VOV4.Sêdang - Vi ƀan tơring Krông Pač, kong pơlê Dak Lak hiăng ‘no pơtê cheăng Ngế kăn hnê ngăn cheăm Vụ Bổn xua lôi ăm pơreăng COVID-19 châ tâ tú tung kuăn pơlê. Ing mê pôa Trần Văn Sáu, Kăn hnê ngăn Vi ban cheăm Vụ Bổn, tơring Krông Pač, kong pơlê Dak Lak tro ‘no pơtê cheăng 15 hâi, riân sap ing hâi lơ 10/8 troh lơ 24/8/2021. Xiâm kối pôa Sáu tro Vi ban tơring thế pơtê cheăng xua hnê mơhno tơdroăng hbrâ mơdât COVID-19 ôh tá teăm tơdrêng, lôi ăm tơkŭm krâm mơngế ƀă hnê mơhno klâ krê a hngêi ôh tá pro kơtăng, lôi ăm pơreăng châ tâ tú tung kuăn pơlê.

Riân troh kơxê lơ 10/8, a cheăm Vụ Bổn ai 2 tíu xiâm tâ pơreăng COVID-19  a thôn 6 ƀă thôn 7 ai 19 ngế. Tung mê, krê to a thôn 7 ai 16 ngế. Kơxô̆ mâu ngế tâ tú châ ‘nâi a cheăm Vụ Bổn tung hâi lơ 10/8 hiăng pro kơxô̆ mơngế tâ tú a tơring Krông Pač tâk rĕng, chiâng tơring ki ai kơxô̆ mơngế tâ tú COVID-19 hên má 3 a Dak Lak. Nôkố mâu kăn khu râ pơkuâ cheăng kong pơlê Dak Lak dế tơkŭm pơkâ klâ kơtăn, mơ-eăm tăng xiâm ngế ki tâ tú, khăm ngăn ƀă pêi pro mâu tơdroăng khăm ngăn vâ mơdât pơreăng COVID-19 a cheăm Vụ Bổn.

Gương tơplôu ƀă tơbleăng