VOV4.Sêdang - Kơhâi dế hâi lơ 9/8, kong pơlê Dak Lak hiăng tơkŭm khu pêi dêi hnoăng cheăng lăm tơdah 478 ngế kuăn pơlê sap ing Pơlê kong kân Hồ Chí Minh vêh a kong pơlê vâ ví pơreăng.

Khu ki pêi dêi hnoăng cheăng lăm tơdah kuăn pơlê vêh

Kố cho rôh ki apoăng Dak Lak tơbleăng mâu khu lăm mot a kơpong ki ai pơreăng vâ tơdah kuăn pơlê vêh dêi a kong pơlê. 478 ngế vêh rôh kố ối tung mâu ngế ki châ kơjo kum, môi tiah: Cho mâu ngế ki hiăng krâ, vâi hdrêng, vâi kơdrâi ki dế mơ-êa, vâi kơdrâi ki dế păn roăng kuăn tơxĭn pá xôp 36 khế; ngế ki lăm khăm pơlât, mâu ngế ki lăm pôu dêi nhŏng o, mâu ngế ki lăm pêi dêi hnoăng cheăng ôh tá teăm châ vêh; ngế ki dế châ kâ liăn tŏng kum pơlê pơla rêm khế ƀă hên ki ê ai tơdroăng ki rơhêng vâ vêh dêi a pơlê.

Grup pơkuâ Phương Trang kum rơxế ƀă liăn pơto chơ vâ tơdah kuăn pơlê vêh tung rôh kố

Kuăn pơlê châ tơdah vêh athế ai phĭu séa ngăn rĕng COVID-19 âm tĭnh. Klêi kơ’nâi vêh dêi a kong pơlê, kuăn pơlê ối a tơring ki lâi kô vêh klâ ối krê tơkŭm a tơring mê 14 hâi ƀă pơtối klâ ối krê a hngêi 7 hâi. 22 toăng rơxế tơdah kuăn pơlê rôh kố châ Grup pơkuâ Phương Trang kum tâi tâng liăn chơ.

Katarina Nga tơplôu ƀă tơbleăng