VOV4.Sêdang - Pêi pro hnê mơhno dêi Grup pơkuâ on tơhrrik Việt Nam dó inâi EVN, tung péa khế 7 – 8/2021, Kŏng ti on tơhrik Dak Lak pêi pro kơdroh liăn on tơhrik ăm vâ chê 150 rơpâu ngế kuăn pơlê a tơring Čư Kuin ƀă pơlê kong kơdrâm Ƀuôn Ma Thuột, mâu pơlê thế klâ kơtăn pơlê pơla tiô Pơkâ 16 dêi Chin phuh vâ hbrâ mơdât pơreăng COVID 19.

Dak Lak: 150 rơpâu ngế kuăn pơlê ăm klâ ối kơtăn pơlê pơla tiô pơkâ 16 châ kơdroh 12,5 rơtal liăn on tơhrik

Tung roh 4, Kŏng ti on tơhrik Dak Lak tŏng kum lối 12,5 rơtal liăn pêi pro kơdroh yă on tơhrik, kơdroh liăn on tơhrik ăm kuăn pơlê. Pơtối mê kơlo ki nhên mê cho: Kơdroh 15% liăn on tơhrik (hdrối hnoăng mơhá VAT) tung mơ-éa liăn on tơhrik ăm kuăn pơlê xúa troh 200kWh/khế; kơdroh 10% liăn on tơhrik (hdrối hnoăng mơhá VAT) a mơ-éa liăn on tơhrik ăm kuăn pơlê xúa lối 200kWh/khế.

Pôa Hà Văn Chương – Kăn phŏ pơkuâ Kŏng ti on tơhrik Dak Lak tối ăm ‘nâi, pêi pro klâ kơtăn pơlê pơla hbrâ mơdât pơreăng COVID 19 tiô pơkâ 16 dêi Ngế pro xiâm hnê ngăn Chin phuh, rêm ngế thế ối a hngêi xua mê tơdroăng xúa on tơhrik tâk hên.

Tơdroăng kơdroh liăn on tơhrik ăm kuăn pơlê cho tơdroăng ki kal tung pơla pơreăng xông tâ tú ó. Khu pơkuâ on tơhrik thâ tơrŭm ƀă kơ koan cheăng chêh inâi kuăn pơlê vâ tŏng kum kơdroh liăn on tơhrik tiô pơkâ.

A Sa Ly tơplôu ƀă tơbleăng