VOV4.Sêdang - Drêng hlo xông tâ tú ó ‘nâng dêi pơreăng COVID-19, xua mâu ngế tâ tú tung pơlê pơla đi đo tâk, kơxê lơ 25/8, Vi ƀan kong pơlê Dak Lak tơbleăng Hlá mơ-éa kơxô̆ 8118 ‘na tơdroăng pêi pro Pơkâ 16 dêi Ngế pro xiâm hnê ngăn Chin phuh tung pơlê kong kơdrâm Ƀuôn Ma Thuột ƀă tơring Krông Ƀúk sap ing 18h hâi lơ 26 khế 8 troh drêng ai tơbleăng nếo.

Tíu gak mơdât pơreăng a cheăm Čư Êbur, pơlê kong kơdrâm Ƀuôn Ma Thuột

Pơtối mê, Vi ƀan kong pơlê Dak Lak pơcháu Kăn hnê ngăn Vi ƀan pơlê kong kơdrâm Ƀuôn Ma Thuột ƀă tơring Krông Ƀúk hbrâ pơkâ nhên mâu tơdroăng xiâm kal pêi pro kơtăng tơniăn tơdroăng hbrâ mơdât pơreăng châ tơƀrê má môi.

Môi tuăn pơcháu ăm Vi ƀan pơlê kong kơdrâm Ƀuôn Ma Thuột hbrâ xúa mâu kơxô̆ liăn tơtro dêi liăn ngân kong pơlê pêi pro tơdroăng khăm ngăn rĕng SARS-CoV-2 tung rơdâ ăm kuăn pơlê tung pơlê kong kơdrâm vâ thâ klâ kơtăn tâi tâng F0 lo ing pơlê pơla. A roh pêi pro klâ kơtăn kố, pơlê kong kơdrâm pơtối pêi pro xing xoăng phĭu lăm kơchơ ăm kuăn pơlê, tơdrêng amê kô pêi pro kơtăng tâ nếo tơdroăng séa ngăn vâ kơdroh tơdroăng kuăn pơlê lo a troăng kân.

A Sa Ly tơplôu ƀă tơbleăng