VOV4.Sêdang - Môi tuăn rơkong kơbông krếo dêi mâu khu râ kăn pơkuâ Đoân droh rơtăm tung kong pơlê, hên đoân viên droh rơtăm a Dak Lak hiăng chêh mơ-éa pâ veăng pleăng hnoăng cheăng tŏng kum hbrâ mơdât COVID 19. Ôh tá tô tuăn pá puât, tơvâ tơvân, mâu ngế pleăng hnoăng cheăng dế kum tung mâu tơdroăng pêi cheăng a mâu kơpong klâ kơtăn tơkŭm, tơdroăng lo lăm tŏng kum dêi ƀok thái pơkeăng ƀă mâu khu pêi cheăng ki ê vâ tơdjuôm ivá troh tah pơreăng.

Vâ chê 2 măng tĭng pêi tơdroăng pleăng hnoăng tơná a kơpong klâ krê tơchoâm dêi Hngêi pơkeăng tơring Krông Pač, nâ Phan Ngọc Bảo Nhi, ối a cheăm Hòa An, tơring Krông Pač, kong pơlê Dak Lak hiăng hmâ ƀă tơdroăng xâp ếo kring vế pâng klup xi mơhế kong tô lơ kong mêi. Cho ƀok thái pơkeăng hiăng klêi hriâm nếo lo ing hngêi trung mê nâ châ vâi xoăng lăm veăng khăm ƀă xo ngăn mơheăm, têa môh, têa hế dêi mâu ngế nếo prếo vêh ing mâu kơpong tâ pơreăng.   

Tơpui ing phôn râng kŏng, Phan Ngọc Bảo Nhi tối, hlo pơreăng tâ tú a Dak Lak rơ-iô, kơxô̆ mơngế tâ pơreăng ó, nâ hiăng chêh hlá đơn ƀă chêh tin nhăn pơtroh ăm Kăn xiâm pơkuâ ngăn pơkeăng pơlât Dak Lak pâ chêh inâi veăng rơtế ƀă mâu ngế cheăng plâ mơdât pơreăng. Klêi mê, Kăn hnê ngăn ‘na pơkeăng pơlât hiăng tiâ ƀă pơtroh hlá đơn dêi nâ ‘na tơdroăng hnê mơhno hbrâ mơdât pơreăng râ tơring vâ pơtối tơdah xo hnoăng cheăng pêi.

“A hlo pơreăng a Dak Lak pơxiâm tâ tú, kơxô̆ mơngế tâ tú tâk rế hên, mê á vâ veăng plâ mơdât pơreăng vâ veăng kum ăm rêm ngế a Dak Lak xuân ôh tá tŭm mơngế. Tối tơchoâm tơdroăng cheăng pêi hên, hlối pá iâ há, tơ-brêi. La drêng pêi cheăng tơchoâm rơtế ƀă tâi tâng rêm ngế veăng plâ mơdât pơreăng mê a  hâk tơngăm, hlối ro.

Tin nhắn nâ Phan Ngọc Bảo Nhi pơtroh ăm Khu xiâm ngăn pơkeăng pơlât kong pơlê Dak Lak

Xuân cho pleăng hnoăng cheăng veăng pêi cheăng a kơpong klâ krê tơchoâm a Hngêi pơkeăng tơring Krông Pač, tơdroăng cheăng rêm hâi dêi ngoh Nguyễn Tấn Huy, ối a thôn 2, cheăm Tân Tiến, tơring Krông Pač cho veăng kum chơ tơmeăm xúa a mâu veăng ƀă mơgrúa kơpuih krúa kơpong klâ krê. Nguyễn Tấn Huy hơ‘muăn, ngoh dế cho sinh viên hơnăm má 2 dêi Hngêi trung Đại học Khoa học Tự nhiên Pơlê kong kân Hồ Chí Minh.

Xua pơreăng tâ tú mê sap ing khế 5 kố nah ngoh thế pơtê hriâm vêh a pơlê vâ ví kơ pơreăng. Drêng Khu pơkuâ ngăn Đoân Droh ơtăm tơring Krông Pač tơbleăng tăng mâu ngế lăm pleăng hnoăng cheăng, veăng ai môi tuăn dêi rơpŏng hngêi, ngoh hiăng chêh hlá đơn pâ pleăng tơná lăm cheăng ƀă châ tơdah xo  veăng kum cheăng a kơpong klâ krê lối 1 măng tĭng kố.

“Rơpŏng hngêi hiăng hbrâ tơmiât tŭm tơdroăng hdrối, drêng ai rôh chêh inâi pâ pleăng hnoăng tơná rơpŏng hngêi xuân ăm prôk, xua vâ veăng kum kuăn pơlê. Akố tơdroăng cheăng pêi xuân ôh tá ai ki pá to lâi la tung tơring ai hên ngế tâ pơreăng mê ôh tá ai ngế ki vâ pơ’lêh cheăng tiô chôu. Mâu vâi pú tâng prôk thế djâ tŭm dêi tơmeăm, bú kal ivá mo lĕm hiăng hôm, troh akố  tơdroăng rêh ối ôh tá châ môi tiah a hngêi, kâ ôu tơchoâm pú hên ai drêng ki ‘nâ  kô phá tơ ê”.

