VOV4.Sêdang - Mâu hâi khế achê pơla kố, a kong pơlê Dak Lak pơtối ai kơpong ki ai kuăn pơlê tâ tú pơreăng COVID-19 tung pơlê pơla. Hbrâ, tơplâ mơdât pơreăng tâ tú dế xâu xía, Dak Lak hiăng pêi pro kơtăng khât tơdroăng hnê tối, mơhnhôk kuăn pơlê thăm mơdêk tơdroăng rak vế tro tiô pơkâ vâ mơdât pơreăng. Tơdrêng amê, thăm mơdêk tơdroăng tơdah xo - khăm pơlât mơngế ki tro tâ COVID-19 a Hngêi pơkeăng kân Krông Ƀuk tâk hên luâ tâ péa hdroh, pro hbhrâ 2 tíu ki ăm mơngế tamo châi klâ ối kơtăn ki kân a Ƀuôn Ma Thuôt, bê tíu ăm dâng 1.300 ngế ối khăm pơlât. Tối ‘na tơdroăng kố, ngế chêh hlá tơbeăng cheăng tung Rơ’jíu Việt Nam teăng mâ a Tây Nguyên ai ƀai chêh: ‘’Dak Lak pơkâ thế rak luât kơtăng, mơdêk ivá hbrâ tơplâ mơdât pơreăng COVID-19’’. Pó vâi krâ-nhŏng o kô tơmâng.

Klêi kơ’nâi vâ chê 2 măng tĭng kơdroh kơlo ki ăm kuăn pơlê klâ ối kơtăn hơngế tiô tơdroăng Pơkâ 16 chu chiâng tơdroăng pơkâ 15 dêi Ngế pro xiâm hnê ngăn Chin phuh, pơlê kong kơdrâm Ƀuôn Ma Thuột, kong pơlê Dak Lak hiăng vêh pro kơtăng nếo mâu tơdroăng pơkâ ăm klâ ối kơtăn vâ mơdât tơdroăng tâ tú dêi pơreăng. Bu tung pơla 13 hâi, hiăng hlo ai 4 kơpong ki pơreăng tâ tú vâ chê 50 ngế ki nếo tâ, tí xê to pro pơlê kong kơdrâm Ƀuôn Ma Thuột vêh pơkâ nếo tơdroăng kơxô̆ 16 mê ối tơkŭm tôe xo têa môh rêm ngế tung lâp pơlê kong kơdrâm Ƀuôn Ma Thuột, tâi tâng ai vâ chê 102 rơpâu rơpŏng. Pôa Vũ Văn Hưng, Kăn hnê ngăn Vi ƀan pơlê kong kơdrâm Ƀuôn Ma Thuột tối, ai 70 khu ƀok thái pơkeăng ki lăm tôe xo têa môh, pêi cheăng pơtối sap ing hâi lơ 27/8.

Pakĭng mê, roh ki ăm kuăn pơlê klâ ối kơtăn ki kơtăng má môi ki pơlê kong kơdrâm pêi pro, mê kô kring vế tơniăn ăm tơdroăng tôe xo têa môh, rĕng séa ngăn pơreăng, ăm thế kuăn pơlê ối kơtăn hơngế, vâ khoh tăng châ mâu ngế ki F0 ki u ối tung pơlê pơla:

‘’Rak vế, pê pro tiô tơdroăng pơkâ kơxô̆ 16 cho mơdât tâi tâng kuăn pơlê lo prôk a troăng kơphô̆, ăm to khu ki hmâ pêi to tơdroăng cheăng ki kal. Tơdroăng ki vâ ăm vâi hok tro tơkŭm troh a hngêi trung hâi lơ 1/9 kô ôh tá lĭng chiâng po, pơtê tâi tâng tơdroăng hriâm. Lăm hngêi kơchơ kal athế ăm khu râ, kơvâ cheăng, vâi kơdrâi, khu droh rơtăm lăm kơchơ teăng ăm kuăn pơlê, khu ki kố kô lăm troh a tơrêm tôh kơphô̆, thôn pơlê. Lâp pơlê kong kơdrâm kô séa ngăn têa môh, têa hế, vâ tơkŭm ăm tơrêm rơpŏng, tung pơla 5 troh 7 hâi kô klêi’’.

