VOV4.Xơ Đăng - Hơnăm 2021 hiăng tơkâ luâ pơloăng mơnúa, xơpá xua pơreăng kân COVID-19 tâ tú. La ƀă tơdroăng mơ-eăm dêi Đảng, Chin phuh ƀă mâu kơvâ cheăng, kong pơlê, tơring, cheăm mê pin khoh hiăng hbrâ mơdât tơbrê ƀă rơkê tung tơdroăng pêi tơpéa tơdroăng; hên tơdroăng kal kí, rêh ối pơlê pơla po tung hơnăm nah. Mơgêi hơnăm 2021, Rơ’jiu xiâm Việt Nam hiăng rah 10 tơdroăng kal xiâm, tơdroăng ki hlo tơ-brê tung tơnêi têa hơnăm 2021.

1.Hneăng hôp kăn teăng mâ lâp tơnêi têa roh má XIII dêi Đảng châ tơƀrê ‘’cho lĕm ‘nâng’’.

Pôa Nguyễn Phú Trọng, Kăn xiâm pơkuâ hnê ngăn Đảng mơnhên: ‘’Hneăng hôp kăn teăng mâ lâp tơnêi têa roh má XIII dêi Đảng pin hiăng châ tơƀrê lĕm!’’. Hneăng hôp pơkâ 6 hnoăng cheăng xiâm ƀă 3 tơdroăng châ tơƀrê ton xŏn; pơkâ troăng prôk la ngiâ, pơkâ xiâm, hnoăng cheăng dêi kăch măng tơnêi têa pin tung 5 hơnăm la ngiâ, mê cho troh hơnăm 2025, Việt Nam cho kong têa dế mơnhông mơdêk, ai kơmăi kơmok tiô troăng rơxông nếo, tơkâ hluâ kơlo pêi lo liăn tơdâng iâ, pơkâ troăng prôk troh hơnăm 2030, leh tơbâ 100 hơnăm mơjiâng Đảng, tơnêi têa pin cho tơnêi têa dế mơnhông mơdêk, ai xúa kơmăi kơmok rơxông nếo, pêi lo liăn tơdâng hên ƀă tơmiât pêi troh hơnăm 2045, leh tơbâ 100 hơnăm mơjiâng tơnêi têa, Việt Nam chiâng tơnêi têa mơnhông mơdêk, pêi lo liăn hên.

Hneăng hôp mơnhên: ‘’Tơnêi têa hiăng châ mâu tơdroăng châ tơƀrê kân, ai kơnâ tơdroăng mơnhông mơdêk ó rơdêi, tŭm têk tâng pơchông ƀă mâu hơnăm hdrối pơ’lêh nếo. Tơnêi têa pin tá hâi la lâi ai tơdroăng cheăng mơnhông mơdêk, tơmeăm ki mơnhông mơdêk, hnoăng ƀă tơdroăng ki loi tơngah lâp plâi tơnêi môi tiah hâi kố’’.

Hneăng hôp kăn teăng mâ lâp tơnêi têa roh má XIII dêi Đảng châ tơƀrê ‘’cho lĕm ‘nâng’’

2.Rôh tâ phĭu pôk kăn Kuô̆k hô̆i hneăng má 15 ƀă kăn Hô̆i đong hnê ngăn kuăn pơlê rêm râ hneăng hơnăm 2021 – 2026 ƀlêi chiâng tung pơla ai pơreăng vêh xông tâ tú

Hâi lơ 23/05/2021, vâ chê 70 rơtuh ngế kuăn pơlê hiăng lăm tâ phĭu (châ 99,6% ngế kuăn pơlê lăm tâ phĭu) pôk kăn Kuô̆k hô̆i hneăng má 15 ƀă Hô̆i đong hnê ngăn kuăn pơlê rêm râ hneăng hơnăm 2021 – 2026, hên tâ kơxô̆ ngế lăm tâ phĭu tâng vâ pơchông ƀă rôh tâ phĭu hdrối.

