Đại hội teiv plor têx mênhx cxưx tsơưs nênhs tỉnh Lào Cai jiês tiv 4 nhiv kruôr tsưr tsix, đros muôx 250 lênhx teiv plor cxaz chuôz. Đros njiêz luv “Têx mênhx cxưx tỉnh Lào Cai sik côngv siêz, hlôngr yiêz, sik côngv thiêz huôv tsar”. Đại hội thôngz đhâu ntơưr truôx siêz, reik đros tsưr ziv huôv tsar tas nro, truôx vênhs thax tsav tsôngv box mênhx cxưx tsơưs nênhs; hu lơưs tsôngv box têx mênhx cxưx tsơưs nênhs tỉnh Lào Cai sir jos cxiv tsa têz qơưk ziv hnuz ziv bluô nux, tuôr truôx txiv ngaz, gôngr phênhv lok têz qơưk li huôv tsar cxuô; sir jos hâur ntu 2024-2029 chuôz tsar kinh têr sâuv 10%/ iz shông, txu grês ziv chuôz zis pluôk txix 2-3%/iz shông…zơưv Hầu A Lềnh, Bộ trưởng, Seiz car UB mênhx cxưx heik mênhx: “Cur njênhs njôngr tiêk, tỉnh Lào Cai đros muôx trôngz jôngr chiv xênhz đrox tsuôk jông, muôx trôngx đriv ntiêx têz muôv muôs, tsôngv box gruôs uô hâux lưv zuôr muôx têx trus huôv tsar jông, 25 mênhx cxưx tror phuôx huiz cêr chax chês sik côngv siêz, sir jos tưr thik uô lox tôngv xênhz yar, sik paz max chiê hla đhâu têx phêv liv, cxiv tsa thax tsav tsôngv box mênhx cxưx tsơưs nênhs tỉnh Lào Cai bluô nux lok kinh têr, muôx vênhx huôv mênhx cxưx jông, tuôr truôx txiv ngaz côx phax, uô zênhx liv Đảng bộ tỉnh li tsưr ziv cux xưk li hâur ntơưr truôx siêz mak Đại hội tso tơưv”./.

An Kiên-Txâur Vax cxeik nhênhv

Hnuz 25/8, cưx đês tok đêx lok trâu tsêr meir đêx tênhv Nậm La nhoz jok Sẳng, xã Chiềng Xôm, TP Sơn La, tỉnh Sơn La trâul ar, poz jêz poz lok cxuz puôk tsuôx, uô đêx cxênhv ntâu, ntưk lol cuôr tas 4 chuôz zis pêx xênhv hâur jok ntâu têx liêx têz kôngz lôngk. Đhâu thâuv tsêr meir cơư trôngx iz qơư tso đêx chiê khưx phưx têx tsi jông, đêx txơưv pur siêz tuôx lok six sei, uô ngaz tas tsôngv pêx xênhv pêv kâuv pak đêx tênhv ntâu kôngz lôngk, jâuz tâuv. Đhâu hlo thâuv txeik tâu mông heik pâuz, Ủy ban xã Chiềng Xôm tưz heik trâu Ban seiz car phax tar nas chuô thiêz zok nriêr chơưv paz lênhx nênhs TP Sơn La thiêz tỉnh Sơn La chiê khưx phưx têx tsi jông. Iz chas ntơư, fuô uô cxuô faz tsưr ziv phax tir thêir huv đros chiê txo grêk tsơưs têx trâul ruôr hiêv tiv đêx nas uô./.

Trấn Long-Riê Lâux cxeik nhênhv

Ntux lok nas txix hmo 24 txos tas cik hnuz 25/8 tưz uô 1 lênhx nênhs trâus saz thiêz tox poz lok cxuz 2 ziv chuôz zis tsôngv box huyện Lục Yên (Yên Bái) vax tsêr. 4 cxênhz 300 yiv pas đêx tu zus njês; 2 cxênhz hecta poz cưk, blêx thiêz shôngz trâus ar poz lok cxuz uô puôk tsuôx; 3 tul qox, njưs thêir đêx thiêz iz cxiê ntu cêr nhoz Lâm Thượng cux trâus poz, đêx cuôr yôngz. Ntơưv xã Tân Phượng, cêr muk lok hâur xã Tân Phượng-Lâm Thượng cux trâus poz ntơưv jos Lũng Cọ, uô zaoz thôngz muk lok tsi tâu. Đrâuv iz cxiê xã sâuv thax tsav huyện Lục Yên li Minh Chuẩn, Trúc Lâu…cux muôx têx trâus ruôr hiêv tiv ntux nas. Trơưk li juôs xav, têx trâus đêx nas uô ruôr hiêv, puôk tsuôx muôx nhos 400 tsov đeiv ntâu./.                 

Trịnh Xuân-Txâur Vax cxeik nhênhv

Đhâu sir jos khưx phưx têx tsi jông tiv đêx nas uô ruôr hiêv, txox cêr lox 279 muk txix tỉnh Điện Biên trâu chor tỉnh tiêx đras tưz thoz huk tâu thôngz chiê yêz muk lol đhâu. Tsênhv tsênhz, lok nas lox txix thâuv hmo txos tas cik sơưr nzor hnuz 25/8, hâur thax tsav tỉnh Điện Biên tưz muôx tox xưz poz, cxuz tas ntâu txox cêr muk lol hâur thax tsav qơư. Ciês txox cêr lox 279 muk txix Điện Biên trâu chor tỉnh tiêx đras mak trâul xưz poz lok six lox. Txos zar hnuz kêix hâur hnuz co, têx qơư trâul xưz poz sâuv txox cêr lox 279 tưz thoz huk tâu thôngz, taz por cxuô luz yêz muk lol tâu đhâu. Nhiv no Công ty cxiv kho cêr ar 226 cux tsênhv sir jos tso lênhx nênhs, têx yêz thiêz meir, chuôz zênhx uz no nhoz trơưr ntơưv qơư zos thâuv tưs muôx yưv têx tsi jông mak zênhx max khưx phưx, cxiv kho têx ntu cêr trâul xưz poz, taz por yêz muk lol tâu thôngz sâuv txox cêr lox heik sâuv. Iz chas cêr muk lol trâul puôk tsuôx, đêx nas lox tsênhv uô tox xưz poz lok cxuz tsôngv pêx xênhv nhoz jok Xuân Món, xã Búng Lao, huyện Mường Ảng 9 luz tsêr; txox cêr muk txix jok Hua Ná trâu chor jok Mánh Đanh, Pá Liếng, Pú Cai, Pú Khớ, xã Ẳng Cang, huyện Mường Ảng trâul đêx nas uô puôk tsuôx, muk tsi tâu đhâu./.

Vũ Lợi-Riê Lâux cxeik, nhênhv