VOV4.Sêdang - Tung pơla Việt Nam dế trâm ƀă pơreăng COVID-19 tâ tú a hên kong pơlê, kong măng lơ 26/8, Australia nếo tơbleăng tung măng tĭng kố kô pơtroh ăm Việt Nam rôh vaccine ki apoăng ai 400 rơpâu klŏng vaccine tung tâi tâng kơxô̆ vaccine ki kong têa kố hiăng tơhrâ kum ăm Việt Nam. Kơxô̆ vaccine kố ối tung tung tâi tâng kơxô̆ 1,5 rơtuh klŏng vaccine AstraZeneca ki Australia hiăng tơhrâ kum ăm Việt Nam tung hơnăm kố. Kơxô̆ vaccine kố châ Australia tơhrâ kum ăm Việt Nam pakĭng kơxô̆ liăn kum 40 rơtuh AUD vâ rơtế ƀă UNICEF kum Việt Nam hbrâ mơdât ƀă COVID-19.

Pakĭng mê, Astralia xuân tŏng kum Việt Nam hbrâ mơdât pơreăng COVID-19 ing kơxô̆ liăn kum kơnâ 130 rơtuh AUD tung tơdroăng COVAX kum ăm mâu kong têa ki dế mơnhông tơtêk châ xúa vaccine tiô túa ki tơdâng tơ’mô.

Katarina Nga tơplôu ƀă tơbleăng