VOV4.Sêdang - Tiô Khu ngăn hnê hriâm ƀă hnê mơjiâng tuăn ngoâ rơkê kong pơlê Dak Lak, mâu tơring, cheăm tung kong pơlê dế pêi pro klêi hnoăng cheăng hbrâ ăm hơnăm hriâm nếo 2021 – 2022. Tung pơla hdrối kố nah, mâu tơring, cheăm xuân hiăng séa ngăn, ‘mot tơ’nôm mâu kế tơmeăm ki kal tung hnê hriâm, kế tơmeăm xúa, kế tơmeăm hêi; mơjiâng, ‘mâi rơnêu mâu kế tơmeăm xúa tung hngêi trung, lâm hriâm. Malối, tung pơla pơreăng COVID-19 dế tâ tú ôh tá tơniăn mê hnoăng cheăng hbrâ mơdât pơreăng ƀă rak tơniăn ăm hok tro, kăn ƀô̆, thái cô đi đo châ kơjo kum.

Vâ tơdah lối 400 ngế hok tro dêi 10 lâm mâm non hơnăm hriâm 2021 – 2022, Hngêi trung mâm non Hoa Ban, cheăm kơpong hơngế hơngo Čư Kƀang, tơring tơkăng kong Ea Súp hiăng pik mơngiơk, rơnêu mâu kơbong hriâm, pro nếo hên khu kơƀăng tăng, rơnêu mâu kơpong xah hêi pa gong, mơgrúa tâi tâng plông hngêi trung. Cô Nguyễn Thị Hóa – Kăn pơkuâ hngêi trung tối.

“Tung pơla Vi ƀan cheăm ăm xúa hngêi trung pro kơpong klâ kơtăn tơkŭm hbrâ mơdât pơreăng, mê hngêi trung hbrâ hâi khế tơkŭm po tơdroăng rah xo hok tro. Troh hâi lơ 20/8 pơla kố nah, drêng Vi ƀan cheăm vêh pơcháu mê hngêi trung tơkŭm po rơnêu, xôh pơkeăng kơdê pơreăng tâi tâng plông hngêi trung. ‘Na tơmeăm khoăng hnê hriâm, hngêi trung xuân hiăng châ khu râ kăn kơpêng tơmâng tŏng kum mơ’no rôe ăm hên kơpong xah hêi pa gong, 49 khu kơƀăng tăng nếo rơtế ƀă hên tơmeăm khoăng ki ê’’.

Mâu hngêi trung mâm non a tơring tơkăng kong Ea Súp hiăng hbrâ rơnáu vâ tơdah hok tro

A cheăm tơkăng kong Ea Ƀung, thái Nguyễn Thành Đông – Kăn pơkuâ hngêi trung râ má péa Ea Ƀung, tối ăm ‘nâi, hơnăm hriâm 2021 – 2022 hngêi trung ai 220 ngế hok tro. Mơ’nui khế 7 pơla kố nah, cheăm Ea Ƀung châ hlo 7 ngế tro tâ COVID-19, cheăm thế pêi pro Pơkâ 16 dêi Chin phuh vâ hbrâ mơdât pơreăng. Xua mê, tŭm tơdroăng hbrâ ăm hơnăm hriâm nếo tro chiâng ton. Klêi kơ’nâi hâi khế ăm klâ ối kơtăn, ƀă tơdroăng tŏng kum dêi mâu khu râ kơvâ cheăng, tơdroăng hbrâ ăm hơnăm hriâm nếo xuân dế vâ pêi kêi đeăng.

“Pơla kố nah hngêi trung châ Vi ƀan tơring tŏng kum kơxô̆ liăn rơnêi 8 kơbong hriâm, tung mê ai 6 kơbong hriâm a kơpong 2 râ ƀă 2 kơbong a hngêi râ má 4 ƀă nôkố hiăng pro kêi đeăng; ƀă la ngiâ kô rơnêu hngêi ăm thái cô rêh ối. Krê hngêi trung hiăng rôe tŭm tơmeăm khoăng, mơ-éa xing xoăng ăm thái cô ƀă hok tro kum tơtro tung tơdroăng hnê ƀă hriâm. Ngin xuân hiăng tơbleăng troh nôu pâ hok tro ing zalo, facebook pơkâ vâ tơkŭm hngêi trung dêi Khu pơkuâ hnê hriâm a hâi lơ 1/9’’.