Ngoh Nguyễn Tấn Huy châ rơpŏng hngêi chiân troh a kơpong klâ krê tơchoâm vâ veăng kum pêi tơdroăng cheăng hbrâ mơdât pơreăng

Ngoh Nguyễn Văn Hà, Ngế pơkuâ ngăn Đoân Droh rơtăm tơring Krông Pač ăm ‘nâi, drêng ối a tơring ai 3 ngế ƀă drêng mơjiâng kơpong klâ krê tơchoâm tơdah hên kuăn pơlê vêh ing mâu kơpong tâ pơreăng, khu ngăn Đoân Droh rơtăm tơring ‘mâi hơ’lêh tơdroăng pơkâ cheăng, kum pêi ahdrối ‘na tơdroăng hbrâ mơdât pơreăng COVID-19 ƀă ‘na tơniăn rêh ối tung tơring.

La ƀă tơdroăng veăng kum mâu ngế xơpá, khu tơrŭm cheăng Đoân hiăng krếo thế mâu ngế pleăng hnoăng cheăng tơná veăng kum mâu ngế ki xiâm plâ mơdât pơreăng. Rôh apoăng ai 15 ngế lăm pleăng hnoăng cheăng tơná châ kĭ a hlá đơn ăm phêp lăm veăng pêi cheăng a kơpong klâ krê tơchoâm  dêi tơring Krông Pač.

“Drêng mơhnhôk kơxô̆ mâu đoân viên droh rơtăm chêh hlá đơn vâ veăng pleăng hnoăng cheăng ai tiô pơkâ dêi Khu kăn ngăn Đoân Droh rơtăm dêi tơring. Ngin xuân pêi nhên tơdroăng pơkâ, ing chêh hlá đơn ta troh kĭ ăm  phêp dêi rơpŏng hngêi, dêi cheăm bêng, tíu tơbleăng. Trâm mâ tơdrêng tơrêm ngế ki pleăng hnoăng cheăng, tơmâng tơdroăng tơpui tối, púi vâ ƀă tơbleăng mơjiâng mâu khu ngế ƀă pơcháu ăm mâu kơpong xĭng xoăng cheăng, xo pêi hnoăng cheăng, hnê mơhno dêi mâu vâi pú ki veăng pêi hnoăng cheăng vâ pêi tơ-ƀrê má môi ƀă tơdroăng ki pleăng hnoăng cheăng tơná ’’.

Tơdroăng veăng kum dêi ƀok thái pơkeăng Bảo Nhi a kơpong klâ krê

A tơring Čư̆ Mgar ing mơ’nui khế 7  kố nah, Klêi kơ’nâi ai tơbleăng tăng mâu ngế lăm pleăng hnoăng cheăng, Khu pơkuâ ngăn Đoân Droh rơtăm tơring  Čư̆ Mgar hiăng xo hên hlá đơn pâ pleăng hnoăng cheăng tung khu “Veăng xâp ếo ngiât’’. Tiô Y Wal Mlô, Ngế pơkuâ hnê ngăn Đoân Droh rơtăm tơring Čư̆ Mgar, lâp tung tơring hiăng pơtối mơjiâng 19 đô̆i xâp ếo ngiât 2 râ tơring ƀă râ cheăm ai 280 ngế pleăng tơná vâ veăng kum hbrâ mơdât pơreăng, hbrâ mâu tơmeăm ăm mâu kơpong klâ krê tơchoâm.

Krê to đô̆i râ tơring hiăng xo hlá đơn chêh inâi dêi 50 ngế pleăng hnoăng tơná. Khu ngăn Đoân dêi tơring hiăng chêh inâi, tơkŭm hnê pêi mâu pơkâ ƀă hbrâ rơnáu ki tơniăn ăm mâu ngế pleăng hnoăng tơná. Pakĭng mê, tơpui tơno ƀă khu hnê mơhno cheăng hbrâ mơdât pơreăng tơring vâ xoăng hnoăng cheăng pêi ăm tơtrro ăm tơrêm khu.

“Hên đoân viên, droh rơtăm hơnăm ối nếo, ai mâu ngế ki ‘nâ nếo klêi mơgêi hriâm râ má pái hiăng ‘nâi pleăng hnoăng cheăng tơná veăng plâ mơdât pơreăng tung tơring. Kô hlo tơdroăng ki hâk vâ, pleăng hnoăng tơná mơ-eăm vâ xo pêi hnoăng cheăng ki pá, tơdroăng ki nếo dêi mâu vâi pú đoân viên droh rơtăm tối tơchoâm ƀă mâu hơnăm ối nếo tung tơring tối krê mê cho đi đo pơtối rak vế mâu tơdroăng ki tro.

Tơdroăng ki mê ăm hlo hnoăng cheăng pêi, tơdroăng cheăng dêi mâu ngế droh rơtăm pêi tung tơdroăng rơtế tơchoâm ivá ƀă khu pơkuâ hnê ngăn đảng, mâu kăn cheăm bêng kong pơlê tung tơdroăng hbrâ mơdât pơreăng’’.

Droh rơtăm pleăng hnoăng cheăng chơ chiân tơmeăm xuá kum kuăn pơlê ki ối a kơpong klâ krê

Ƀă tơdroăng tơmiât “Tâng ôh tá veăng pleăng hnoăng tơná drêng kố kô mê drêng lâi ah nếo vâ pleăng”, hên mâu đoân viên droh rơtăm hiăng ôh tá xâu hiăng lăm chêh dêi inâi veăng pêi hnoăng cheăng tung khu pleăng hnoăng tơmâ mơdât pơreăng COVID-19. Mơhé hâi lơ măng, kong mêi lơ kong tô, mơhé vâ pá puât, rơtế ƀă mâu ngế ki ê, mâu hơnăm ối nếo Dak Lak dế mơ-eăm ‘no ivá tơná pêi pro mâu tơdroăng cheăng ki nhên khât vâ rơtế ƀă dêi rơpó veăng plâ mơdât pơreăng.

H’Xíu H’Mok chêh

Gương tơplôu tơbleăng