VOV4.Sêdang - Hlo tơdjâk dêi pơreăng COVID-19, kơvâ pêi chiâk deăng kong pơlê Dak Nông hiăng mơjiâng khu tŏng kum, tơrŭm kum kuăn pơlê tê mâu kế tơmeăm pêi lo ing chiâk deăng dêi kong pơlê. Tôh tŏng kum, tơdjêp tê kế tơmeăm pêi lo ing chiâk deăng ối tung Khu ngăn chiâk deăng ƀă Mơnhông thôn pơlê kong pơlê Dak Nông ai 15 ngế tơrŭm cheăng. Tôh ai hnoăng cheăng tơbleăng, tơrