VOV4.Sêdang - Nếo achê pơla kố, Ngế pro xiâm hnê ngăn Chin phuh hiăng pơkâ thế Khu xiâm ngăn ‘na troăng prôk ƀă rơxế kơtâu dêi mâu kong pơlê, pơlê kong kân tung lâp tơnêi têa athế po troăng prôk ki tơ’lêi, hbru ăm mah theh QR Code tŏng kum ăm khu mơdró kâ châ pơto chơ kế tơmeăm pêi lo ing chiâk deăng ƀă mâu tơmeăm ki kal tung rêh kâ ối rêm hâi. Sap ing mơ’nui khế 7 hơnăm 2021 troh nôkố, Khu ngăn ‘na troăng prôk - rơxế kơtâu kong pơlê Dak Lak hiăng hbru lối 2.000 mah theh QRR Code kô ăm phep khu vê rơxế châ prôk lăm vâ kum kuăn pơlê châ mơ’no tê dêi tơmeăm ki pêi lo ing chiâk deăng lơ mâu tơmeăm khoăng ki kal tung rêh kâ ối rêm hâi.

Pôa Đặng Quang Điện – Kăn pơkuâ Khu tơrŭm cheăng tê mơdró pơto tơmeăm 63 kong pơlê, pơlê kong kơdrâm Dak Lak tối, khu tê mơdró ai 45 toăng rơxế pơto mâu tơmeăm khoăng pêi lo ing chiâk deăng, môi tiah plâi kâ dêi mâu kong pơlê Tây Nguyên troh mâu kong pơlê peăng Kơnhŏng ƀă pơlê kong xiâm Hà Nội vâ tê. Drêng Hà Nội ƀă mâu kong pơlê pêi pro klâ kơtăn pơlê pơla tiô pơkâ 16 dêi Ngế pro xiâm hnê ngăn Chin phuh, tơdroăng pơto tơmeăm khoăng tro hrá xua thế pêi pro mâu tơdroăng séa ngăn hbrâ, mơdât COVID 19.

A mơ’nui khế 7 pơla kố nah, Khu pơkuâ troăng prôk ƀă rơxế kơtâu kong pơlê Dak Lak pêi pro “tơdroăng pro theh ăm mâu rơxế ki kơjo ăm phep kơtâu’’ pro ăm mah QR Code kum ăm rơxế pơto tơmeăm khoăng dêi khu tê mơdró tơ’lêi hlâu tâ tung tơdroăng pơto tơmeăm khoăng drêng troh mâu kong pơlê thế pêi pro klâ kơtăn pơlê pơla tiô Pơkâ 16 dêi Ngế pro xiâm hnê ngăn Chin phuh.

‘’Klêi kơ’nâi tơbleăng dêi kơ koan cheăng ‘na tơdroăng pro ăm mah QR Code pơto mâu tơmeăm ki kal xúa rêm hâi, ngin hiăng kĭ tung măng, ƀă pro mơ-éa tơ’lêi hlâu. Klêi kơ’nâi kĭ “troăng kơjo ăm rơxế kơtâu’’ châ pro ăm mah QR Code a Khu pơkuâ troăng prôk ƀă rơxế kơtâu Dak Lak mê ngin châ pro ăm theh kơnó rơxế klêi kơ’nâi dâng 1 – 2 chôu kĭ. Drêng ai theh, tơdroăng pơto tơmeăm khoăng ki kal xúa rêm hâi tơkâ hluâ mâu tíu gâk mơdât pơreăng dêi kong pơlê xuân môi tiah mâu kong pơlê, pơlê kong kơdrâm ki ê rĕng ƀă tơ’lêi hên tâ.

Pakĭng mê, tâi tâng mâu ngoh o vê rơxế tung kŏng ti châ tŏng kum test rĕng COVID 19 a tíu gâk mơdât pơreăng COVID 19 mê ôh tá tâi liăn ƀă ôh tá mơdoh hên chôu’’.

Mâu ngế vê rơxế châ prôk hluâ tíu gâk rĕng tâ drêng ai mah QR Code “troăng kơjo ăm rơxế kơtâu’’ vâ tơkâ mâu tíu gâk mơdât pơreăng COVID 19 a mâu  troăng kân lăm ngi kong pơlê ki ê

Dak Lak ai 6 troăng lăm ngi kong pơlê ki ê prôk tơkâ hluâ mê cho: 14 (troăng kân Hồ Chí Minh), 14C, 26, 27, 19 ƀă 29 tơdjêp ƀă mâu kong pơlê Lâm Đồng, Gia Lai, Dak Nông, Khánh Hòa ƀă Phú Yên. Nốkố tâi tâng mâu troăng kân lăm ngi kong pơlê ki ê pơrá ai tíu gâk mơdât pơreăng COVID 19 séa ngăn mơngế ƀă rơxế prôk mot tung mâu kong pơlê.

Trung tă Đặng Thanh Hòa – Kăn ƀô̆ séa ngăn troăng prôk ƀă rơxế kơtâu Tíu gâk Kan sát gâk tơniăn troăng prôk ƀă rơxế kơtâu Krông Ƀúk, ối tung Kŏng an kong pơlê Dak Lak tối ăm ‘nâi, a tíu gâk mơdât pơreăng COVID 19 a troăng prôk peăng mâ hâi lo pá kơnhŏng dêi kong pơlê cho kông 110 ối tung cheăm Ea Hleo, tơring Ea Hleo tơkăng ƀă kong pơlê Gia Lai, rêm hâi ai hrĭng toăng rơxế ƀă rơpâu ngế mot lo tung kong pơlê Dak Lak.

Drêng mâu rơxế pơto tơmeăm khoăng ai mơ-éa kơnó rơxế ai mah QR Code ối xêt khât xua Khu pơkuâ troăng prôk ƀă rơxế kơtâu mâu kong pơlê ăm mê kô châ kơjo séa ngăn vâ rơxế prôk lăm tung pơla rĕng má môi.

‘’Tíu gâk kan sát gâk tơniăn troăng prôk ƀă rơxế kơtâu Krông Ƀúk xing xoăng tâi tâng mơngế gâk plâ hâi plâ măng vâ tơniăn troăng prôk ƀă rơxế kơtâu xuân môi tiah tŏng kum tơdroăng hbrâ, mơdât pơreăng COVID 19. Pêi pro hnê mơhno “troăng kơjo ăm rơxế kơtâu’’ dêi Ngế pro xiâm hnê ngăn Chin phuh, tâi tâng khu cheăng kô séa ngăn mah QR Code, tâng mâu tíu pơkuâ rơxế châ pro ăm ƀă tŭm hâi khế prôk lăm mê ngin kô pro tơ’lêi hlâu vâ rĕng hluâ tíu gâk’’.

Sap ing hâi lơ 19/7/2021 troh nôkố, Khu pơkuâ troăng prôk ƀă rơxế kơtâu kong pơlê Dak Lak pro ăm lối 2.000 toăng rơxế mah QR Code vâ prôk lăm a mâu troăng “troăng kơjo ăm rơxế kơtâu’’ drêng pơto tơmeăm khoăng ki kal xúa rêm hâi

Tiô pôa Lê Đình Minh – Kăn phŏ Khu pơkuâ troăng prôk ƀă rơxế kơtâu kong pơlê Dak Lak, pêi pro hnê mơhno dêi Chin phuh xuân môi tiah Khu xiâm pơkuâ troăng prôk ƀă rơxế kơtâu tŏng kum mâu tíu tê mơdró pơto tơmeăm khoăng ki xúa rêm hâi, Khu pơkuâ hiăng tơbleăng troh mâu tíu pơkuâ ‘na rơxế pơto tơmeăm khoăng a Dak Lak kĭ pro ăm mah kơnó QR Code rơxế vâ kơjo tơdroăng prôk lăm, pơto a mâu “troăng kơjo ăm rơxế kơtâu’’.

Tơdroăng kĭ ăm mah QR Code kơjo “troăng kơjo ăm rơxế kơtâu’’ châ pêi pro ƀă mâu phân mêm điê̆n tưh ing măng internet, ƀă pro mơ-éa tơ’lêi hlâu, rĕng ƀă bu tung pơla tá hâi châ tơdế hâi cho hiăng châ kĭ ăm. Pôa Lê Đình Minh tối:

‘’Xêo troh nôkố ngin hiăng pro ăm châ 2.036 mah QR Code ăm mâu rơxế prôk pơto tơmeăm ki kal xúa rêm hâi lăm mâu kong pơlê, pơlê kong kơdrâm tung lâp tơnêi têa. Khu pơkuâ troăng prôk ƀă rơxế kơtâu pơtối tơbleăng ƀă pơkâ mâu khu tê mơdró ‘na rơxế pơto tơmeăm khoăng ki xúa rêm hâi tung pơla pơreăng xông tâ tú nôkố dế xông tâ tú ó tung kong pơlê xuân môi tiah lâp tơnêi têa.

Ngin xing xoăng tôh gâk plâ hâi plâi măng ƀă 7/7 hâi tung măng tĭng pro ăm mâu khu pơkuâ ‘na rơxế pơto tơmeăm khoăng. Khu tê mơdró bu nâp hô sơ tiô troăng măng cho 1 – 2 chôu tŭm pơkâ ngin pro ăm hlối vâ tŏng kum pơto tơmeăm khoăng rĕng tâ’’.

Tuấn Long chêh

A Sa Ly tơplôu ƀă tơbleăng