VOV4.Sêdang - Klêi kơ’nâi péa hâi pêi cheăng, hâi lơ 13/8, hneăng hôp má 2 Hô̆i đong hnê ngăn kong pơlê Dak Lak hneăng má 10, hneăng hơnăm 2021 – 2026 hiăng mơgêi. Hên troăng hơlâ pơkâ ki kal vâ mơnhông mơdêk cheăng kâ rêh ối pơlê pơla, rak tơniăn gak kring pơlê pơla cheăm bêng 6 khế mơ’nui hơnăm 2021 ƀă 5 hơnăm la ngiâ hiăng châ tơpui tơno ƀă tơbleăng.

Mơgêi hneăng hôp má 2 Hô̆i đong hnê ngăn kong pơlê Dak Lak hneăng má 10, hneăng hơnăm 2021 – 2026

A hneăng hôp kố, Hô̆i đong hnê ngăn kong pơlê Dak Lak hiăng séa ngăn, tơpui tơno ƀă tơbleăng 18 tơdroăng pơkâ, tung mê, ai mâu tơdroăng pơkâ ki kal: Tơdroăng pơkâ mơnhông mơdêk cheăng kâ rêh ối pơlê pơla, rak tơniăn pơlê pơla cheăm bêng kong pơlê Dak Lak 5 hơnăm, hneăng hơnăm 2021 – 2025; Tơdroăng pơkâ pêi pro, tơdroăng pơkâ mơ’no ƀă troăng hơlâ pơkâ xing xoăng liăn pêi cheăng tơdjuôm ing liăn ngân kong pơlê a kong pơlê Dak Lak, hneăng hơnăm 2021 – 2025; Tơdroăng pơkâ ‘na pơkâ tơdroăng ki kal hneăng hôp dêi Hô̆i đong hnê ngăn kong pơlê hneăng 10, hneăng hơnăm 2021 – 2026.

‘Na hnoăng cheăng ki xiâm cho mơdêk cheăng kâ rêh ối pơlê pơla kong pơlê tung mâu khế ki u ối dêi hơnăm kố, mâu kăn pơkâ thế Vi ƀan hnê ngăn kong pơlê pơtối tơmâng ngăn pơkuâ mâu kơvâ cheăng rak tơniăn tung pơla ai pơreăng COVID-19 tâ tú, pro ôh tá tơniăn.

Katarina Nga tơplôu [ă tơbleăng