Môi kơpong ki nếo mơdât prôk lăm a cheăm Čư̆ Êbuôr, pơlê kong kơdrâm Ƀuôn Ma Thuột

Plâ 2 măng tĭng hdrối, pơreăng COVID-19 a kong pơlê Dak Lak xuân pơtối tâ tú hên ó. Ti xê to a kơphô̆ Ƀuôn Ma Thuột ki ai kơdrâm kuăn mơngế, mê mâu cheăm ki iâ mơngế, môi tiah cheăm Čư̆ Bao, pơlê kong kơdrâm Ƀuôn Hồ, cheăm Čư̆ Nĕ, tơring Krông Ƀuk ƀă cheăm Ea Na, tơring Ea Hleo xuân ai kơpong ki kuăn pơlê tro tâ tú hên, ai lối 150 ngế tro yương tĭnh.

Ki hlo bô bối dêi mâu kơpong ki tâ pơreăng kố, mê pơrá ai tơdjâk troh mâu khu mơdró kâ, ai tơrŭm tê mơdró kâ đi đo ƀă mâu kong pơlê, pơlê kong kân ki dế ai pơreăng COVID-19 tâ tú hên ó. Klêi kơ’nâi tí tăng mơngế ki ối achê ăm hlo, hlo ai hên tơdroăng ki ôh tá hâi teăm khăm ngăn tơdrêng nhên a mâu ngế ki vê rơxế, kế tơmeăm pơla mâu kong pơlê ƀă mâu khu ngế ki ai tơdjâk. Môi tiah a pơlê kong krâm Ƀuôn Hồ, klêi kơ’nâi 1 măng tĭng hlo ai môi kơpong ki ai 57 ngế tro tâ pơreăng, tơdroăng ki tăng mơngế ki trâm, ối a tĕn bú pro tung môi hngêi mơdró kâ mê tê, xua ôh ta ƀĕng ê, ai mâu ngế ki vê rơxế lăm chơ xo kế tơmeăm dêi hngêi mơdró kâ kố apoăng khế 8. Thiê̆u tă Trần Ngọc Tú - Đô̆i trưởng đô̆i kan sat gak ngăn troăng prôk kơxô̆ 1, Ƀơrô kan sat gak ngăn troăng prôk Kŏng an kong pơlê Dak Lak rơtế ƀă mâu khu râ, kơvâ cheăng pêi pro dêi hnoăng cheăng a tíu gak ngăn Kông 110, êng mơnhên kuăn mơngế, rơxế, kế tơmeăm ing mâu kong pơlê kơpong peăng Kơnhŏng mot tung kong pơlê kố ăm ‘nâi, dế nôkố tơdroăng ki tăng mơngế ki trâm, ối a tĕn hiăng châ pêi pro ing kŏng ngê̆, séa ngăn mah QR ing phôn râng kŏng chal nếo.

‘’Drêng mê, tá hâi teăm ai kŏng ngê̆ ki mê. Nôkố pơrá hiăng séa ngăn ing mah QR tâi tâng. Rơxế troh pơrá châ pơkâ thế séa ngăn mah QR, tơdroăng ki kố ga ai tơdjâk troh ‘na khu ngăn ‘na pơkeăng, ƀă hnối ai tơdjâk troh a Khu xiâm ngăn Kŏng an. Klêi séa ngăn pơrá châ hlo ‘nâi nhên tơdroăng’’.

