500 cir lok zos 5,5 tênhr blêx trâu pêx xênhv iz shông, bâuv li chor blêx pêx xênhv uô hâur niêx shông. Thâuv ntiêr tâu ar, muôx ar chos, taz viv tưz tso meir lêix, fênhx têx ar cov tuk thiêz zuôr nôngz đrav Hải Dương tuôx chos trâu. Đhâu iz shông chos thiêz tu, khơưz sâu, xav kror đruôz đraz iz luz hâur pâuk tâu 75 cir kok, iz ha tax 30 tênhr thiêz gri muôs kok nhôngk nhiv no zos 15 cxênhz đeiv iz cir: “Đhâu iz shông chos, cur pov nhoz no jông huôv tsar chos zav tsoz chos co. Chiv zuôr txos, cur tsênhv heik tsôngv cưr tix nênhx tsa cov sơưr đơưk chos lok sik muôz ar têz trâu doanh nghiệp ntiêr chiê taz viv krêz đar liêx têz chos tâu ntâu đuô. Hâur shông 2024 no, pêz cux zuôr cxiv uô iz luz tsêr meir chiê tsiv uô ntơưv qơư, krêz đar cêr huôv tsar uô nox, paz pêx xênhv nhoz thax tsav no muôx phênhv sâu tâu truôx tuk”.

Xã Bản Bo, huyện Tam Đường, tỉnh Lai Châu nhoz jê tơư trôngz Hoàng Liên Sơn, muôx zuôr xar 8 cxênhz ha ar thiêz 8 heir nênhs uô nênhx nhoz. Co zos thax tsav qơư jông huôv tsar uô kôngz đros thiêz iz cxênhz ntâu ha, jông huôv tsar chos ntâu zav tsoz chos. Nhiv no xã muôx 830 ntâu ha yuôx zêx tsênhv tâu sâu đê niêx shông. Taz sik cux tsênhv yuôr nhos 200 ha liêx têz uô blêx iz chiv thiêz chos tsi jông iz cxiê zav tsoz chos txơưr đuô.

Zơưv Nguyễn Xuân Hoàn, Bí thư Đảng ủy xã Bản Bo, huyện Tam Đường heik pâuz: Nhiv no ntơưv qơư tsênhv tsênhv yuôr zuôr xar 27% chuôz zis pluôs. Xã hâux lưv tso tơưv zos muôz tas nro têx liêx têz uô kôngz iz chiv thiêz uô tsi yuô jông kôngz hlôngr chos tsoz chos sắn dây. Xã zuôr sơưr bê paz cxiz chiê doanh nghiệp đros uô, kriê têx tsưr ziv chos, tu thiêz sâu zuôr pêx xênhv chor kôngz uô tâu, paz cxuz cêr yeiz pluôs, huôv tsar uô bluô nux txix zav tsoz chos yiêz co: “Tsôngv box jông siêz muôz ar têz côngv đros HTX chiê huôv tsar chos tsoz sắn dây. Đhâu iz shông fuô uô, txos nhiv no tưz tâu khơưz sâu thiêz pov cux muôx phênhv sâu tâu siêz đuô pir li uô blêx 4 jiês. Xav hur si iz ha sâu tâu 400 tsov đeiv, yưx tas têx nhiêx txiêx zuôr nôngz, ntiêr ar, yưv pênhr uô thiêz tsoz phưz tas muôx 200 tsov đeiv, tsênhv tâu liv muôx 200 tsov đeiv thiêz”.

Xuz thơưx, tsoz chos sắn dây tưz chos thiêz uô tâu trơưk li tsưr ziv, muôx phênhv sâu siêz đuô pir li uô blêx. Lar heik, doanh nghiệp co nhiv no tưz chos luk paz max pêx xênhv 50% nhiêx txiêx chos thiêz txeik nôngz, qir zuôv uô ntêx trâu pêx xênhv chos, cux li sâu zuôr têx xiv huv uô tâu./.

Khắc Kiên-Riê Lâux cxeik, nhênhv