Rôh tâ phĭu châ pêi pro tơniăn krê, tro luât, tơdâng tơ’mô, rak tơniăn, kơdĭng ƀă cho hâi mơdĭng kân dêi tâi tâng kuăn pơlê. Rôh tâ phĭu kố hiăng ‘măn chôu hên tơdroăng ki bâ eăng, hên tơdroăng ki ôh tá kâi piu “rôh apoăng” môi tiah: rôh apoăng tơkŭm po tâ phĭu ƀlêi chiâng, tơniăn tung pơla ai pơreăng COVID-19 vêh xông tâ tú; rôh apoăng sap nah tá hâi chói ai 76 hơnăm dêi Kuô̆k hô̆i ai péa ngế kăn teăng mâ dêi mâu hdroâng kuăn ngo iâ mơngế cho hdroâng kuăn ngo Lự ƀă hdroâng kuăn ngo Brâu veăng tung Kuô̆k hô̆i.

Rôh tâ phĭu pôk kăn Kuô̆k hô̆i hneăng má 15 ƀă kăn Hô̆i đong hnê ngăn kuăn pơlê rêm râ hneăng hơnăm 2021 – 2026 ƀlêi chiâng tung pơla ai pơreăng vêh xông tâ tú

3.Thăm pro ăm rĕng tâ tơdroăng tơpui kâ ƀă kong têa ê, mơdêk hnoăng lâp plâi tơnêi

Hơnăm 2021, mơhé pơreăng COVID-19 xuân xông tâ tú ó tung lâp plâi tơnêi, laga mâu tơdroăng tơpui kâ ƀă rêm pâ kong têa ƀă pơla péa pâ dêi Việt Nam xuân châ tơkŭm pêi pro đi đo. Ki má lối cho tơdroăng kal pôa Nguyễn Phú Trọng, Kăn xiâm pơkuâ hnê ngăn Đảng tơpui phôn ƀă Kăn xiâm pơkuâ mâu kong têa, tơdah hên khu râ kăn lâp plâi tơnêi; pôa Nguyễn Xuân Phúc, Kăn xiâm hnê ngăn tơnêi têa lăm pôu pêi cheăng kong têa Rusi, Cuba, Kul; pôa Phạm Minh Chính, Ngế pro xiâm hnê ngăn tơnêi têa lăm pôu kong têa Nhuk, veăng Hneăng hôp khu râ kăn xiâm ASEAN roh má 38, 39 ƀă mâu hneăng hôp khu râ kăn xiâm ki tơdjâk; veăng Hneăng hôp roh má 26 rêm pâ veăng Tơkêa dêi Khu lâp kong têa ‘na kong prâi hơ’lêh (COP26) ƀă trâm mâ pơla péa pâ ƀă kăn xiâm mâu kong têa, lăm pôu pêi cheăng a kong têa Ăng-glê, lăm pôu pêi cheăng a kong têa Pơhlăng; pôa Vương Đình Huệ lăm pôu pêi cheăng a châu Âu, Hàn Quốc, Ấn Độ ƀă hía hé.

Hơnăm 2021, hneăng hôp tơpui kâ ƀă kong têa ê lâp tơnêi têa pêi pro Pơkâ Hneăng hôp XIII dêi Đảng cho hneăng hôp lâp tơnêi têa apoăng xua Khu xiâm kal kí, Khu pơkuâ hnê ngăn cheăng Đảng ối hnê mơhno tơkŭm po tơpui tơno ‘na tơdroăng tơpui kâ ƀă kong têa ê dêi Đảng, tơpui kâ ƀă kong têa ê dêi Tơnêi têa, tơpui kâ ƀă kong têa ê dêi kuăn pơlê ƀă dêi tá khu cheăng kal kí.

