VOV4.Sêdang - Tiô Ko\ng ti on tơhrik Dak Lak xêo troh nôkố, kơxo# on tơhrik tê mơdró tê ăm tơmối tâk 12%, tâng pơchông [a\ roh kố hơnăm 2018. Kố cho kơlo tâk hên má môi tung pơla 5 hơnăm achê kố.

Ki nhên, tung lối 10 khế kố nah, lâp kong pơlê Dak Lak tê dâng 1 rơtal 451 rơtuh kWh on tơhrik. Kơxo# on tơhrik kum tung cheăng kơmăi kơmok, mơjiâng pro kế tơmeăm khoăng, uâ mơdiê tơmeăm cho hên [a\ lối 64%, ki ê cho on tơhrik xúa tung rơpo\ng hngêi châ 32%. Tâi tâng kơxo# liăn tê on tơhrik tung 10 khế hơnăm 2019 mơni châ vâ chê 2.620 rơtal liăn, tâk dâng 250 rơtal liăn tâng pơchông [a\ roh kố hơnăm nah.

Rơtế [a\ tơdroăng mơjiâng pro ăm on tơhrik tê mơdró hluâ pơkâ, Ko\ng ti on tơhrik Dak Lak ối pêi pro tro tơdroăng rak tơniăn hnoăng xing xoăng on tơhrik kum tung mơjiâng pro kế tơmeăm khoăng, rêh ối rêm hâi, mâu tơdroăng cheăng kal kí xah hêi dêi tơmối tung kong pơlê.

A Sa Ly tơplôu [ă tơbleăng