VOV4.Sêdang - Xêo troh 16h hâi lơ 29/7, kong pơlê Dak Lak châ hlo tơ’nôm 7 ngế nếo tro tâ COVHID 19 mơdêk kơxô̆ ngế tro tâ pơreăng lâp kong pơlê tâk 185 ngế. Kong pơlê xuân pơtối châ hlo hên ngế ing kơpong ai pơreăng mâu kong pơlê peăng Hdroh tơnêi têa vêh a pơlê ƀă tơdroăng séa ngăn châ pơkâ krá tơniăn tâ.

Tiô tơdroăng ing Khu hnê mơhno hbrâ mơdât COVID 19 kong pơlê Dak Lak, 7 ngế nếo tro tâ châ hlo a 4 tơring mê cho: Tơring Čư Mgar 3 ngế, tơring Krông Bông 2 ngế; tơring Krông Pač 1 ngế ƀă pơlê kong kơdrâm Ƀuôn Ma Thuột 1 ngế. Tung kơxô̆ ngế nếo tro tâ, bu ai môi ngế châ hlo tung kơpong klâ kơtăn, tâ tú ing mơngế tro tâ pơreăng hiăng châ hlo hdrối mê. Ki ê, pơrá ai tâ pơreăng drêng vêh ing kong pơlê Bình Dương.

Kong pơlê Dak Lak tung mâu hâi achê kố xuân pơtối châ hlo hên ngế ing Pơlê kong kân Hồ Chí Minh, Bình Dương ƀă mâu kong pơlê peăng Hdroh  tơnêi têa vêh. Hên ngế châ hlo tro tâ pơreăng ing kơpong pơreăng kố ƀă kong pơlê dế tơkŭm séa ngăn krá tơniăn tâ ƀă kŏng ngê̆ thông tin ƀă mơngế vêh ing kơpong ai pơreăng.

A Sa Ly tơplôu ƀă tơbleăng