VOV4.Sêdang - Tiô Pơkâ dêi Chin phuh, Pơlê kong kân Hồ Chí Minh mơ-eăm mơdât pơreăng hdrối hâi lơ 15/9/2021. Mâu kong pơlê: Bình Dương, Long An, Đồng Nai mơ-eăm mơdât pơreăng hdrối hâi lơ 1/9/2021. Mâu kong pơlê, pơlê kong kơdrâm ki ê mơ-eăm mơdât pơreăng hdrối hâi lơ 25/8/2021. Vâ pơtối tơkŭm mơdât, troh tah pơreăng, la ngiâ mơdât tơtro pơreăng COVID 19, ôh tá ăm ai tơdroăng ôh tá tơniăn tung khăm pơlât, cheăng kâ – rêh ối pơlê pơla.

Chin phuh môi tuăn tơbleăng Pơkâ kơxô̆ 86/NQ-CP ‘na mâu troăng hbrâ mơdât pơreăng COVID 19. Pơkâ tối nhên mâu troăng pêi ki thâ kal pêi pro. Ki nhên: Pêi pro mâu troăng hbrâ mơdât pơreăng, ki rơhêng vâ tối cho pêi pro klâ kơtăn pơlê pơla thế châ pêi pro khât, kơtăng, ó rơdêi, kơtăng ‘nâng, krá tơniăn; đi đo mơhnhôk, séa ngăn mâu tơdroăng pêi, mâu troăng hbrâ mơdât vâ hbrâ rơnáu teăm tơdrêng rĕng drêng pơreăng xông tâ tú ó.

Tâi tâng mâu kong pơlê hnê mơhno pêi pro kơtăng troăng ‘’prôk rêm kơtâu, tơgôu rêm toăng hngêi, séa ngăn rêm toăng hngêi’’, châ hlo, khăm ngăn ƀă ăm klâ kơtăn tơdrêng mơngế lo ing kơpong ai pơreăng lơ troh ing kong pơlê ki ê tiô pơkâ dêi kong pơlê; Pơxâu phâk kơtăng mâu ngế pro xôi, tá pơxâu phâk xôi kân tiô pơkâ dêi luât ƀă mâu ngế ki ôh tá pêi tiô pơkâ, mơdât, tơtrâ tơdroăng pêi pro mâu pơkâ, troăng hbrâ mơdât pơreăng dêi kơ koan ai hnoăng cheăng.

A Sa Ly tơplôu ƀă tơbleăng