VOV4.Sêdang -Tơdroăng ăm ‘nâi sap ing Kơ koan ki ai tơdjâk kong pơlê Dak Lak a kơxo lơ 9/8, riân sap ing 12 chôu măng dế hâi lơ 24/7 troh nôkố, cho rôh ki pơlê kong kơdrâm Ƀuôn Ma Thuột ƀă tơring Čư̆ Kuin pêi pro klâ krê pơlê pơla hbrâ mơdât pơreăng COVID-19 tiô pơkâ kơxô̆ 16 dêi Chin phuh, hiăng ai 390 ngế krê pro xôi ‘na hbrâ mơdât pơreăng. Tâi tâng liăn phâk nâp ăm liăn ngân Tơnêi têa ai lối 500 rơtuh liăn. Tung mê, tơring Čư̆ Kuin ai 4 ngế tro pơxâu phak, kơxô̆ liăn 8 rơtuh liăn; u ối 386 ngế a pơlê kong kơdrâm Ƀuôn Ma Thuột.

Tơdroăng ki pơxâu phak mâu ngế ki pro xôi châ pêi pro klâ krê tơniăn, kơtăng, tro pơkâ dêi luât, ing mê vâ hbrâ mơdât mâu ngế pro xôi, hnê khĕn rêm ngế kal pêi pro pêi pro kơtăng tơdroăng ki klâ krê, veăng kum rak tơniăn hnoăng cheăng hbrâ mơdât pơreăng COVID-19 a kong pơlê châ tơƀrê má môi.

Katarina Nga tơplôu ƀă tơbleăng