VOV4.Sêdang - Kơxê lơ 11/8, ing pơkuâ dêi pôa Phạm Minh Chính, Ngế pro xiâm hnê ngăn tơnêi têa, Chin phuh hiăng hôp ‘na tơdroăng hbrâ mơdât COVID 19; tơdroăng mơnhông cheăng kâ – rêh ối pơlê pơla khế 7 ƀă 7 khế hơnăm 2021; mâu hnoăng cheăng, túa pêi ki xiâm tah lôi mâu tơdroăng pá puât, mơnhông mơdêk cheăng kâ – rêh ối pơlê pơla mâu khế mơ’nui hơnăm 2021 tiô troăng mơ’no tung um tiô troăng măng internet pơla a xiâm cho Chin phuh ƀă mâu kong pơlê tung lâp tơnêi têa.

Tiô Ngế pro xiâm hnê ngăn tơnêi têa, kố cho hnoăng ki kal pơla péa pâ ƀă ai tơrŭm krá tơniăn, achê dêi pó. Tiô hnê mơhno dêi Ngế pro xiâm hnê ngăn tơnêi têa, khu râ kăn pơkuâ mâu kong pơlê, pơlê kong kơdrâm ƀă mâu khu râ kăn Chin phuh tơkŭm tối mâu tơdroăng châ tơƀrê, mâu tơdroăng ki hôm ƀă mâu tơdroăng ki tá hâi châ tơƀrê tung pêi pro mâu hnoăng cheăng tung pơla kố nah; xo vế mâu tơdroăng ki rơkê, ki má lối tung hbrâ mơdât COVID 19 ƀă mơnhông pêi kâ, tê mơdró; tối hdrối tơdroăng, ki rơhêng vâ tối cho mâu tơdroăng pá puât, tơ’lêi hlâu, pơloăng mơnúa; tơpui ‘na troăng hơlâ pêi la ngiâ, hnoăng cheăng, tuá pêi pro mâu khế mơ’nui hơnăm 2021.

A Sa Ly tơplôu ƀă tơbleăng