VOV4.Sêdang - Vâ tŏng kum kuăn pơlê pá puât tro tơdjâk xua pơreăng kân COVID-19, mâu hâi hiăng hluâ, hên tíu cheăng ƀă mâu khu râ a kong pơlê Dak Lak hiăng pêi pro tơdroăng ‘’Tíu tê tơmeăm 0 liăn’’. Drêng pơreăng xông tâ tú ó, mâu tơmeăm ki kum tê kơtê hiăng tơveăng vâi krâ kuăn pơlê ai tơ’nôm tơmeăm kâ, kơchâi kâ rêm hâi.

Klêi  prôk ngăn lâp mâu tơmeăm tê tung’’ Siêu thị mini 0 liăn‘’, jâ Đoàn Thị Xuân Đào ối a tôh kơphô̆ 2, bêng Tân Lợi, pơlê kong kơdrâm Ƀuôn Ma Thuột, kong pơlê Dak Lak hiăng rah xêh mâu tơmeăm ki tơná vâ môi tiah phái, po, bột ngot, xik, têa măm, têa rơmâ, tơmeăm tâ tung kơ’lo ƀă mâu kơchâi plâi pôm. Jâ Đào tối ăm ‘nâi, rơpŏng hngêi jâ cho rơpŏng kơtiê, mâi jâ nếo klêi hlâ xua ing tơdroăng châi ki pá pơlât prêi, môi ngế jâ păn chĕm drêh dêi 2 ngế kuăn ối tơxĭn  dế tro hơnăm  hriâm. Vâ ai tơmeăm kế kâ, jâ Đào hmâ lăm mơdró xêh a kơchơ la vâ chê 1 khế kô jâ thế pơtê ối a hngêi vâ hbrâ mơdât pơreăng. Drêng châ bêng xĭng xoăng ăm phĭu rôe tơmeăm a Siêu thị 0 liăn, jâ tâ hơniâp ro tung hiâm mơno: 

“Mơnê tơdroăng kố hiăng kum á tung rơnó pơreăng tâ tú kố xua ôh tá châ lăm, ôh tá châ pêi lo liăn vâ rêh kâ drêng ai tơdroăng kố veăng kum á châ kơdroh iâ tơdroăng ki pá tung rêh ối ‘’.

Kuăn pơlê rah xêh tơmeăm kal vâ rôe a siêu thị mini 0 liăn

Siêu thị mơni 0 liăn cho tơdroăng ing Khu pơkuâ ngăn Đoân droh rơtăm kong pơlê Dak Lak, Khu ngăn vâi kơdrâi kong pơlê tơrŭm ƀă Kŏng ti veăng tơlo liăn Mêa hâu hmốu kơnía Phú Nhuận (PNJ) dêi Tây Nguyên – Nam Trung ƀộ rơtế ƀă mâu tíu veăng tŏng kum tơbleăng, vâ kum kuăn pơlê ki trâm pá, rơpŏng kơtiê ƀă vâ chê kơtiê. Tung siêu thị mê ai 40 túa tơmeăm tơbleăng tê ki hên cho mâu phái, kế kâ kơchâi plâi pôm.

Ing mâu inâi ki hiăng rah hdrối ing mâu bêng, cheăm a tung pơlê kong kơdrâm Ƀuôn Ma Thuột, Khu tơkŭm po hiăng ăm 500 kơtâ vĕ ‘’tuăn pâ’’ ăm mâu rơpŏng kơtiê xơpá, rêm kơtâ vĕ kơnâ tơ’mô 300 rơpâu liăn. Tung pơla sap lơ 14 troh lơ 17/8, sap ing 7 chôu 30 phut troh 17 chôu rêm hâi, kuăn pơlê mơhno dêi phĭu mê vâ ‘’rôe’’ mâu tơmeăm ki tơná kal vâ.

