Ntênhs hội ntor đêx shông 2024 zos tsôngv box Lol Tsuôk nhoz Điện Biên li tsiêz cxôngx nzor, tâu tsưr tsix iz shông iz jiês. Co zos iz hâur têx hâux lưv uô hơưv tok shông ju lix-Điện Biên 2024 thiêz ndar txos chiv nhênhv 70 shông ntâuk zênhx tros châuz Điện Biên. Tsôngv box Lol Tsuôk nhoz xã Núa Ngam luz tsiêz heik sâuv tưz tâu Bộ Vênhx huôv, Thêv thao thiêz ju lix côngk nhav zos Di sản vênhx huôv jông cấp têz qơưk. Tsiêz ntor đêx tsênhv zos six hơưv chiê tsôngv pêx xênhv thor zơưv sâuz pox sâuz tso nas lok paz ntiêx têz uô tâu nox tâu hâuk, khưr kôngz lôngk lok pur cxaz, tu tsiêx cxu lok pur guôx, cxuô tsar zav hloz lox jông; tso tsês têx cêr viz cêr gênhk, cêr fêv đros shông lâul muk, iz shông yiêz sơưr đơưk nhoz khax khax, tsi muôx vix xiz./.

          Vũ Lợi -Riê Lâux cxeik, nhênhv

Yar ntux cuz sor, ntux kruôr gis ntêr hnuz tưz uô ntâu har jôgnrr nhoz Lai Châu njuôs xav trâus cuz siêz. Tas nro huyện Phong Thổ nhiv no muôx 45 cxênhz 600 ntâu hecta jôngr. Chiê uô jông côngz xưv seiz car, por vêv jôngr thâuv ntux kruôr gis, lưx lươngv qênhz jôngr tsênhv sik côngv đros chính quyênx têx xã, thị trấn krêz uô têx tsưr ziv phax cuz tuô cuz jôngr đros tsưr ziv “4 ntơưv qơư”. Ntơưv têx har jôngr puôr lênhx muôx qơư seiz jor, têx tuêv por vêv jôngr yax six muk qênhz yuôx, seiz car thiêz yưr lir txos qơư têx lênhx nênhs uô cxâuv lok chei seiz car, por vêv jôngr. ZƠưv Nguyễn Văn Tuân, Phưv Hạt tsar phưv txơưx Hạt qênhz jôngr huyện Phong Thổ, tỉnh Lai Châu puz pâuz: “Ntu qiv hơưv cuz sor kruôr gis, cấp njuôs pov cuz jôngr nhoz cấp 4, cấp 5 lok six riêz nênhs. Hạt qênhz jôngr pêz tưz heik trâu UB huyện tso tơưv ntâuz ntơưr chox kriê chuôz tsar lok côngz xưv phax cuz tuô cuz jôngr nhoz hâur jos, bax tsưr ziv, lênhx nênhs thiêz chuôz zênhx chiê tuô cuz jôngr thâuv muôx yưv”./.

K.Kiên-Txâur Vax cxeik nhênhv

Ntux cuz sor ntêr hnuz hâur ntu đhâu tsênhv uô têx đêx hâur cxuô luz pak đêx liv nhoz tỉnh Sơn La trâul grik tas, uô ruôr hiêv tsi tsơưs txos tsôngv pêx xênhv hâur thax tsav cêr huôv tsar  uô kôngz. Tỉnh Sơn La nhiv no muôx 110 luz pak đêx, zuôr xar 3 cxênhz côngz trênhx đêx liv lox zâu, muôx txâuk đêx phưx vưv uô 30 cxênhz ha kôngz thiêz tu zus shuôz njêl.... Chiê bax phax tir thêir kruôr gis ntêr hnuz, ngênhx kôngz nuv Sơn La tsênhv chox kriê têx lênhx nênhs uô hâux lưv seiz car đêx liv cxuô huyện, TP hux jos đros Ủy ban cxuô xã, ban seiz car têx jêx jok, đêx bax tsưr ziv tso đêx huv đros phưx vưv pêx xênhv uô kôngz, thoz huk têx cưx đês, tâur đêx jông chiê muôx nzir đêx txâuk uô têx kôngz. Đros trâu têx li heik co, cux heik pêx xênhv sơưr đơưk đros cxênhx txuôs đêx chiê muôx txâuk đêx phưx vưv uô kôngz hâur têx hnuz kruôr gis, cuz sor./.

Thu Thùy-Riê Lâux cxeik, nhênhv

Cux nhoz Sơn La, thâuv 3 six zar hnuz keix hnuz 14/4, ntơưv jos Cuộm SƠn thiêz jos Ban, xã Chiềng Mai, huyện Mai Sơn (Sơn La) muôx yưv jiês cuz tox cuz jôngr. Ciês thâuv jênhv tâu xor mông, têx lưx lươngv muôx txơưx jênhv tưz tuôx ntơưv qơư chox kriê, sik côngv đros tsôngv box ciêr chênhr cxaz chuôz tuô hluôr tơưs. 100 ntâu lênhx nênhs sir jos tir their tsi chiê hluôr tơưs txeik cuz lox. Taz sik tiv cuz sâuv tox siêz poz jêz, hâux lưv muk lok tuô hluôr tơưs njiz ntâu phêv liv. Txos nhiv no, txuz hluôr tơưs cuz nhoz jos Cuộm Sơn tưz tâu tuô, ntơưv jos Ban tsênhv cuz mê. Nhiv no lưx lươngv muôx txơưx jênhv tsênhv seiz shuôk qênhx shênhx, tror phax tuô tsi chiê hluôr tơưs txeik cuz trâu thax tsav txơưr, thôngx cxix qênhz yuôx, xav tênhv qir tiv cuz tox cuz jôngr./.

Trấn Long-Txâur Vax cxeik nhênhv