VOV4.Sêdang - Kăn hnê ngăn Vi ƀan kong pơlê, kăn hnê mơhno cheăng hbrâ mơdât pơreăng a mơngế kong pơlê Dak Nông hiăng kĭ tơdroăng pơkâ krâ ối krê tâi tâng tơring Dak Mil, xúa kơtăng mâu troăng hơlâ tiô pơkâ 16 klêi kơ’nâi ai ngế tâ Covid-19 tung pơlê pơla. Tung pơla pêi pro klâ ối krê pơxiâm sap ing 22 chôu hâi lơ 14/9 tá troh ai tơbleăng ki nếo vâ hbrâ mơdât pơreăng.

Dak Mil, kong pơlê Dak Nông pêi pro pơkâ 16 klêi kơ’nâi ai ngế tâ Covid-19 tung pơlê pơla

Tiô tối tơbleăng dêi Khu hnê mơhno cheăng tơring Dak Mil, hâi lơ 13/9, Tíu xiâm ngăn pơkeăng ƀă khăm pơlât tơring hiăng châ ‘nâi tơdroăng ki ai 1 rơpŏng a tôh kơphô̆ 2, pơlê kân Dak Mil tơngê, tơbrêi. Toê xo têa môh séa ngăn RT-PCR,, 4 ngế tung môi rơpŏng pơrá yương tĭnh ƀă virus SARS-Cov-2. Tiô séa ngăn pơreăng, rơpŏng ki kố tê plâi kâ, dâng 10 hâi hdrối ai ối a chê ƀă ngế ki vê rơxế chơ plâi vêh sap ing Pơlê kong kân Hồ Chí Minh. Klêi kơ’nâi ‘nâi mâu ngế yương tĭnh tung pơlê pơla, tơring Dak Mil hiăng pơlâ mơdât mot lo a 4 kơpong ki ai ngế tâ, tơdrêng a mê hnối djâ mâu ngế ki tâ Covid-19 kố mot tung kơpong pơlât dêi Tíu xiâm ngăn pơkeăng pơlât tơring ƀă ăm 164 F1 lăm klâ ối krê tơkŭm.

Katarina Nga tơplôu ƀă tơbleăng