VOV4.Sêdang - Dế nôkố, Dak Lak hiăng ai lối ai lối 650 ngế tâ COVID-19 tung mê 160 ngế hiăng pơlât prêi. Dak Lak ai hên kơdrâm ngế ki pêi cheăng a Pơlê kong kân Hồ Chí Minh ƀă mâu kong pơlê Bình Dương, Đồng Nai vêh dêi ngi pơlê, ai pơreăng ƀă hiăng chiâng F0. Kơnôm pêi pro kơtăng tơdroăng klâ ối krê, rĕng hdró kơpong mơdât mot lo mâu tíu ki ai pơreăng, mê mâu tơring, cheăm dêi Dak Lak hiăng mơeăm hbrâ mơdât tơƀrê hnoăng cheăng tâ tú pơreăng tro pơlê pơla.

Bu krê cheăm Quảng Hiệp, tơring Čư Mgar hiăng ai 1.000 ngế lo ing Pơlê kong kân Hồ Chí Minh ƀă Bình Dương vêh vâ ví pơreăng. Tung mê ai troh 100 ngế to rơxế honđa vêh. Kơnôm pêi pro tro tơdroăng tối tơbleăng ăm ƀok thái pơkeăng, klâ kơtăn tochoâm, mê a cheăm Quảng Hiệp hiăng ai 6 ngế yương tĭnh ƀă SARS-CoV-2 laga ôh tá tâ tú tung pơlê pơla. Pôa Ngô Minh Đức, Kăn hnê ngăn Vi ƀan cheăm Quảng Hiệp tối ăm ‘nâi: cheăm ai kơdrâm kuăn cháu dêi vâi krâ hdroâng kuăn ngo lăm pêi cheăng a mâu kong pơlê peăng Hdroh tơnêi têa. Vâi ối tung rơpŏng kơtiê xua mê drêng vêh a hngêi ví pơreăng ôh tá ai tŭm hên tơmeăm khoăng ki kal xúa rêm hâi.

Khu râ kăn pơkuâ, khu râ hiăng mơhnhôk mâu rơpŏng ai tơmeăm khoăng veăng tơlo, kum tơniăn mơngế klâ kơtăn bê tơmeăm kâ, kơchâi kâ ƀă mâu tơmeăm khoăng ki kal xúa rêm hâi. Pôa Đức tối: Kơnôm pêi pro kơtăng tơdroăng klâ kơtăn pơla mơngế ƀă mơngế, rơpŏng ƀă rơpŏng mê pơreăng nếo ôh tá tâ tú rơdâ tung pơlê pơla.

‘’Tung tơdroăng klâ kơtăn mê cheăm tơkŭm mơjiâng rêm thôn môi tôh séa ngăn vâ séa ngăn mâu ngế ki klâ kơtăn a hngêi. Klêi kơ’nâi séa ngăn, châ hlo mâu ngế ki trâm pá mê cheăm mơhnhôk tơdrêng kuăn pơlê, mâu ngế ai hiâm mơno tŏng kum mơngế pá puât veăng rơtế khu râ kăn pơkuâ, tŏng kum phái, tŏng kum xup kơxŏng khăng ƀă mâu tơmeăm khoăng ki kal xúa rêm hâi ki ê vâ kum tung tơdroăng rêh ối rêm hâi.

Tâng mâu ngế ki kố dế kreăng a mâu kơpong pơreăng mê ai pói vâ vêh mê tiô hnê mơhno dêi Vi ƀan kong pơlê kô djâ vêh, tâng kal vâ vêh. Ƀă cheăm drêng mâu kuăn pơlê vêh mê kô hbrâ tơdah ƀă kô ai kơpong klâ kơtăn, ƀă teăm tơdrêng tŏng kum vâ vâi krâ hmiân tuăn tung kơpong klâ kơtăn’’.

Ƀuôn Khóa, cheăm Čư Pui, tơring Krông Bông hâi apoăng châ tah lôi kơxái kâng mơdât ôh tá ăm lo pa kong

Ngin troh ƀuôn Khóa, cheăm Čư Pui, tơring Krông Bông tung hâi apoăng châ tah lôi kơxái ki kâng ôh tá ăm mot lo pa kong. Vâi krâ mơngế Rơđế akố hiăng vêh ƀă tơdroăng rêh ối tiah hmâ rêm hâi môi tiah lăm a klâng mơ’no têa mot tung klâng, rak ngăn kơdrum kơphế, pôe nhâ ăm kơpôu, ro ƀă hía hé. Laga kơbố xuân pâng rơkong môh ƀă ối kơtăn tơniăn. Vâi ối kơmêi drêng trâm mâ ƀă mơngế tơmối xua nếo hluâ mâu hâi ki tô tuăn. Hâi lơ 23/7, ai 2 ngế kuăn cháu dêi ƀuôn Khóa vêh ing Bình Dương hiăng tro tâ COVID-19. Ing 2 ngế kố, 26 ngế a ƀuôn Khóa hiăng yương tĭnh SARS-CoV-2, mê tá hâi tối troh chât ngế F1.