Tung hơnăm 2021, Việt Nam pơtối pôu râng hnoăng cheăng rơtế hên hnoăng cheăng ki kal dêi lâp plâi tơnêi, cho Kăn xiâm hnê ngăn ki pơ’lêh dêi pó khế 4 ƀă Kăn cheăng tung khu hnê mơhno má môi Hô̆i đong grup kring vế khu lâp kong têa, châ rah xo ối tung Hô̆i đong pơkuâ Khu tơrŭm hnê hriâm, khoa hok ƀă mơhno túa lĕm tro Khu lâp kong têa UNESCO. Việt Nam hiăng hbrâ ƀă thăm veăng tung tơdroăng tơdjuôm dêi mâu khu tơrŭm cheăng lâp plâi tơnêi ki kân; veăng kum hên tung tơdroăng tơpui kâ, ti tăng troăng, tơxâng mâu tơdroăng ki tơmâng tơdjuôm dêi mâu kong têa lâp plâi tơnêi, châ mâu kong têa mơnhên păng ‘nâng, mơhno ivá ki rơkê ƀă hnoăng lâp plâi tơnêi rế hía rế hôm tâ dêi tơnêi têa pin.

Thăm pro ăm rĕng tâ tơdroăng tơpui kâ ƀă kong têa ê, mơdêk hnoăng lâp plâi tơnêi

4.Rôh hôp Mơhno túa lĕm tro lâp tơnêi têa pơxiâm ăm tơdroăng ki rơhêng vâ hdroâng kuăn ngo, mơdêk ki kơnía ‘na mơhno túa lĕm tro, ivá rơdêi kuăn mơngế Việt Nam

Klêi kơ’nâi 75 hơnăm, pơtó mâu tơdroăng ki lĕm tro sap ing péa Rôh hôp Mơhno túa lĕm tro lâp tơnêi têa hơnăm 1946, 1948, Rôh hôp Mơhno túa lĕm tro lâp tơnêi têa 2021 châ loi tơngah pơtối ivá xiâm “Mơhno túa lĕm tro mơhno troăng ăm kuăn pơlê lăm”, pơkâ tơdroăng mơhno túa lĕm tro kal môi tiah ƀă tơdroăng kal kí, cheăng kâ, rêh ối pơlê pơla. Rôh hôp Mơhno túa lĕm tro lâp tơnêi têa cho tơdroăng ki ăm tơnêi têa pin po troăng ăm môi chal mơnhông ki nếo, ƀă môi hiâm mơno tơmiât tơniăn krê dêi kuăn pơlê pin. Ing mê, mơ’no tối mâu troăng hơlâ luât pơkâ mơnhông tơdroăng mơhno túa lĕm tro Việt Nam rơkê plĕng, lĕm ‘na mơngiơk hdroâng kuăn ngo tung tơdroăng ki mơjiâng ƀă mơnhông tơnêi têa.

Tơpui hnê mơhno a rôh hôp, pôa Nguyễn Phú Trọng, kăn xiâm pơkuâ hnê ngăn cheăng Đảng rơhêng vâ, hnoăng cheăng mơhno túa lĕm tro kô ai môi rôh pơ’lêh ki nếo, rơdêi tâ nếo, tơƀrê tâ nếo, hdró môi tơdroăng ki nếo tung tơdroăng ki mơnhông mơdêk mơhno túa lĕm tro Việt Nam tung chal nếo.

Rôh hôp Mơhno túa lĕm tro lâp tơnêi têa pơxiâm ăm tơdroăng ki rơhêng vâ hdroâng kuăn ngo, mơdêk ki kơnía ‘na mơhno túa lĕm tro, ivá rơdêi kuăn mơngế Việt Nam

5.Pơreăng kân COVID-19 pro chiâng tơdjâk kân ó. Việt Nam pêi pro tơdroăng pâk vaccine kân má sap nah troh nôkố

Roh pơreăng COVID-19 má 4, ki hên cho pơreăng ki pro tơ-ê Delta dêi virus SARS-CoV-2, xông tâ tú ƀă kơlo xông tâ tú rĕng hiăng pro tơdjâk kân, tá ‘na châ dêi kuăn pơlê ƀă tơdroăng cheăng kâ – rêh ối pơlê pơla ăm mâu kong pơlê, pơlê kong kơdrâm tung lâp tơnêi têa, ki rơhêng vâ tối cho pơlê kong kân Hồ Chí Minh ƀă mâu kong pơlê peăng hdroh tơnêi têa. Vâ chê 30.000 ngế hlâ, 346.000 rơtal liăn tro lŭp ‘na cheăng kâ cho mâu tơdroăng ki tơdjâk kân ó xua pơreăng COVID-19 pro ăm tơnêi têa pin. Laga, kơnôm mâu troăng pêi kơtăng, tâi tâng ivá, troh nôkố, pơreăng COVID-19 mơhé ối xông tâ tú laga hiăng châ mơdât.

