VOV4.Sêdang - Tiô Khu hnê mơhno cheăng, hbrâ mơdât pơreăng COVID-19 kong pơlê Dak Lak, tung hâi lơ 10/8, lâp kong pơlê ai tơ’nôm 36 ngế yương tĭnh ƀă SARS –CoV-2 a 2 6 tơring ƀă pơlê kong kơdrâm Ƀuôn Ma Thuột. Ki rơhêng vâ tối, a thôn 7 cheăm Vụ Bổn, tơring Krông Pač nếo ai môi tíu ki ai pơreăng ki hên, ƀă 17 ngế F0 ôh tá ‘nâi xiâm kối tâ tú. Nôkố, thôn kố hiăng châ mơdât mot lo. Kơvâ ngăn pơkeăng ƀă khăm pơlât kong pơlê Dak Lak hiăng tí tăng châ ‘nâi lối hrĭng ngế F1.

Ai mâu tíu cheăng hbru tơmeăm ƀă kế kâ ăm khu ki pêi dêi hnoăng cheăng a mâu tíu séa ngăn pơreăng COVID-19 dêi cheăm Vụ Bổn

Vâ rak tơniăn tơdroăng ki pế pơchên hmê kơchâi ăm kuăn pơlê tung kơpong klâ ối krê, cheăm Vụ Bổn hiăng mơjiâng môi tôh ki tŏng kum ƀă tơbleăng kơxô̆ phôn dêi tôh tŏng kum ăm kuăn pơlê vâ tơpui, khĕn drêng kal. Rơtế amê cheăm xuân hiăng pơkâ thế mâu kơthô chêh inâi mâu rơpŏng kơtiê, rơpŏng xơpá kơklêa tung pơla klâ ối krê vâ ai túa pơkâ tŏng kum tơdrêng.

Hnoăng cheăng tí tăng pâk xo mơheăm test rĕng châ cheăm tơbleăng kơhnâ

Hnoăng cheăng séa ngăn, tí tăng mâu ngế ki ai tơdjâk vâ vê hdró kơpong, hbrâ mơdât pơreăng xuân dế châ cheăm pêi pro tơbleăng kơhnâ. Riân troh hâi dế lơ 10/8, kong pơlê Dak Lak hiăng ai 446 ngế yương tĭnh ƀă SARS –CoV -2, tung mê dế pơlât 415 ngế, 30 ngế hiăng pơlât prêi ƀă 1 ngế hlâ.

Katarina Nga tơplôu ƀă tơbleăng