Tơring Ea Súp mơ’no 12 rơtal liăn vâ rơnêu mâu kơbong hriâm

Tơring tơkăng kong Ea Súp nôkố ai 48 toăng hngêi trung hriâm mâu râ, ing mâm non troh râ má pái ƀă hngêi trung hnê đi đo. Hơnăm hriâm 2021 – 2022, mâu hngêi trung ai 19.350 ngế hok tro. Tiô pôa Nguyễn Văn Khóa – Kăn pơkuâ ƀơrô Hnê hriâm ƀă Hnê mơjiâng tuăn ngôa rơkế tơring Ea Súp tối, hbrâ ăm hơnăm hriâm nếo, tơnêi têa mơ’no liăn lối 12 rơtal liăn rơnêu, mơjiâng nếo, rôe mâu tơmeăm khoăng ăm mâu hngêi trung hriâm. Troh nôkố, mâu hngêi trung hiăng hbrâ tŭm tơmeăm khoăng, thái cô hnê lơ pơkâ hnê, hbrâ vâ mot pơxiâm hơnăm hriâm nếo.

“Ƀơrô hnê hriâm ƀă hnê mơjiâng tuăn ngoâ rơkê tơring hiăng mơjiâng mâu pơkâ tiô mâu mơ-éa hnê mơhno dêi khu râ kăn kơpêng vâ pêi pro troh tâi tâng mâu kăn pơkuâ hngêi trung hriâm tơdroăng hnê ƀă hriâm xuân môi tiah tơdroăng hbrâ mơdât pơreăng. Mâu hngêi trung hriâm hiăng mơjiâng mâu troăng pêi, pơkâ pêi, mơjiâng mâu tôh hbrâ mơdât pơreăng vâ mot hơnăm hriâm nếo tơniăn ăm tâi tâng thái cô, mâu ngế pêi cheăng ƀă hok tro”.

Pôa Phạm Đăng Khoa, Kăn pơkuâ hnê hriâm ƀă hnê mơjiâng tuăn ngoâ rơkê kong ơlê Dak Lak tối ăm ‘nâi, vâ hbrâ rơnáu hơnăm hriâm 2021 – 2022, mâu hngêi trung hiăng séa ngăn, rôe tơ’nôm mâu tơmeăm khoăng tung hnê hriâm, tơmeăm xúa, tơmeăm xah hêi; mơjiâng, rơnêu mâu tơmeăm khoăng hngêi trung, lâm hriâm, kơjo kum mâu tơmeăm môi tiah kơbong hriâm, tíu chôu ‘măn kơxop mơ-éa pơchuât, hngêi mơdrah, tíu hdoăng têa krúa, rak tơniăn ai tŭm tơmeăm khoăng hnê hriâm kum tung tơdroăng pêi pro tơdroăng hnê hriâm phôh thong nếo ƀă lâm 1,2,6; séa ngăn, xing xoăng mâu thái cô hnê tơniăn tŭm thái cô, tơdâng tơ’mô ƀă châ tiô pơkâ hnê mơjiâng.

Vâ tơniăn tơdroăng pơxiâm po hơnăm hriâm nếo 2021 – 2022 tiô tro hâi khế hơnăm hriâm châ Vi ƀan kong pơlê tơbleăng ăm pêi pro vêh séa ngăn kơxô̆ kuăn pơlê dế pêi pro klâ kơtăn a kong pơlê ƀă kơxô̆ hngêi trung châ pro tíu klâ ối kơtăn xua tơring, cheăm pơkuâ vâ vêh pro tíu klâ kơtăn, mơdrếo hngêi trung ăm hok lăm hriâm, tŏng kum tơdroăng khăm ngăn, pâk vaccine. Hơnăm hriâm nếo hiăng vâ chê troh, pơkâ thâ nôkố cho rak tơniăn tŭm tơmeăm khoăng má môi ăm hok tro ƀă thái cô drêng pơreăng COVID-19 xuân dế xông tâ tú ó. Ki má lối cho a mâu hngêi trung hriâm hdrối mê châ rah xo pro tíu klâ kơtăn vâ pêi hnoăng cheăng hbrâ mơdât pơreăng.

‘’Vi ƀan kong pơlê hiăng ai mơ-éa pơkâ thế mâu tơring, cheăm pơtê xúa mâu hngêi trung pro ăm tíu klâ kơtăn vâ mơdât pơreăng vâ mâu hngêi trung ai hâi khế vâ mơgrúa tơmeăm khoăng ăm hơnăm hriâm nếo. Ngin xuân hbrâ ăm vêh séa ngăn tâi tâng, mơnhên mâu tơmeăm khoăng vâ ‘mâi rơnêu, rôe tơmeăm khoăng ăm hơnăm hriâm nếo’’.

Tơdrêng amê Khu pơkuâ hnê hriâm – Hnê mơjiâng tuăn ngôa rơkê tơrŭm ƀă Khu pơkuâ ngăn pơkeăng ƀă khăm pơlât pêi pro tơtro tơdroăng mơgrúa, xôh pơkeăng kơdê pơreăng tiô pơkâ ƀă tơvêh ối lĕm mâu tơmeăm khoăng tung hngêi trung hbrâ ăm tơdroăng pơxiâm po hơnăm hriâm nếo, rak tơniăn ăm hok tro, thái cô drêng troh a hngêi trung.

VOV Tây Nguyên chêh

A Sa Ly tơplôu ƀă tơbleăng