VOV4.Xơ Đăng -   Hâi lơ 5/1,Khu pơkuâ ngăn Đảng ủy Dak Lak tơkŭm po Rôh hôp ‘no tơdrêng ing troăng hyôh Internet séa ngăn kơtăng mâu hlá mơéa dêi Tơnêi têa ƀă Khu pơkuâ ngăn Đảng ủy ăm kăn ƀô̆ xiâm dêi kong pơlê. Tiô pôa Phạm Minh Tấn, kăn phŏ pơkuâ ngăn má môi Khu pơkuâ ngăn Đảng ủy Dak Lak, hlo tơdroăng ki ôh tá tơniăn dêi pơreăng COVID-19, Khu pơkuâ ngăn Đảng ủy, Hô̆i đong hnê ngăn, Vi ƀan hnê ngăn kong pơlê hiăng mơnhên mâu tơdroăng ki xơpá, pơloăng mơnúa pơkâ mơ’no ƀă teăm tơdrêng pơkâ, ‘mâi rơnêu, ‘mot tơ’nôm, hên hlá mơ-éa vâ kăn pơkuâ, hnê mơhno pêi pro tro “tơdroăng pơkâ pêi péa tơdroăng” rế hbrâ mơdât pơreăng COVID-19 rế rak vế, mơnhông mơdêk cheăng kâ rêh ối.

Mâu kăn veăng hôp a rôh hôp séa ngăn kơtăng tơdroăng pơkâ a Khu pơkuâ ngăn Đảng ủy Dak Lak

Mơgêi hơnăm2021, mơdêk cheăng kâ 5,1%, GDP tiô rêm ngế châ vâ chê 50 rơtuh liăn tung môi ngế. Tung kơxô̆ liăn pêi lo ing tê tơmeăm ngi kong têa ê châ lối 1.100 rơtuh dollars. A rôh hôp kố, kăn xiâm kong pơlê Dak Lak kô châ hriâm tâp, hnê tối, séa ngăn 12 hlá mơ-éa dêi Tơnêi têa ƀă dêi kong pơlê ai tơdjâk troh mâu tơdroăng ki kal: mơdêk tơdroăng ki pơkuâ, hnê mơhno hnoăng cheăng hbrâ mơdât pơreăng COVID-19 tung tơdroăng nếo; pơkâ tơleăng tơdroăng ki pơsăm tối, pơsăm tơkêng pơxâu phâk tơdroăng cheăng ki ôh tá tro dêi Đảng; mơgêi dêi Khu xiâm pơkuâ tơdroăng kal kí ‘na mơhnhôk rak vế kăn ƀô̆ rơkê, kơhnâ xua ki pơxúa tơdjuôm; pơkâ thế dêi khu pơkuâ ngăn Đảng ủy ‘na mơdêk ki rơkê plĕng tung Đảng viên tung hneăng hơnăm nôkố ƀă mâu hơnăm ki pơtối.

Katarina Nga tơplôu ƀă tơbleăng