VOV4.Sêdang - Hâi lơ 26/8, Khu pơkuâ hnê hriâm ƀă hnê mơjiâng tuăn ngôa rơkê Dak Lak tơbleăng mơ-éa ‘na tơdroăng pêi pro Pơkâ hơnăm 2021 – 2022. Pơtối mê, kơvâ hnê hriâm – Hnê mơjiâng tuăn ngôa rơkê kong pơlê ôh tá tơkŭm po tơdah hok tro tơkŭm hngêi trung a hâi lơ 1/9 la ngiâ. Kăn pơkuâ Khu pơkuâ hnê hriâm – hnê mơjiâng tuăn ngôa rơkê Dak Lak pơkâ, sap ing lơ 1/9 troh hdrối pơxiâm po hơnăm hriâm nếo, kăn pơkuâ mâu hngêi trung hbrâ tŭm tơdroăng vâ  tơkŭm po hnê hriâm; tơbleăng vâ hok tro ƀă nôu pâ hok tro ‘nâi tơdroăng ‘na pơkâ hnê hriâm dêi hngêi trung, hnê mơhno hok tro troăng hriâm mơ’no tơdrêng tung um tiô troăng măng Internet.

‘Na tơdroăng tơkŭm po pơxiâm po hơnăm hriâm nếo 2021 – 2022 a hâi lơ 5/9/2021, mơ-éa ai tối nhên: Tơkŭm po pơxiâm hơnăm nếo mơ’no tung um tiô troăng măng internet ƀă mâu hngêi trung ki ai kơmăi. Klêi kơ’nâi pơxiâm po hơnăm hriâm nếo, mâu hngêi trung tơkŭm po hnê hriâm mơ’no tơdrêng tung um tiô troăng măng internet lơ ƀă troăng ki ê tơtro ƀă tơdroăng xông tâ tú dêi pơreăng COVID ƀă ivá ki ai dêi hngêi trung, tơring, cheăm, laga ôh tá tơkŭm po hnê hriâm mơ’no tơdrêng tung um tiô troăng măng internet ƀă râ mâm non.

A Sa Ly tơplôu ƀă tơbleăng