VOV4.Sêdang - Vâ veăng kum ăm kuăn pơlê ki trâm xahpá xua tro tơdjâk ing pơreăng COVID-19, mê Khu ngăn ‘na mơdró kâ rơxông nếo kong pơlê Dak Nông hiăng tơkŭm po “ATM xơrô liăn” vâ xing xoăng phái tê kơtê ăm kuăn pơlê. Mâu ATM kố dế pơtối châ po rơdâ troh a mâu tơring, cheăm ki ai kuăn pơlê troh tâ pơreăng COVID-19 tung kong pơlê kố.

Nếo xo klêi 3 kilô phái ing ‘’ATM phái 0 liăn’’, jâ Trần Thị An, ối a bêng Nghĩa Tân, pơlê kong kơdrâm Gia Nghĩa, kong pơlê Dak Nông tối ăm ‘nâi,  pơlê xiâm jâ cho a Cần Thơ. Tơdroăng rêh ối dêi jâ cho pá puât, mê a Cần Thơ nôkố xuân dế ai pơreăng xông tâ tú, ôh tá chiâng vâ tŏng kum. Hâi kố tâng tối ai xing xoăng phái tê kơtê xua mê jâ troh vâ tơdah.

‘’Á ing pơlê ki ê troh a kố mung hngêi ối klêi mê lăm tôm meăm, chhá, mê to lâi hâi kố pơreăng xông tâ tú ôh tá chiâng vâ lăm tôm. Kơnôm mâu tăm ăm phái kâ xuân châ to lâi hâi, a mơnê hên ‘nâng’’.

ATM phái 0 liăn xua Khu tê mơdró hơnăm ối nếo kong pơlê Dak Nông tơkŭm po tŏng kum kuăn pơlê pá puât

Môi tiah mê há, nâ H’Nhung, ối a ƀon Dak Nur, bêng Nghĩa Đức, pơlê kong kơdrâm Gia Nghĩa tối ăm ‘nâi, rơpŏng nâ ai 8 ngế. Xua tơdjâk dêi pơreăng xua mê mâu ngế tung rơpŏng ôh tá chiâng vâ pêi cheăng tơ’nôm. Pakĭng mê, mâu plâi kâ môi tiah plâi ƀơr, plâi sầu riêng ôh tá châ tê pro tơdroăng rêh ối trâm hên pá puât. Xua mê, mơhé bu 3 kilô phái ing ‘’ATM phái 0 liăn’’ xuân pro nâ hơtô tung hiâm mơno:

‘’Rơpŏng ki hên pêi chiâk deăng xua mê mâu tơmeăm pêi lo ing chiâk deăng ƀă mâu tơmeăm ki ê tro chu rơpâ yă pro ăm tơdroăng rêh ối rêm hâi trâm hên pá puât. Kơnôm Đảng, Tơnêi têa, mâu khu râ tơmâng tŏng kum pêi pro ‘’ATM phái 0 liăn’’ mê kum tung tơdroăng kâ hmê rêm hâi, kơdroh pá puât tô tuăn rêm hâi lăm pêi cheăng vâ rôe phái, kuăn pơlê phiu ro ƀă sôk suâ’’.

Rêm ngế đi đo pêi tiô mâu troăng hbrâ mơdât pơreăng COVID-19 drêng troh tơdah phái

Ƀă troăng pêi kơbố ai troh ăm, kơbố pá troh xo ‘’ATM phái 0 liăn’’ xua Khu tê mơdró hơnăm ối nếo kong pơlê Dak Nông tơkŭm po klêi kơ’nâi 4 hâi hiăng xing xoăng châ lối 6 tâ̆n phái ăm lối 2.000 roh ngế kuăn pơlê ai tơdroăng rêh ối pá puât a pơlê kong kơdrâm Gia Nghĩa. Tiô ngoh Nguyễn Ngọc Chính, Kăn hnê ngăn Khu tê mơdró hơnăm ối nếo kong pơlê Dak Nông pakĭng xing xoăng phái a pơlê kong kơdrâm Gia Nghĩa, ATM phái 0 liăn kô tơkŭm po xing xoăng phái tê kơtê ăm kuăn pơlê pá puât a mâu tơring Dak Rlâp, Tuy Đức ƀă Dak Glong.

‘’Vi ƀan khu râ hiăng mơhnhôk veăng tơlo châ 30 tâ̆n phái kơnâ 450 rơtuh liăn vâ xing xoăng ăm 4 tíu kum ăm vâi krâ pá puât tơniăn tơdroăng rêh ối tung rơnó pơreăng. Pakĭng 30 tâ̆n kố tiô xêo tơkâ hluâ tiô tối hdrối apoăng ngin kô mơhnhôk tơ’nôm 30 tâ̆n phái nếo ƀă tâi tâng cho 60 tâ̆n vâ xing xoăng ăm kuăn pơlê mâu pơlê’’.

Tuấn Anh chêh

A Sa Ly tơplôu ƀă tơbleăng