Đoân viên droh rơtăm veăng kum mâu ngế chó chêng tơvê kŏng rah xêh tơmeăm rôe a Siêu thị 0 liăn

Ngoh Võ Chí Nhân, ngế pơkuâ khu cheăng ‘na Marketing, Kŏng ti Veăng tơlo liănn Mêa hâu hmốu kơnía Phú Nhuận (PNJ) a kơpong Tây Nguyên – Nam Trung ƀộ ăm ‘nâi, Khu tơkŭm po hiăng ‘no lối 180 rơtuh liăn vâ rôe xo mâu tơmeăm ing mâu siêu thĭ ki kân ƀă yă tê ki rôe hên môi hdrôh, ƀă hlối pơkâ yă tiô tơdroăng rôe mê ƀă mâu tơmeăm tê a Siêu thĭ mini 0 liăn. Kuăn pơlê châ rah rôe mâu tơmeăm ƀă yă ôh tá luâ 300 rơpâu liăn vâ tơniăn ai tŭm kơxô̆ tơmeăm tâng vâ pơchông ƀă kơxô̆ phĭu ki hiăng ăm. Pakĭng mê, vâi ối hlâu vâ rah rôe xêh mâu kơchâi plâi, pôm, ngăn tiô tơná vâ.

“Mâu tơmeăm tê tung Siêu thĭ ai tiô púi vâ rôe vâ tối vâ tŭm, kal vâ rôe mâu tơmeăm klâi kô rôe mâu tơmeăm ki mê, pin ôh tá rôe môi tơdroăng tiô tơdroăng ki  pơkâ 300 rơpâu liăn mê vâi kô rah xêh môi tiah rôe tung siêu thĭ hlối, môi vâi lăm rôe tơmeăm a siêu thĭ há vâi châ rah hlối, vâi lăm rôe a siêu thị tiah mê. Ƀă a phĭu 300  rơpâu mê a hlo iâ la châ khât gá troh a Siêu thĭ mê vâi kô châ rah xo hên tơmeăm luâ tâ ki pơkâ dêi kơxô̆ liăn 300 rơpâu mê, xua mê, ing tơdroăng tê tơmeăm dêi Metro ƀă Co-op, vâi rôe tơmeăm ƀă yă pơkâ ôh tá kơnâ xua rôe hên môi hdrôh, xua mê yă set up xuân cho yă tiô pơkâ rôe hên môi hdroh há’’.

Tiêo ngoh Trần Doãn Tới, Kăn phŏ hnê ngăn Đoân Droh rơtăm kong pơlê Dak Lak, rơtế ƀă siêu thĭ mini 0 liăn, pơla hdrối kố nah, khu hơnăm ối nếo Dak Lak hiăng tơbleăng hên tơdroăng tiô pơkâ “0 liăn” môi tiah siêu thị lăm tê tơmeăm ukố umê, rơxế 0 liăn, rơhé 0 liăn, tơmeăm tê 0 liăn ƀă hên ki ê vâ veăng kum mâu ngế ki xơpá ƀă mâu ngế ki tro tơdjâk xua pơreăng COVID-19. Mơhé túa ki tối pơrá phá dêi rơpó la tơdroăng mê xuân tơmiât troh tơdroăng vâ kum tơmeăm ki kal vâ hơ’lêh rôh kâ hmê rêm hâi ăm kuăn pơlê.

Tơdrêng ƀă tơdroăng veăng kum dêi kuăn pơlê a tíu tơkŭm po tơbleăng tê mâu tơmeăm, khu Đoân Droh rơtăm kong pơlê cheăm bêng ối mơjiâng khu shiper vâ kơtâu chiân tơmeăm troh a mâu kơpong klâ krê, tíu ki dế kring gak’’.

“Klêi Siêu thĭ 0 liăn rôh kố pro a Ƀuôn Ma Thuột mê ngin kô tơkŭm po hên Siêu thĭ 0 liăn ki ê nếo a mâu tíu pêi cheăng ki trâm pá tung kong pơlê. Ƀă krê to mâu ngế ki xơpá, tơdjâk tơdrêng xua pơreăng COVID-19 la ôh tá châ vâ troh lăm rôe mâu tơmeăm mê kô ai khu shiper ếo ngiât dêi khu tơrŭm cheăng Đoân kô lăm chơ chiân troh a tơrêm rơpŏng hngêi vâ kuăn pơlê ai tơmeăm kơchâi kâ kal tơdrêng ƀă pro pơxúa tơ-ƀrê ‘’.

