VOV4.Sêdang - Pơlê kong kơdrâm Ƀuôn Ma Thuột kô pơtối pêi pro klâ krê pơlê pơla tiô pơkâ 16 dêi Ngế pro xiâm hnê ngăn Chin phuh tơ’nôm pá 7 hâi nếo, sap ing 12 chôu măng dế hâi lơ 8/8. Kố cho tơdroăng pơkâ thế ki nếo má môi dêi kong pơlê Dak Lak ‘na tơdroăng ki xúa troăng hơlâ klâ krê pơlê pơla vâ hbrâ mơdât pơreăng COVID-19. Tiô Vi ƀan hnê ngăn kong pơlê Dak Lak, luâ 14 hâi tơbleăng pêi pro tơdroăng pơkâ 16 dêi Ngế pro xiâm hnê ngăn Chin phuh a pơlê kong kơdrâm Ƀuôn Ma Thuột ƀă tơring Čư̆ Kuin, pơreăng COVID-19 hiăng chía kơdroh.

A pơlê kong kơdrâm Ƀuôn Ma Thuột xuân u ối mâu ngế ki tâ pơreăng tá hâi teăm châ ‘nâi nhên xiâm kối tâ ing lâi, kal pơtối tí tăng mơngế ki pro tâ tú ƀă khăm ngăn tung lâp lu

Ƀă tơring Čư̆ Kuin, maluâ kơxô̆ ngế tâ SARS-CoV-2 hlo tâk la ki hên cho tung kơpong klâ ối krê tơkŭm ƀă kơpong ki tro mơdât mot lo. Ƀă pơlê kong kơdrâm Ƀuôn Ma Thuột, xuân ối ai mâu ngế ki tâ tá hâi mơnhên xiâm kối tro tâ, kal pơtối mơdêk tí tăng ƀă pêi pro pâk xo mơheăm séa ngăn tung lâp lu. Xua mê, Vi ƀan hnê ngăn kong pơlê Dak Lak pơkâ, Pơlê kong kơdrâm Ƀuôn Ma Thuột kô pơtối mơ’no tơdroăng pơkâ 16 dêi Ngế pro xiâm hnê ngăn Chin phuh tơ’nôm pá 7 hâi nếo, sap ing 12 chôu măng dế hâi lơ 8/8 troh tâi lơ 14/8 hơnăm 2021. Ƀă tơring Čư̆ Kuin, sap ing 12 chôu măng dế hâi lơ 8/8 kô xúa pơkâ kơxô̆ 15 dêi Ngế pro xiâm hnê ngăn tơnêi têa tung pơla 14 hâi.

Katarina Nga tơplôu ƀă tơbleăng