VOV4.Sêdang - Kơxo má lơ 30/7, kong pơlê Dak Lak tơdah vâ chê 900 ngế pêi cheăng ing Đồng Nai vêh. Kố cho roh tơdah kuăn pơlê apoăng dêi kong pơlê Dak Lak. Klêi kơ’nâi test rĕng, ai 4 ngế yương tĭnh ƀă SARS-CoV2, mâu tơdroăng khăm ngăn dế châ pơtối rak khăm mâu ngế ki nhôm. Vâ chê 900 ngế pêi cheăng a Đồng Nai kố tro hía tơdroăng cheăng xua pơreăng COVID 19 xông tâ tú ƀă tơná vâi ai pói vâ to dêi rơxế hon đa vêh a Dak Lak.

Mâu kuăn pơlê pói vâ vêh hiăng kĭ ƀă kơ koan cheăng dêi kong pơlê Đồng Nai ƀă bu châ vêh drêng hiăng test rĕng âm tĭnh ƀă COVID 19 vâ tơniăn ôh tá tot a mâu tíu séa ngăn. Kơ’nâi mê, Kan sát rak tơniăn troăng klông ƀă mâu khu cheăng gak kring tơniăn, kŏng an, khu ƀok thái pơkeăng dêi kong pơlê Đồng Nai hiăng mơjiâng khu ki djâ prôk troăng vâ chê 400 km.

Vâ chê 900 mơngế pêi cheăng vêh troh kông 14, troăng kân lăm ngi kong pơlê ki ê kơxô̆ 14 châ kan sát gak tơniăn troăng prôk Dak Lak tơdah, djâ vêh vâ pro mâu mơ-éa ki kal

Tiah mê, kố cho roh apoăng kong pơlê Dak Lak hiăng tơkŭm po tơdah mơngế ing kơpong ai pơreăng vêh a pơlê. Hdrối mê, kong pơlê xuân châ hlo hên ngế kuăn pơlê a Pơlê kong kân Hồ Chí Minh, Bình Dương ƀă mâu kong pơlê peăng hdroh tơnêi têa vêh xêh ƀă rơxế hon đa troh a pơlê.

A Sa Ly tơplôu ƀă tơbleăng