Siêu thị 0  liăn a bêng Thống Nhất

Rơtế hvái ngăn mơngế pêi cheăng ki lăm cheăng ukố umê ƀă mâu ngế xơpá, mâu ngế ki ôh tá ai ngế păn roăng, ôh tá châ pêi lo liăn tơniăn, ing hâi lơ 8/8 kố nah, Vi ƀan bêng Thống Nhất (pơlê kong kơdrâm Ƀuôn Ma Thuột) xuân tơkŭm po tơdroăng ‘’Siêu thĭ mini 0 liăn’’ pro a hngêi trung râ má môi Lê Hồng Phong.

Pakĭng mâu tơmeăm tê môi tiah kơchâi plâi pôm, akố ối ai hơ’nêh ƀă ká ối rêh. Troh nôkố, tơdroăng kố hiăng tơkŭm po châ 3 to kơchơ, ƀă lối 900 hnoăng tơmeăm 0 liăn ăm mâu kuăn pơlê a 9 to cheăm, bêng a pơlê kong kơdrâm Ƀuôn Ma Thuột.

Jâ Trịnh Như Ngọc, Kăn hnê ngăn Vi ƀan bêng Thống Nhất, pơlê kong kơdrâm Ƀuôn Ma Thuột, kong pơlê Dak Lak ăm ‘nâi, rêm hnoăng tơmeăm mê cho mâu combo ki kơnâ pơxúa vâ tơ’mô dêi rơpó vâ kuăn pơlê rah xo mâu tơmeăm tơná vâ, tơná kal. Pakĭng mê, kuăn pơlê xuân chiâng vâ rah xêh tơ’nôm mâu tơmeăm kal a Siêu thĭ ki ê. Sap ing pơxiâm po, siêu thĭ 0 liăn hiăng hlo hên ngế tơmâng, veăng kum dêi hên tíu, mâu ngế thế ai tuăn hơ-ui ƀă dâng 200 rơtuh mâ liăn ƀă vâ chê 5 kơchâi plâi pôm. Ing tơmeăm ki veăng kum mê, siêu thĭ kô pơtối po ta troh tâi hâi khế pơkâ klâ kơtăn tiô pơkâ 15 dêi Ngế pro xiâm hnê ngăn Chin phuh:

“Hiăng ai hên mâu ngế ki ai tuăn hơ-ui hiăng tơmâng khât, lăm pôu a tíu vâ mâu rơpŏng veăng hơlêm tơdroăng pá ƀă kuăn pơlê, xua mê ngin loi khât kơ tâi tâng mâu ngế ki ai tuăn hơ-ui, ƀă kum hên tơmeăm, môi tiah phái, kế kâ kơchâi, ká, liăn vâ ngin mơjiâng tơdoăng mê ăm khât, djâ mâu tơmeăm  tơniăn má môi ăm mâu kuăn pơlê ki dế kal. Ngin vâ veăng kum kơdroh iâ ki xơpá tung pơla kố ăm vâi’’.

Ƀă ki pơxúa “môi kơxu drêng kơklêa tơ’mô ƀă môi tơdrong drêng phâi’’, mâu hnoăng tơmeăm hbru ăm dêi tơdroăng “0 liăn” hiăng kum kuăn pơlê kơdroh iâ ki pá puât. Hnoăng tơmeăm mê chiâng ai pơxúa khât xua gá kum tơdrêng ƀă teăm tơdrêng mâu tơmeăm ki vâi krâ nhŏng o kal vâ tung pơla dế tâ pơreăng.

H’Xíu H’Mok chêh

Gương tơplôu ƀă tơbleăng