Chin phuh pơkâ mơjiâng kơxô̆ liăn vaccine hbrâ mơdât COVID-19. Môi tơdroăng pâk pơkeăng vaccine kân má môi sap nah troh nôkố a Việt Nam hiăng châ pôa Phạm Minh Chính, Ngế pro xiâm hnê ngăn tơnêi têa thế pêi pro. Rơtế amê cho troăng pêi ton xŏn ‘’Tơpui kâ ƀă kong têa ê ‘na vaccine’’ châ pêi pro rĕng, Việt Nam hiăng kêi đeăng pâk 2 trum vaccine ăm mơngế sap ing 18 hơnăm tơngi klêng, pêi kêi đeăng pâk trum má 1 ăm mơngế sap ing 12 – 18 hơnăm.

Môi tuăn pơkâ ‘’ngăn ivá, châ chăn dêi kuăn pơlê cho má môi, ahdrối’’, ing pơkuâ tơdrêng dêi Khu xiâm Đảng, Chin phuh, Ngế pro xiâm hnê ngăn Chin phuh, tơdroăng hbrâ mơdât pơreăng hiăng ai mâu pơkâ pơ’lêh troăng teăm tơdrêng vâ hbrâ mơdât ƀă pơreăng COVID-19, ing tơdroăng pêi ‘’ôh tá ai COVID’’ chiâng ‘’kâi trâng tơniăn, ƀeăn ƀĕng, mơdât châ tơƀrê pơreăng COVID-19’’, rế hbrâ mơdât pơreăng, rế rak tơniăn, mơnhông mơdêk cheăng kâ – rêh ối pơlê pơla tiô pơkâ 86 ƀă pơkâ 128 dêi Chin phuh. Hên troăng hơlâ kum rêh ối pơlê pơla ƀă kơxô̆ liăn mơ’no ăm mung chât rơpâu rơtal liăn hiăng châ pêi pro, kum mơngế pêi cheăng, mâu ngế ki ôh tá ai ivá, kuăn pơlê kơpong pơreăng tơkâ hluâ pá puât tung tơdroăng rêh ối.

Pơreăng kân COVID-19 pro chiâng tơdjâk kân ó. Việt Nam pêi pro tơdroăng pâk vaccine kân má sap nah troh nôkố

6.Tơkâ luâ pơreăng COVID-19, GDP xuân ối tâk. Hên tơdroăng ki rơkê, pro ivá ‘mâi mơnhông cheăng kâ tung hơnăm la ngiâ

Maluâ pơreăng kân COVID-19 tro tơdjâk ó la ƀă tơdroăng ki pơkâ kơtăng, rơkê dêi Chin phuh, tơdroăng ki môi hiâm mơno khŏm mơ-eăm dêi rêm râ, kơvâ cheăng, mâu kong pơlê ƀă kuăn pơlê, tiô tối tơbleăng GDP dêi tơnêi têa hơnăm 2021 xuân ối hlo tâk; nâp liăn Tơnêi têa hơnăm 2021 xuân ối rak tơniăn tơdroăng pơkâ ƀă tâk tâng vâ pơchông ƀă khế kố hơnăm 2020, kơxô̆ liăn tê mơdró pơla péa pâ ing tơdroăng ki tê tơmeăm ngi kong têa ƀă roê xo kế tơmeăm mot tung tơnêi têa ối a kơlo ki lối 600 rơtal dollars.

Khu mơdró kâ Việt Nam xuân hiăng xúa tro mâu rôh ki tơ’lêi hlâu sap ing tơdroăng tơkêa tê mơdró tơniăn krê, malối cho mâu tơdroăng tơkêa rơxông nếo, rế kum pro hên kế tơmeăm tê tung kơchơ, rế po rơdâ tơmeăm ki tê ngi kong têa cho ‘na mâu kế tơmeăm ki hiăng ai hlâu tê ngi mâu kong têa ki tơniăn, yă tê tơniăn. Hơnăm 2021 xuân hdró tơdroăng ki mơnhông mơdêk rơdêi dêi tê mơdró điê̆n tưh ƀă cheăng kâ kơxô̆.

