VOV4.Sêdang - Vâ tŏng kum kuăn pơlê ing Pơlê kong kân Hồ Chí Minh châ kong pơlê Dak Lak tơdah vêh tung kơmăng lơ 10/8, Đoân droh rơtăm Khô̆i mâu kơ koan ƀă khu tê mơdró kong pơlê Dak Lak tơkŭm po tơdroăng ‘’Hơpiâp on kơmăng dêi droh rơtăm’’ vâ pế 500 hnoăng hmê kơchâi kâ tê kơtê ăm kuăn pơlê vêh ing kơpong ai pơreăng. Rêm hnoăng hmê kơchâi kâ mê cho rơhế kơxêng plâu chu, têa tôu alâi ƀă têa ôu kung kếo kŭn. Mâu hnoăng rơhế châ tâ tung kơhôp, rak tô tung kơthung xô̆p ƀă djâ a tíu tơkŭm a hngêi trung râ má pái phôh thong hdroâng kuăn ngo ai tíu kâ koi ối pơtê Nơ Trang Lơng, kong pơlê Dak Lak.

Mâu đoân viên droh rơtăm veăng pế hmê kơchâi kâ

Kơmăng mê, ai 345 ngế châ tơdah vêh mê cho mâu ngế ki kơjo môi tiah: Mơngế krâ, vâi krâ, vâi kơdrâi mơ-êa, vâi kơdrâi dế păn kuăn ối kŭn pá kơdâm 36 khế; mơngế lăm khăm pơlât, lăm pôu dêi nhŏng o, pêi cheăng tá hâi châ vêh; ngế dế châ kum troăng hơlâ tŏng kum pơlê pơla rêm khế; nhŏng o prôk rơtế vâi hdrêng pá kơdâm 10 hơnăm, mơngế krâ, vâi kơdrâi mơ-êa, mơngế châi tamo ƀă hiá hé, rơhêng vâ vêh a pơlê xiâm tơná.

Kuăn pơlê ki vêh mê klêi kơ’nâi test tâng âm tĭnh kô djâ klâ kơtăn tơkŭm a kong pơlê 14 hâi ƀă pơtối séa ngăn ivá a hngêi 7 hâi.  Tâng yương tĭnh kô djâ troh a hngêi pơkeăng pơlât dêi kong pơlê.

Xuân tung hâi lơ 10/8, tơdroăng ki pleăng dêi hnoăng cheăng “Rơxế pâ nhuô̆m” hiăng ăm mâu kế tơmeăm tŏng kum kuăn pơlê kơpong ki klâ ối krê a cheăm tơkăng kong Ia Rvê, tơring Ea Súp, kong pơlê Dak Lak. Tơdroăng kố xua Khu ngăn vâi kơdrâi Mố đô̆i gâk tơkăng kong kong pơlê tơrŭm ƀă khu ki pleăng dêi hnoăng cheăng Thiện Tâm 47 ƀă mâu tíu pei cheăng tŏng kum tơbleăng.

Pơtroh hbru tơmeăm ăm kuăn pơlê a tíu ki gâk hbrâ mơdât pơreăng

A cheăm Ia Rvê, khu kố hiăng pơtroh 30 hnoăng tơmeăm ăm mâu rơpŏng kuăn pơlê ki xơpá a thôn 8 dế pêi pro klâ ối krê a hngêi. Rêm hnoăng ai 5 kg phái, 1 kơthung xup kơxŏng khăng, têa rơmâ, têa măm, ƀô̆t ngot, kơ-ƀăn mì, chah yo ƀă 100 rơpâu liăn mâ. Mâu kế tơmeăm kố châ khu ki teăng mâ thôn tơdah xo ƀă vêh diâp ăm mâu rơpŏng. Rơtế amê, khu kố ối kum 500 kg kơchâi plâi pôm ăm kuăn pơlê; hbru 500 to kung kếo têa ôu ƀă 100 to nhĕng mâ ki kơdât têa kơtĕng ăm mâu lêng dế pêi dêi hnoăng cheăng a mâu tíu ki gâk.

Sa Ly +Nga tơplôu ƀă tơbleăng