Tơpui tơno ƀă ngoh Y Nghị Mlô, hdroâng kuăn ngo Rơđế a Ƀuôn Khóa. Ngoh Y Nghị tối ăm ‘nâi: Kố cho roh apoăng klêi kơ’nâi 21 hâi klâ kơtăn, ngoh lo a kơdrum rak ngăn to ro. Kơdrâi ƀă kuăn ‘nĕng hiăng tro yương tĭnh SARS-CoV-2, hiăng châ djâ pơlât. Y Nghị cho F1, xua mê 3 măng tĭng ối tung hngêi, ƀă 8 xôh châ kăn ƀô̆ khăm pơlât troh xo mơheăm khăm ngăn laga mơhúa pơrá âm tĭnh.

‘’Tung tơdroăng klâ kơtăn, á mơnê peăng kơ koan cheăng hiăng pro tơ’lêi hlâu, tŏng kum ăm á tơmeăm kâ vâ á hmiân tuăn klâ kơtăn tung hngêi, ôh tá lo pá kong trâm vâi ki ê ví tâ tú pơreăng. Á hmiân tuăn 'nâng’’.

Pôa Nguyễn Văn Tâm, Kăn pơkuâ hnê ngăn cheăng Đảng cheăm Čư Pui tối ăm ‘nâi, tung pơla kố nah tâi tâng khu cheăng kal kí dêi cheăm hiăng pêi pro tơdroăng 4 tơdrêng ƀă khŏm mơ-eăm mơdât tro, ôh tá ăm pơreăng xông tâ tú. Ƀă troh hâi lơ 17/8 pơla kố nah, tâi tâng mâu kơpong kâng kơxái mơdât ôh tá ăm lo pa kong pơrá hiăng vêh tơniăn tơdroăng rêh ối.

Pôa Nguyễn Văn Toàn, kăn hnê ngăn Vi ƀan Măt trâ̆n cheăm Čư Pui tối: Vâ châ tơƀrê tung tơdroăng mơdât pơreăng tâ tú tung pơlê pơla mê cho: Thế tiô pơkâ pêi pro 5K, cho 5 thế. Tung mê tơdroăng ‘’kơbố ối ulâi athế ối a tíu mê’’ cho ki xiâm, thế pêi pro kơtăng. Vâ 178 rơpŏng dêi ƀuôn Khóa pêi pro kơtăng tơdroăng kâng kơxái mơdât ôh tá ăm lo pakong, klâ kơtăn, khu râ kăn pơkuâ hiăng kơchuâ lơ gât rêm rơpŏng dêi tâi tâng pơlê ƀă tơdroăng kơxô̆ mơngế F0, F1. Cheăm mơjiâng khu mơdât pơreăng ƀă khu ƀok thái pơkeăng, kŏng an, mâu ngế gâk plâ hâi plâ măng.

Vâi ‘nâi nhên lơgât, ‘nâi nhên tơdroăng rêm rơpŏng tung kơpong kâng kơxái mơdât ôh tá ăm lo pa kong vâ hnê mơhno, pơxâu phâk ing apoăng. Ki rơhêng vâ tối, khu kố hiăng pơto, pơtroh tŭm tơmeăm kâ, kơchâi kâ ăm mâu rơpŏng tung kơpong klâ kơtăn. Pôa Nguyễn Văn Toàn mơnhên:

‘’Ahdrối cho tơdroăng tơmâng hnê mơhno dêi râ kơpêng xuân môi tiah dêi mâu khu râ kăn pơkuâ hnê ngăn cheăng Đảng, khu râ kăn pơkuâ cheăm hiăng pêi cheăng tiô pơkâ, ki rơhêng cho pêi cheăng ƀă kuăn pơlê. Ngin ai tôh djâ troăng hdrối a mâu tíu pơreăng xông tâ tú, đi đo ‘nâi tơdroăng pói vâ, ki rơhêng vâ tối pơchân vâi krâ ngế ki lâi ối môi tíu amê, ôh tá lo pa kong. Ôh tá ai bê phái kâ, kơchâi kâ lơ mâu tơmeăm ki kal ai mâu tôh ki djâ troăng ahdrối kum ăm. Ing hmê kâ, têa ôu, tơdroăng rêh ối rêm hâi mê khu kăn ƀô̆ ing cheăm troh thôn pơrá pêi kơhnâ khât, pôu râng hnoăng cheăng’’.

Kơvâ ngăn pơkeăng ƀă khăm pơlât Dak Lak xo têa hế, têa kơhêa kuăn pơlê a cheăm Čư Pui, tơring Krông Bông vâ séa ngăn COVID 19 drêng cheăm châ hlo ai mơngế tro tâ COVID-19

Drô a Krông Bông xuân ối ai mâu ngế F0, laga kố cho mâu ngế ối tung kơpong klâ kơtăn. Sap apoăng khế 8 troh nôkố Krông Bông ôh tá ai ngế tro SARS-CoV-2 ki lâi tung pơlê pơla. Pôa Lê Văn Long, Kăn hnê ngăn Vi ƀan tơring Krông Bông mơnhên: Drêng tâ khu cheăng kal kí veăng pêi kơtăng, tơdrêng amê pro chiâng môi tuăn, hlê plĕng pêi tiô kơtăng dêi kuăn pơlê mê kơpong ai pơreăng kô châ mơdât.

