VOV4.Sêdang - Kơxo lơ 11/8hiăng po hneăng hôp apoăng dêi Chin phuh hneăng hơnăm 2021-2026 tơbleăng pêi tiô pơkâ hneăng hôp má 13 dêi Đảng ƀă pơkâ dêi Kuô̆k hô̆i hneăng 15 ‘na mơnhông cheăng kâ - rêh ối 5 hơnăm 2021-2025. Hneăng hôp châ tơkŭm po tiô tơdroăng mơ’no tung um ing hyôh internet  ƀă mâu kong pơlê tung lâp tơnêi têa, xua pôa Phạm Minh Chính, Ngế pro xiâm hnê ngăn Chin phuh pơkuâ.

Tối tơbleăng pơxiâm hôp, pôa Phạm Minh Chính tối nhên, Chin phuh hneăng 15 xo pêi hnoăng cheăng tung tơdroăng lâp plâi tơnêi ƀă tung tơnêitêa ai mâu rôh tơ’lêi, hlâu ƀă xơpá, pơloăng ƀă mơnúa, malối tơdroăng pơreăng COVID-19 ƀă dế chiâng pơreăng Delta dế tâ tú rơ-iô, pá vâ ‘nâi hdrối tung lâp plâi tơnêi ƀă Việt Nam, mơnhâu ivá kuăn pơlê ƀă hlối tơdjâk ó troh tŭm tơdroăng cheăng kâ - rêh ối dêi tơnêi têa.

Ƀă veăng dêi kăn xiâm pơkuâ hnê ngăn Đảng ƀă ai tŭm mâu vâi pú mâu kăn Đảng, Tơnêi têa, Chin phuh hneăng 15 hôp tâi tâng apoăng, xuân môi tiah hneăng hôp ton nah, ƀă tơdroăng ki mơ-eăm mơjiâng Chin phuh pơ’lêh nếo, pêi cheăng tơdrăng lĕm, pêi tơ-ƀrê, xua kuăn pơlê. Hneăng hôp tơkŭm tơpui môi tuăn mâu tơdroăng ki kal, malối tung mâu pơkâ dêi tơnêi têa tung 5 hơnăm la ngiâ.