VOV4.Xơ Đăng - Hâi lơ 30/12, kong pơlê Dak Lak hiăng tơkŭm po Hneăng hôp mơgêi 20 hơnăm pêi pro Pơkâ kơxô̆ 13/2002 dêi Khu xiâm pơkuâ Đảng hneăng má IX ‘na pơtối pơ’lêh nếo, mơnhông ƀă mơdêk châ tơƀrê tơdroăng cheăng kâ khu pú hên, 10 hơnăm pêi pro Luât tơrŭm cheăng. Tơbleăng a hneăng hôp, hluâ 20 hơnăm pêi pro pơkâ, lâp kong pơlê nôkố ai 608 khu tơrŭm cheăng, tung mê, 390 khu tơrŭm cheăng pêi cheăng tung kơvâ pêi chiâk deăng, 218 khu tơrŭm cheăng ôh tá pêi chiâk deăng.

Khu tơrŭm cheăng 

Tơdroăng cheăng kâ tơrŭm cheăng tăng cheăng pêi ăm 21 rơpâu ngế pêi cheăng đi đo, pêi lo liăn tâk 10 xôh tung hneăng nôkố. Xông tơpui a hneăng hôp, pôa Nguyễn Đình Trung, Kăn cheăng tung Tíu xiâm Đảng, Kăn pơkuâ hnê ngăn cheăng Đảng kong pơlê Dak Lak pơkâ mâu khu râ, tơring tung kong pơlê pơtối thăm pơtâng tối, mơhnhôk vâ mơdêk hlê plĕng ‘na tơdroăng cheăng kâ khu pú hên, khu tơrŭm cheăng, teăm tơdrêng tah lôi mâu tơdroăng pá puât, tơvâ tơvân, pro tơ’lêi hlâu má môi ăm Khu tơrŭm cheăng mơnhông mơdêk. Mơjiâng mâu troăng pêi cheăng kâ khu pú hên tiô troăng ki nếo tơtro ƀă tơdroăng roh kăch măng kơmăi kơmok 4.0.

A Sa Ly tơplôu ƀă tơbleăng