VOV4.Sêdang - Hâi lơ 21/7, kong pơlê Dak Nông hiăng pêi pro tơdroăng ki klâ krê tâi tâng cheăm Dak Wer, tơring Dak Rlâp vâ hbrâ mơdât pơreăng COVID-19. Tiah mê, klêi kơ’nâi pơtối ‘nâi tơ’nôm 4 ngế tâ COVID-19 cho F1 dêi Ngế ki tâ pơreăng mah kơxô̆ 60.204, ối a thôn 10, cheăm Dak Wer, tơring Dak Rlâp cho ngế ki tâ pơreăng sap ing Pơlê kong kân Hồ Chí Minh vêh, kơvâ ngăn pơkeăng ƀă khăm pơlât hiăng tí châ hlo 15 ngế ki ối achê, tơdrêng amê hnối vê hdró kơpong ki ai ngế tâ pơreăng ƀă klâ krê mâu ngế ki ai tơdjâk.

Laga, vâ rak tơniăn ăm hnoăng cheăng hbrâ mơdât pơreăng COVID-19, tơring Dak Rlâp hiăng pêi pro tơdroăng klâ krê khămpơlât cho tâi tâng tơnêi tơníu cheăm Dak Wer. Tung pơla klâ krê 14 hâi, pêi pro sap ing hâi lơ 21/7 ƀă ngăn kơ tơdroăng dêi pơreăng mê hâi khế klâ krê mơni kô ton tâ.

Katarina Nga tơplôu ƀă tơbleăng