Lơgât séa ngăn ki tơ’lêi tâ tú pơreăng COVID-19 a mâu cheăm dêi Dak Lak

Drêng ai tơdroăng ki xâu xía dêi pơreăng ki tâ tú tơ’lêi, Khu hnê mơhno hbrâ, tơplâ, mơdât pơreăng COVID-19 dêi kong pơlê Dak Lak. Pôa Phạm Ngọc Nghị, Kăn hnê ngăn Vi ƀan kong pơlê tối tiah kố, xuân u ối hên kuăn pơlê, khu râ pơkuâ pêi cheăng tá hâi teăm kơtăng, kơhnâ khât. Rơtế ƀă tơdroăng pơkâ thế pro kơtăng, thăm mơdêk hnê tối kuăn pơlê thăm mơnhông dêi hnoăng cheăng hbrâ, tơplâ, mơdât pơreăng, mâu pơlê kong kơdrâm, pơlê kong krâm, tơring, cheăm tung kong pơlê kal athế hbrâ rơnáu ăm mâu tơdroăng ki kân hngăm ó tâ kơ mê nếo tâng lơ ai xía vâ kân khât, vâ kô teăm rĕng pêi pro, mơ’no mâu hnoăng cheăng hbrâ, rơnáu, pêi pro tơdrêng.

La ki hdrối tâ, Dak Lak kô hbhrâ 100 troh 200 to xoăng pơlât; hbrâ tơ’nôm 2 tíu ki ăm mơngế ki tro tâ klâ ối kơtăn ki kân a pơlê kong kơdrâm Ƀuôn Ma Thuột, bê ăm dâng 1.300 ngế. Ƀă xuân tiô pôa Phạm Ngọc Nghị, ivá ki hbrâ, pơlât mơngế ki tro tâ pơreăng COVID-19 a kong pơlê kố xuân athế châ mơdêk ó luâ tâ kơ mê nếo:

‘’Pơkâ thế Hngêi pơkeăng kân kơpong Tây Nguyên athế hbrâ tơ’nôm 500 to xoăng koi pơlât, xua ga, pin ối athế veăng kum ăm tá mâu kong pơlê ki ê tung Tây Nguyên. Kal athế hbrâ mâu kế tơmeăm hdrối. La ngiâ, drêng ai mơngế tamo châi pin athế pơtối tơdah xo vâ pơlât i tŭm. Tung pơla khăm pơlât mê, kơdo mơ-eăm drêng ăm kuăn pơlê to ối a râ má péa cho hiăng prêi, lo ing hngêi pơkeăng hlối. Tâng ối a râ má pái ‘lo mê cho xua lối kơ kơdrâm mơngế tamo châi’’.

Tiô Tíu xiâm séa ngăn mơdât pơreăng kong pơlê Dak Lak ăm ‘nâi, a kong pơlê ai 1 tơring ki ối tung kơpong tơniăn - cho tíu ki ôh tá ai pơreăng. 8 tơring tung kơpong ki chía ai pơreăng iâ - kô tơ’lêi tro tâ tú pơreăng; 3 tơring, 1 pơlê kong krâm ƀă pơlê kong kơdrâm Ƀuôn Ma Thuột, kơpong ki trĭng khêi - cho kơpong ki tơ’lêi vâ ai kơdrâm mơngế tâ tú pơreăng; tơring Krông Ƀuk cho kơpong khêi ki ai kơdrâm mơngế tâ pơreăng. Tung pơla mê, Ƀuôn Ma Thuột hiăng pơxiâm lăm tôe xo têa môh rêm ngế lâp pơlê kong kơdrâm, ƀă tơring Ea Kar xuân pơxiâm séa ngăn têa môh vâ ngăn pơreăng a tâi tâng pơlê cheăm. Kuăn pơlê Dak Lak pói tơngah mâu tơdroăng ki kơdo mơ-eăm mê kô rĕng kum châ hlo mâu ngế ki tro tâ tú pơreăng cho F0, mơdât tơdroăng ki pơtối châ tâ tú hên kơpong ki chiâng tâ tú kơdrâm mơngế, veăng kum mơdât châ tơ-ƀrê khât ƀă pơreăng COVID-19.

VOV Tây Nguyên

Nhat Lisa tơplôu ƀă tơbleăng