‘’Krông Bông cho tơring apoăng pêi pro 37 kơpong klâ kơtăn tơkŭm ƀă vâ chê 1 rơpâu ngế châ klâ kơtăn tơkŭm sap ing hâi lơ 24/7 troh nôkố. Mâu ngế tro tâ ki hên cho mâu ngế vêh ing kơpong ai pơreăng ƀă dế klâ kơtăn tơkŭm dêi tơring mê, tâng lơ ai tro tâ pơreăng mê châ djâ pơlât a kong pơlê. Ki ê ôh tá ai tâ pơreăng tung pơlê pơla. Xua mê pơreăng ôh tá tâ tú. Nôkố tung tơring hiăng mơjiâng mâu kơpong tơniăn lĕm, pro tơ’lêi hlâu ăm kuăn pơlê mâu hdroâng kuăn ngo tung tơring tơkŭm mơnhông cheăng kâ, hlối hbrâ mơdât pơreăng tung la ngiâ tơtro tâ’’.

Pơreăng ki nếo má môi châ hlo cho a ƀuôn Kwuang A, cheăm Čư Bao, pơlê kong krâm Ƀuôn Hồ. Kố cho khu tâ tú pơreăng pơlê pơla hên má péa a Dak Lak sap ing roh apoăng pơreăng má 4 xông tâ tú. Klêi kơ’nâi ai mơnhên khu tâ pơreăng 29 ngế F0 a ƀuôn Kwang A, sap ing kơmăng dế hâi lơ 19/8/2021, Vi ƀan pơlê kong krâm Ƀuôn Hồ hiăng pêi pro pơkâ kơxô̆ 16, pêi pro mâu troăng ki thâ hbrâ mơdât COVID-19 tung tâi tâng cheăm Čư Bao.

Pôa Phạm Ngọc Tiên, Kăn pơkuâ hnê ngăn cheăng Đảng, Kăn hnê ngăn Vi ƀan cheăm Čư Bao tối ăm ‘nâi, Khu hnê mơhno, hbrâ mơdât COVID-19 cheăm Čư Bao xuân hiăng pơtroh khu gâk kring tơniăn, rak ngăn tơdroăng rêh ối ăm mâu rơpŏng tung kơpong kâng kơxái mơdât ôh tá ăm lo pa kong.

‘’Tung tơdroăng kâng kơxái mơdât ôh tá ăm lo pa kong mê ngin pơtâng tối mơhnhôk mâu ngế tŏng kum mơngế pá puât rơtế Khu hnê mơhno dêi cheăm vâ tŏng kum, pro tơ’lêi hlâu tŏng kum vâi krâ tung kơpong kâng kơxái mơdât ôh tá ăm lo pakong ai tơdroăng rêh ối tơniăn, ôh tá ăm rơpŏng ki lâi kơklêa, rơpŏng ki lâi ôh tá bê kế kâ’’.

Tiô ƀok thái pơkeăng Trần Kim Long, Ngế pơkuâ kơvâ hbrâ mơdât pơreăng tâ tú, Tíu xiâm mơdât pơreăng kong pơlê Dak Lak, xêo troh mơ’nui măng tĭng hdrối, khu ƀok thái pơkeăng hiăng tơkŭm ti tăng mâu ngế tro tâ pơreăng, xo têa hế, têa môh test rĕng ăm vâ chê 1 rơpâu ngế ki tơdjâk khu tro tâ pơreăng. Krê Nông trương Čư Bao, ối tung Kŏng ti tơlo liăn Kơxu Dak Lak (Dakruko), drêng tơdah tơbleăng tung Nông trương ai mâu kŏng nhân yương tĭnh ƀă SARS-CoV-2, khu râ kăn pơkuâ nông trương hiăng tơrŭm ƀă CDC kong pơlê Dak Lak pro test rĕng ăm tâi tâng kăn ƀô̆, kŏng nhân viên a Nông trương.

Vâ hbrâ mơdât pơreăng COVID-19 châ tơƀrê, nông trương hiăng pêi pro 3 tơdrêng, tâi tâng kŏng nhân kô rế pêi kâ, rế rêh ối, klâ kơtăn tung nông trương.

Sap apoăng khế 7 troh nôkố, Dak Lak hlo hên ngế tro tâ pơreăng tung pơlê pơla laga pơrá châ kong pơlê mơ-eăm hbrâ mơdât pơreăng. Ôh tá tối troh khu ki tâ tú apoăng tơdjâk ngế pêi cheăng dêi hngêi rơxế Tiến Oanh, mâu khu tâ tú ki ê pơrá châ tơƀrê mơdât pơreăng klêi kơ’nâi 14 hâi kâng kơxái mơdât ôh tá ăm lo pakong.

Lê Xuân Lãm – Nam Trang chêh

A Sa Ly tơplôu ƀă tơbleăng