VOV4.Sêdang - Kơxo lơ 20/8, a kơpong tơbâ pôa Tôn Đức Thắng, Kăn xiâm hnê ngăn tơnêi têa hneăng hdrối nah, cheăm Mỹ Hòa Hưng, pơlê kong kơdrâm Long Xuyên, kong pơlê An Giang, Khu kăn pơkuâ hnê ngăn Đảng, Hô̆i đong kuăn pơlê, Vi ƀan kuăn pơlê, Vi ƀan Măt trâ̆n Tơnêi têa Việt Nam kong pơlê An Giang hiăng tơkŭm pleăng hơvĭng reăng, chôu nhâng klăng tơbâ 133 hơnăm hâi kot mâ pôa Tôn Đức Thắng, Kăn xiâm hnê ngăn tơnêi têa hneăng hdrối nah lơ 20/8.

Kăn pơkuâ hnê ngăn Đảng kong pơlê An Giang pleăng hơvĭng reăng koh tơbâ pôa Tôn Đức Thắng 

Leh tơbâ 133 hơnăm Hâi kot mâ pôa Tôn Đức Thắng hơnăm kố tơkŭm po tung pơla lâp tơnêi têa tối tơdjuôm, kong pơlê An Giang tối krê dế mơ-eăm hbrâ mơdât pơreăng COVID-19, xua mê mâu tơdroăng po leh châ tơkŭm po iâ tê, laga krip tơngăm; kăn teăng mâ veăng roh a leh pêi pro kơtăng mâu pơkâ hbrâ mơdât pơreăng.

Phiu ro ‘na tơdroăng cheăng ƀă hiâm mơno kăch măng dêi pôa Tôn Đức Thắng, Đảng ƀô̆ ƀă kuăn pơlê An Giang rŭm môi tuăn hiâm mơno, mơ-eăm hriâm tâp, pêi cheăng, đi đo mơ-eăm, mơnhông tơdroăng pêi rơkê, tơmiât pêi rơkê, mơnhông mâu tơmeăm khoăng ki ai hlâu vâ mơjiâng kong pơlê An Giang đi đo mơnhông tơtêk, tơxâng cho pơlê xiâm dêi pôa Tôn Đức Thắng, Kăn xiâm hnê ngăn tơnêi têa hneăng hdrối.

A Sa Ly tơplôu ƀă tơbleăng