VOV4.Sêdang - Kơxê lơ 14/9, Vi ƀan kong pơlê Dak Lak hiăng tơbleăng mơ-éa hnê mơhno tơdroăng hnê ƀă hriâm drêng ai pơreăng COVID-19 xông tâ tú ó. Pơtối mê, ƀă mâu tơring châ mơnhên ‘’kơpong ngiât’’, râ má péa, râ má pái phôh thong ƀă mâu tíu hnê cheăng pêi châ tơkŭm po hnê tơdrêng ƀă pơkâ thái cô, hok tro thế ối tung kơpong ngiât; râ má môi  hnê ƀă hriâm ƀă troăng mơ’no tơdrêng tung um tiô troăng măng Internet, um tơvi ƀă pơcháu ƀai hriâm.

Krê ƀă hok tro lâm 1, lâm 2 kơjo tơkŭm po hnê hriâm mơ’no tung um tơvi ƀă ôh tá pêi pro séa ngăn, mơnhên rêm hneăng tung pơla kố, drêng hok tro vêh hriâm thế tơkŭm po vêh hnê tơdroăng hriâm a hdrối vâ  pro ƀai séa ngăn, mơnhên rêm hneăng. Krê hok tro râ mâm non pơtê hriâm troh drêng ai tơbleăng nếo.

Khu pơkuâ hnê hriâm ƀă hnê mơjiâng kong pơlê Dak Lak tơtrŏng mâu hngêi trung, drêng pêi pro mâu troăng tơkŭm po hnê hriâm thế tơbleăng ƀă hnê mơhno ăm hok tro, nôu pâ mâu tơdroăng ki nhên ‘na tơdroăng xiâm, troăng xúa hnê hriâm; troăng pơcháu hnoăng cheăng hnê hriâm; tơdroăng hriâm; troăng pro ƀai vâ séa ngăn, mơnhên ƀă pơkâ hnê hriâm ƀă rêm troăng hnê hriâm.

A Sa Ly tơplôu ƀă tơbleăng