VOV4.Sêdang - Vi ƀan pơlê kong kơdrâm Gia Nghiã (Dak Nông) ăm ‘nâi, mâu khu râ pơkuâ cheăng nếo châ ‘nâi ai 10 ngế châ 2 ngế ki vê rơxế ‘’ki chiâng ăm phêp kơtâu‘’ chơ lo ing kơpong tâ pơreăng mot a pơlê kong kơdrâm Gia Nghiã ôh tá vâ tối tơbleăng tơná ăm hngêi pơkeăng a kơmăng lơ 1/8. 10 ngế kuăn pơlê mê to mâu hdroâng kuăn ngo sap ing 18-24 hơnăm, ai hlá mơ-eá rơpŏng hngêi a tơring Lak, kong pơlê Dak Lak dế prôk chêng vêh dêi pơlê vâi lo ing Bình Dương. 

Tung kơmăng, 2 ngế ki vê rơxế ƀă 10 ngế ki tối kơpêng mê hiăng rĕng châ lăm klâ krê a kơpong klâ krê tơchoâm dêi pơlê kong krâm Gia Nghiã xo khăm ngăn virus SARS-CoV-2.Pakĭng mê, Khu hnê mơhno hbrâ mơdât  pơreăng a mơngế a pơlê kong kơdrâm Gia Nghiã hiăng thế pơxâu tơdrêng 2 ngế ki vế rơxế ƀă ngế xiâm ki ai rơxế kân BKS 48C-045.83 tiô pơkâ, tâng pro ăm chiâng tâ tú pơreăng kô nếo ngăn hồ sơ pơxâu tro tiô luât.

Ƀă 10 ngế kuăn pơlê a Dak Lak, pơlê kong kơdrâm Gia Nghiã kô tơrŭm ƀă mâu kăn cheăm tơring a tíu ki vâi ối vâ pơxâu tơdroăng ki vâi xôi tro tiô luât pơkâ ‘na hbrâ mơdât pơreăng COVID-19.