VOV4.Sêdang - Rơtế ƀă hên kong pơlê tung lâp tơnêi têa, pơreăng COVID 19 dế tơdjâk hên troh mâu tơdroăng cheăng kâ, rêh ối pơlê pơla a kong pơlê Dak Lak. Vâ kâi hbrâ mơdât ƀă pơreăng, mơdêk châ tơƀrê pêi kâ, tê mơdró xuân môi tiah mâu tơdroăng tơnêi têa, kuăn pơlê tá khu tê mơdró ƀă khu râ kăn pơkuâ kong pơlê dế thăm xúa kŏng ngê̆ thông tin, la ngiâ pêi cheăng xúa kơmăi kơmok. Tơdroăng pơ’lêh apoăng dế châ tơƀrê hên tiô tro troăng pơkâ pêi pro péa xôh, rế hbrâ mơdât pơreăng rế mơnhông cheăng kâ, rêh ối pơlê pơla.

Kŏng ti pêi cheăng tiô rơnó rơxế ô tô An Phước cho môi tung mâu khu mơdró ‘na rơxế ki kân kơtâu chơ tơmeăm a pơlê kong kơdrâm Ƀuôn Ma Thuột, kong pơlê Dak Lak  ai dâng 80 toăng rơxế kân, hmâ chơ mâu tơmeăm pê lo ing chiâk deăng kơtâu ngi mâu kong pơlê, pơlê kong kân ƀă chơ tơmeăm tê ăm kong têa ê. Pôa Phạm Đông Thanh, Ngế pơkuâ Kŏng ti ăm ‘nâi, pơreăng COVID-19 hiăng tâ tú sap ing apoăng hơnăm 2020 troh nôkố hiăng tơdjâk kân troh tơdroăng cheăng pêi dêi kŏng ti.

Mâu hơnăm hdrối drêng ai pơreăng, riân rêm hơnăm kŏng ti chơ tơmeăm dâng 300 rơpâu tâ̆n tơmeăm pêi lo ing chiâk deăng, la nôkố  kơxô̆ tơmeăm hiăng kơdroh dâng 20%, ki châ xo dêi rơkâ xuân kơdroh tơdâng tơ’mô tiah mê há. Vâ hmâ ƀă pơreăng, kŏng ti hiăng hbrâ mơdêk xúa kŏng ngê̆ thŏng tin vâ hlối tăng khu tơrŭm, tê mơdró, kĭ tơhrâ, hlối hnê mơhno pơkuâ tơ-ƀrê tâ:

‘’Hơ’lêh kơxô̆ cho hnoăng ki kal vâ mơdêk tơ-brê pêi lo, tê mơdró dêi tíu pêi cheăng, malối cho dế ai pơreăng tâ tú nôkố. Ƀă tíu pêi cheăng, tâi tâng mâu tơdroăng kĭ tơhrâ lơ mâu tơdroăng mơdró ƀă tơmối drêng pơ’lêh ƀă email, thăm nếo mâu hoă đơn cho hlá mơ-éa chêh tơmeăm châ tê, hlá mơ-éa chêh ki ai tâk tăm pŏng xuân chêh tơbleăng ing ƀă email tâi. Liăn mê pơtroh ing internet banking. Tá mâu tơdroăng pơkuâ mê xuân xúa ƀă ing internet, pơtih mâu măng Facebook lơ phần mềm chêh krê ăm khu mơdró. Ing mâu tơdroăng pêi pro ƀă internet mê vâ kơdroh hơngế‘’.

Xúa kŏng ngê̆ thong tin, pêi pro tơdroăng pơ’lêh kơxô̆ dế châ hên mâu khu mơdró ƀă mâu kăn kong pơlê Dak Lak tơbleăng pêi

Pôa Lương Văn Ninh, Kăn phŏ hnê ngăn Khu mơdró kong pơlê Dak Lak ăm ‘nâi, tâi tâng tung kong pơlê ai vâ chê 18 rơpâu khu mơdró. Pơreăng kăn COVID-19 hiăng tơdjâk troh tơdroăng pêi cheăng dêi khu mơdró ƀă tơdroăng xúa kŏng ngê̆ thŏng tin, pơ’lêh kơxô̆ châ ngăn cho troăng rơhlâ pêi pro ki pơklât thế vâ mâu khu mơdró châ ối pêi cheăng tung kong pơlê xuân hbrâ pơ’lêh nếo, ƀă rôh apoăng pêi cheăng châ tơ-ƀrê. ‘Na peăng Khu pêi cheăng xuân dế mơ-eăm mơjiâng Tíu xiâm tơrŭm pơ’lêh kơxô̆ khu mơdró vâ kum mâu khu ki veăng tơrŭm cheăng;

‘’Khu mơdró kong pơlê xuân dế hriăn vâ mơjâng Tíu xiâm ki tơdjêp tơrŭm pơ’lêh kơxô̆ khu mơdró. Troăng rơhlâ la ngiâ thế tơdjêp  ƀă pơ’lêh kơxô̆ ăm mâu khu mơdró. ing mê, mâu khu mơdró tê tơmeăm ing măng online, klêi mê châ ‘nâi rôe tơmeăm ƀă kŏng ngê̆ tung pơla dế ai pơreăng tâ tú tiah nôkố’’.

