VOV4.Sêdang - Kơxê lơ 22/8, pôa Lê Thái Dũng – Kăn pơkuâ hnê ngăn cheăng Đảng tơring Čư Kuin, kong pơlê Dak Lak mơnhên, Khu pơkuâ hnê ngăn cheăng Đảng tơring Čư Kuin hiăng hôp ƀă pơkâ pơtân ăm pơtê cheăng ƀă pôa Vũ Duy Tấn, Kăn pơkuâ hnê ngăn cheăng Đảng cheăm Dray Bhăng. Pơtối mê, pôa Vũ Duy Tấn hiăng lăm tơleăng tơdroăng rơpŏng a tơring Krông Ana, kong pơlê Dak Lak tung pơla lâp tơring Čư Kuin dế pêi pro klâ kơtăn pơlê pơla hbrâ mơdât pơreăng COVID-19 tiô pơkâ 16 dêi Ngế pro xiâm hnê ngăn Chin phuh laga ôh tá tối tơbleăng ăm khu râ kăn kơpêng, ôh tá phêp Khu râ kăn pơkuâ hnê ngăn cheăng Đảng tơring.

Khu râ kăn pơkuâ tơring Čư Kuin séa ngăn tơdroăng hbrâ mơdât pơreăng

Xua mê, Khu pơkuâ cheăng tơring Čư Kuin hiăng pơtân ăm pơtê cheăng ƀă pôa Vũ Duy Tấn, Kăn pơkuâ hnê ngăn cheăng Đảng cheăm Dray Bhăng, pơxiâm sap ing hâi lơ 21/8. Tơdroăng pơkuâ châ pơcháu ăm pôa Mai Văn Tào, Kăn phŏ pơkuâ hnê ngăn cheăng Đảng cheăm Dray Bhăng, pơkuâ tung pơla pôa Tấn tro ăm pơtê cheăng sap hâi lơ 21/8 troh Khu pơkuâ cheăng Tơring kheăn hôu, mơnhên hnoăng cheăng khu pú hên, ngế krê tung tơdroăng ngế ối a ko khu râ kăn pơkuâ cheăng Đảng ôh tá djâ troăng ahdrối tung tơdroăng hbrâ mơdât pơreăng.

A Sa Ly tơplôu ƀă tơbleăng