VOV4.Sêdang - Kơxo lơ 20/8, Khu pơkuâ Vi ƀan Măt trâ̆n Tơnêi têa Việt Nam Pơlê kong kân Hồ Chí Minh hiăng tơkŭm po rôh tơdah xo kơmăi ECMO kơnâ 145 rơpâu dollars, Khu xiâm teăng mâ Ấn Độ ƀă mâu kuăn pơlê Ấn Độ a kơpong peăng Hdroh diâp ăm Hngêi pơkeăng Bệnh Nhiệt đới Pơlê kong kân Hồ Chí Minh. Jâ Tô Thị Bích Châu, kăn hnê ngăn Vi ƀan Măt trâ̆n Tơnêi têa Việt Nam Pơlê kong kân tối, ƀă mâu tơdroăng ki xơpá ƀă sĭng khéa ki kuăn pơlê Ấn Độ hiăng tơkâ luâ xua pơreăng COVID-19 rôh má 2; tơdrêng amê hnối mơnhên tối khât tơdroăng ki ƀlêi trâng dêi Chin phuh ƀă kuăn pơlê Ấn Độ tung tơdroăng ki hbrâ mơdât pơreăng COVID-19.

Maluâ ối trâm hên xơpá, la Chin phuh Ấn Độ hiăng pơkâ tŏng kum ăm Chin phuh ƀă kuăn pơlê Việt Nam dế trâm ƀă mâu tơdroăng ki xua ôh tá tơniăn dêi pơreăng, cho môi tơdroăng cheăng pêi pro ai pơxúa. Kăn xiâm teăng mâ Ấn Độ a Pơlê kong kân Hồ Chí Minh, pôa Madan Mohan Sethi ăm ‘nâi, tiô tối hdrối hâi lơ 30/8 la ngiâ kố ah, tuk Ấn Độ kô troh a Pơlê kong kân Hồ Chí Minh, chơ 300 toăng kơmăi hyôh oxy ƀă 100 tâ̆n oxy pơkeăng ki kơƀêl xua Chin phuh Ấn Độ tŏng kum ăm Việt Nam.

Katarina Nga tơplôu ƀă tơbleăng