Vâ pêi pro tơdroăng pơkâ mơdêk, tung hơnăm 2021, Việt Nam hiăng xúa ƀă pêi pro chía tơdâng tơ’mô mâu troăng hơlâ pơkâ ƀă ‘no liăn ngân xuân môi tiah mâu troăng hơlâ pơkâ kân ki ê. Kuô̆k hô̆i xuân hiăng pơkâ hên tơdroăng ‘na liăn ngân, ‘no liăn cheăng tơdjuôm, vêh pơkâ pêi mâu tơdroăng cheăng kâ. Chin phuh mơjiâng tơdroăng ki tâi tâng ‘mâi mơnhông cheăng kâ – rêh ối pơlê pơla tiô troăng pơkâ hmâ tơniăn ƀă rơkê; mơjiâng tơdroăng cheăng tung la ngiâ hbrâ mơdât pơreăng COVID-19.

Tơkâ luâ pơreăng COVID-19, GDP xuân ối tâk. Hên tơdroăng ki rơkê, pro ivá ‘mâi mơnhông cheăng kâ tung hơnăm la ngiâ

7.Tơdroăng mơjiâng, pơ’lêh tung Đảng pơtối châ thăm pêi pro tŭm têk, ai troăng prôk nếo. Hbrâ, mơdât kâ kơhveăm liăn ngân, tơdroăng ki pro ôh tá tro ‘’ôh tá tot, ôh tá pơtê’’

Hneăng hôp kân Đảng Tơnêi têa 4 hneăng XIII tơbleăng Mơgêi kơxô̆ 21-KL/TW tung mê hlối mơjiâng, pơ’lêh tung Đảng ƀă tơdroăng mơjiâng khu cheăng kal kí; tơ’nôm mâu tơdroăng ki mơhno tơdroăng tơmiât ôh tá tro kal kí, hiâm mơno, tơdroăng rêh ối. Khu xiâm kal kí môi tuăn tơ’nôm tơdroăng ‘’ki ôh tá lĕm tro’’,  pro tŭm tâi tâng Khu hnê mơhno Tơnêi têa ‘na hbrâ mơdât kâ kơhveăm liăn ngân chiâng Khu hnê mơhno Tơnêi têa ‘na hbrâ, mơdât kâ kơhveăm liăn ngân; tơdrêng amê pro ăm tŭm tâi tâng mơngế tung Khu hnê mơhno.

Khu xiâm pơkuâ Tơnêi têa, Khu xiâm kal kí hiăng tơbleăng 3 hlá mơ-éa ki kal tơdjâk troh tơdroăng mơjiâng pơ’lêh Đảng ƀă hên tơdroăng ki nếo má môi. Mê cho: Mơgêi 14 dêi Khu xiâm kal kí ‘na troăng pơkâ pêi mơhnhôk ƀă gâk kring kăn ƀô̆ ƀeăn ƀĕng kơhnâ, rơkê xua pơxúa ăm tơdjuôm; Pơkâ 37 dêi Khu xiâm tơnêi têa ‘na mâu tơdroăng Đảng viên ôh tá chiâng pêi pro; Pơkâ 41 Khu xiâm kal kí ‘na pơkâ thế pơtê hnoăng cheăng, pơtê cheăng ƀă kăn ƀô̆.

