VOV4.Sêdang -Pôa Nguyễn Xuân Phúc, kăn xiâm hnê ngăn tơnêi têa hiăng ai rôh tơpui phôn ƀă pôa Miguel Díaz-Canel, kăn pơkuâ ngăn Đảng má môi Khu pơkuâ ngăn Tíu xiâm Đảng Kŏng san Cuba, kăn hnê ngăn tơnêi têa Cuba, tơpui ‘na túa pơkâ, troăng hơlâ pơtối mơdêk tơrŭm cheăng nhŏng o tiô khôi hmâ ki tơviah pơla péa Đảng, Tơnêi têa ƀă kuăn pơlê péa tơnêi têa. Pôa Nguyễn Xuân Phúc tối, phiu ro rôh apoăng tơpui phôn ƀă pôa Miguel Díaz-Canel tung hnoăng cheăng nếo; mơnhên tối tơrŭm cheăng pơla péa tơnêi têa pơtối mơnhông mơdêk rơdêi maluâ ai pơreăng kâ tâ tú.

Péa ngế kăn xiâm pơkuâ hiăng tối nhên tơdroăng tơrŭm ôh tá la lâi hơ’lêh pơla Việt Nam ƀă Cuba, hiâm mơno hbrâ rơnáu tŏng kum dêi rơpó tung mâu tơdroăng ki lâi, môi tuăn mơdêk tơrŭm a tá péa tơnêi têa. Pôa Miguel Díaz-Canel tối nhên, Cuba ngăn nhuô̆m tơrŭm cheăng vaccine ƀă Việt Nam, mơ-eăm sap ing nôkố troh mơ’nui hơnăm 2021 kum hên vaccine Andala hbrâ mơdât COVID-19 dêi Cuba ƀă hbrâ rơnáu pơtroh khu ki rơkê plĕng troh hnê tối kơmăi kơmok mơjiâng pro vaccine ăm Việt Nam.

Katarina Nga tơplôu ƀă tơbleăng