Rơtế ƀă kuăn pơlê, Khu mơdró tung  pơla dế ai pơreăng tâ tú rơ-iô, rêm râ, kơvâ cheăng a kong pơlê Dak Lak xuân dế mơdêk pêi pro mâu troăng rơhlâ xúa kŏng ngê̆ thŏng tin, pơ’lêh kơxô̆. Pôa Ngô Việt Hồng, Kăn phŏ ngăn ‘na pro hnoăng mơhá kong pơlê Dak Lak ăm ‘nâi, mâu tơdroăng ăm hlo rôh apoăng tơ-ƀrê. Nôkố tâi tâng mâu khu mơdró tung kong pơlê hiăng chêh inâi bro mâu hnoăng mơhá điê̆n tưh. Kong pơlê dế mơdêk tơbleăng xo hnoăng mơhá, nâp liăn tê mơdró tơnêi, rơxế hon đa, ô tô ing điê̆n tưh:

‘’Klêi pêi pro hên tơdroăng mơdró ing điê̆n tưh, tơbleăng ăm ‘nâi tơdrăng tung rơ ‘jíu, um tơvi, mê hlối plâ mơdât pơreăng châ tơ-ƀrê kơdroh ki lŭp ăm mơngế ki nâp hnoăng mơhá ƀă kăn ƀô̆ xo hnoăng mơhá, kơxô̆ nâp, môi khu ki cheăng ƀă điê̆n tưh tiah mê mơni kô lĕm tơniăn tâ’’.  

Pôa Nguyễn Tuấn Hà, Kăn xiâm phŏ hnê ngăn Vi ƀan kong pơlê Dak Lak ăm ‘nâi, tung pơla dế ai pơreăng tâ tú rơ-iô, tơdroăng pơ’lêh kơxô̆ ƀă kong pơlê cho kal khât. Khế 3/2021, Khu kăn Đảng kong pơlê Dak Lak hiăng tơbleăng Pơkâ ‘na tơdroăng pơ’lêh kơxô̆ kong pơlê Dak Lak pơla hơnăm 2021-2025 kong pơlê Dak Lak pơla hơnăm 2021-2025, troăng rơhlâ pêi troh hơnăm 2030. Tung pơla mê, ki hdrối, kong pơlê ‘măn kơdĭng 300 rơtal liăn ‘no ăm tơdroăng pơ’lêh kơxô̆, pơkâ mơ-eăm pro pơ’lêh rơdêi tung mơnhông cheăng kâ rêh ối dêi kong pơlê:

‘’ ‘Nâi nhên pơ’lêh kơxô̆ ƀă pro xiâm ki kal tung tơdroăng pơ’lêh kân ‘na kơmăi kơmok roh má 4, cho rôh ki Dak Lak vâ teăm tơdrêng, rơtế prôk ƀă rế tơ-ƀrê ‘na tơdroăng xúa khoa hok kơmăi kơmok tung tŭm tơdroăng rêh ối. Kăn hnê ngăn Đảng kong pơlê, Vi ƀan hnê ngăn kong pơlê mơ-eăm rah tơdroăng hơ’lêh kơxô̆ vâ pơ’lêh tâi tâng mâu troăng rơhlâ rak ngăn tŭm tơdroăng cheăng kâ rêh ối dêi kong pơlê‘’.

Pơreăng COVID-19 dế tơdjâk troh tơdroăng ki ‘mêi troh tŭm tơdroăng ‘na rêh ối. Tơdroăng xúa kŏng ngê̆ thŏng tin, troh tơdroăng pơ’lêh kơxô̆ cho troăng hơlâ thế pêi pro ƀă kong pơlê Dak Lak dế ăm hlo ki hbrâ pêi pro, mơ-eăm dêi tơná vâ pê klêi tơdroăng pơkâ tơpéa tơdroăng, hlối plâ mơdât pơreăng tơ-ƀrê hlối mơnhông cheăng kâ-rêh ối.

Công Bắc chêh

Gương tơplôu ƀă tơbleăng