Tơdroăng tơplâ mơdât kâ kơhveăm liăn ngân, tơdroăng ki ôh tá lĕm tro pơtối châ khu râ kăn pơkuâ, hnê mơhno ƀă pêi pro kơtăng, ‘’ôh tá tot, ôh tá pơtê’’. Vi ƀan séa ngăn Tơnêi têa hiăng tơkŭm séa ngăn, pơxâu phâk ƀă pâ thế, pơkâ pơxâu phâk 12 khu cheăng Đảng ƀă 20 ngế đảng viên ối tung khu ngế teăng mâ Khu cheăng kal kí, Khu pơkuâ cheăng Đảng ki ai tơdjâk troh mâu roh tơdroăng xôi, roh tơdroăng Khu hnê mơhno séa ngăn, hnê mơhno (tung mê ai 3 uy viên, cho kăn cheăng tung Tíu xiâm Đảng, 2 ngế xiâm phŏ, 1 ngế kăn hnê ngăn kong pơlê, 1 ngế kăn phŏ pơkuâ hnê ngăn cheăng Đảng kong pơlê, 13 sih quan râ tươ̆ng tung khu lêng).

Tơdroăng mơjiâng, pơ’lêh tung Đảng pơtối châ thăm pêi pro tŭm têk, ai troăng prôk nếo. Hbrâ, mơdât kâ kơhveăm liăn ngân, tơdroăng ki pro ôh tá tro ‘’ôh tá tot, ôh tá pơtê’’

8.Pơsăm tối, pơkâ tơleăng kơtăng hên tơdroăng xôi ki kân, ki ó, ki ôh tá tơniăn

Maluâ tro tơdjâk kân ing pơreăng COVID-19, la mâu tơdroăng pro xôi ki kân, kâ kơluâ pơrá châ rêm râ hngêi tơleăng pơkâ tơleăng tung tơdroăng ki châ pơkâ tro tiô luât; pơxâu phâk kơtăng ƀă mâu ngế ki pơkuâ djâ, pro pơxúa ăm dêi tơná ing hnoăng cheăng, hnoăng pơkuâ vâ xo kế tơmeăm khoăng ki kân dêi Tơnêi têa. Hơnăm 2021, kơvâ Luât hiăng pơsăm tối nếo hên rôh ki pro xôi ki kân, ki ó, ôh tá tơniăn, môi tiah: Mâu rôh ki pro xôi tung kơvâ cheăng khăm pơlât.

Rôh ki pro xôi a mâu tíu pêi cheăng ối tung Khu xiâm pơkuâ ngăn kăn sat têa kơxĭ, Mố đô̆i gak tơkăng kong; mâu rôh pro xôi ‘na rak ngăn tơnêi tơníu, rak ngăn, xúa kế tơmeăm Tơnêi têa a kong pơlê Bình Dương, Khánh Hòa, Pơlê kong kân Hồ Chí Minh ƀă hên kong pơlê ki ê.

Pro pơxúa ăm dêi tơná ing tơdroăng pêi pro tơdrêng ‘na mâu rôh séa ngăn pơreăng a mâu kong pơlê tung lâp tơnêi, Kŏng ti Việt Á hiăng ăm hlo ai tơdroăng ki tơrŭm ƀă mâu khu tơrŭm, mâu ngế krê ki ai tơdjâk, pro xôi ó tung tơdroăng pơkâ mơjiâng pro, tơbriât tê bô̆ kit ki séa ngăn COVID-19 vâ pro pơxúa ăm dêi tơná.

Séa ngăn apoăng ăm hlo, Kŏng ti Tơlo liăn kŏng ngê̆ Việt Á hiăng tê mâu ƀô̆ kit ki séa ngăn ăm 62 to kong pơlê, pơlê kong kân, kơxô̆ liăn châ xo vâ chê 4 rơpâu rơtal liăn. Kơ koan séa ngăn hiăng pơsăm tối rôh ki pro xôi, pơsăm tối ngế ki pro xôi vâ pơtối séa ngăn, pêi pro nhên, laga, rôh ki pro xôi kố xuân pơkâ mơ’no hên tơdroăng kơ-êng ‘na hnoăng cheăng dêi rêm râ, mâu kơvâ cheăng ki ai tơdjâk tung tơdroăng séa ngăn, pơxâu phak mâu ngế pro xôi tung hbrâ mơdât pơreăng COVID-19.

