VOV4.Sêdang - Hâi lơ 28/7, sap 18h troh 5h kơxo má hâi kơ’nâi, kuăn pơlê Bình Dương ôh tá lo drô troăng kân vâ hbrâ mơdât pơreăng, tâng lơ ai tơdroăng vâ pơlât, tơdroăng cheăng tơnêi têa, lơ tiô pơkâ xing xoăng hnoăng cheăng hbrâ, mơdât pơreăng COVID 19. Mê cho hnê mơhno dêi Khu râ kăn pơkuâ kong pơlê Bình Dương tung pơla pơreăng COVID 19 dế xông tâ tú ó. Nôkố, Bình Dương cho môi tung mâu kong pơlê, pơlê kong kơdrâm ai ngế tro tâ COVID 19 tâk rĕng ƀă lối 8.900 ngế, tung mê, hên má môi châ hlo ngế tro tâ pơreăng tung pơlê pơla.

Kong pơlê dế pêi pro klâ kơtăn pơlê pơla tiô Pơkâ 16 dêi Ngế pro xiâm hnê ngăn Chin phuh. Laga, klêi kơ’nâi mơnhên dêi mâu khu râ kăn pêi cheăng Tơnêi têa ƀă Khu xiâm ngăn pơkeăng ƀă khăm pơlât, kuăn pơlê Bình Dương xuân ôh tá bê tơmâng, tơngôu tung tơdroăng hbrâ mơdât pơreăng ƀă kơxô̆ mơngế lo troăng kân xuân ối kơdrâm, ki má lối cho a tíu xiâm mâu tơring, pơlê kong krâm, pơlê kong kơdrâm. Kơdroh tơdroăng tơ’lêi tâ tú pơreăng, mâu tơring tung kong pơlê hiăng pro hên tíu gâk séa ngăn mơngế ƀă rơxế kơtâu; tơdrêng amê séa ngăn, pơxâu phâk hên ngế pro xôi Pơkâ kơxô̆ 16.

A Sa Ly tơplôu ƀă tơbleăng