Pơsăm tối, pơkâ tơleăng kơtăng hên tơdroăng xôi ki kân, ki ó, ki ôh tá tơniăn

9.Troăng rơxế lơtreng tíu kơdrâm kuăn pơlê rêh ối Cát Linh – Hà Đông hiăng ăm rơxế lơtreng kơtâu klêi hên xôh ôh tá lĭng. Hên tơdroăng hriâm ‘’ki kơnâ’’ châ xo vế ing tơmeăm chât hơnăm kố

Klêi kơ’nâi 10 hơnăm, 4 xôh ôh tá lĭng, hâi lơ 5/11/2021, troăng rơxế lơtreng kơpong kơdrâm kuăn pơlê rêh ối Cát Linh – Hà Đông – troăng rơxế lơtreng kơpong kơdrâm kuăn pơlê rêh ối mơnúa apoăng dêi Hà Nội ƀă lâp tơnêi têa – hiăng ăm rơxế kơtâu, pơto tơmối tơmeăm khoăng.

Ing kơlo mơ’no liăn apoăng lối 8.770 rơtal liăn, troăng rơxế lơtreng tro ‘’tối mơdêk’’ tâk lối 18.002 rơtal liăn. Tiô tơdroăng mơjiâng pro troăng rơxế lơtreng apoăng châ mơnhên ăm rơxế kơtâu pơto tơmối tơmeăm khoăng sap khế 6/2015, klêi kơ’nâi hên xôh ton tơrôu hâi khế, troh apoăng khế 11/2021, troăng rơxế lơtreng Cát Linh – Hà Đông nếo châ ăm xúa kơnôm tơdroăng hnê mơhno kơtăng ƀă khŏm mơ-eăm dêi Chin phuh hneăng nếo.

Khu xiâm pơkuâ troăng kân, Vi ƀan pơlê kong kân Hà Nội hiăng tơdah hnoăng cheăng, tối xiâm kối, xo vêh túa ki rơkê tơtro chiâng pro hrá tơdroăng mơjiâng pro, tối mơdêk kơxô̆ liăn, tung mê ki hên cho mâu tơdroăng tơdjâk troh pơkâ dêi luât ‘na mơ’no liăn mơjiâng tơmeăm khoăng ƀă tăng tơnêi vâ pro troăng.

Troăng rơxế lơtreng tíu kơdrâm kuăn pơlê rêh ối Cát Linh – Hà Đông hiăng ăm rơxế lơtreng kơtâu klêi hên xôh ôh tá lĭng. Hên tơdroăng hriâm ‘’ki kơnâ’’ châ xo vế ing tơmeăm chât hơnăm kố

10. Rôh apoăng sap nah tá hâi chói ai, khu tơ’noăng kơtu ƀa long Việt Nam châ mot tung rôh tơ’noăng tâng thu ôh tá châ kơtu xếo má 3 World Cup 2022 kơpong châu Á

Hơnăm 2021, khu tơ’noăng kơtu bâ long Việt Nam rôh apoăng châ mot tung rôh tơ’noăng tâng thu ôh tá châ kơtu xếo rôh má mơ’nui World Cup kơpong châu Á. Kố cho ôh ti xê to tơdroăng ki tơmâng xo ‘na tơdroăng ki kơhnâ mê ối hdró tơdroăng ki tơkâ luâ ‘na ivá ƀă hiâm mơno dêi môi tơdroăng kơtu ƀâ long. Tơdroăng ki châ hriâm pât ƀă mâu khu ki kơtu ƀâ long xiâm lâp kơpong kum mâu ngế tơ’noăng, tơdrêng amê hlối pro ivá vâ mâu ngế ki tơ’noăng Việt Nam loi tơngah a dêi tơná tâ drêng mot tung mâu rôh tơ’noăng kân a xo ah hmôi.

Kơtú ƀa long Việt Nam hiăng ai môi hvêa chêng prôk ki xŏn vâ châ mot tơ’noăng World Cup maluâ tơdroăng ki vâ châ mot mê dế cho tơdroăng ki pá.

Rôh apoăng sap nah tá hâi chói ai, khu tơ’noăng kơtu ƀa long Việt Nam châ mot tung rôh tơ’noăng tâng thu ôh tá châ kơtu xếo má 3 World Cup 2022 kơpong châu Á

A Sa Ly - Katarina Nga tơplôu ƀă tơbleăng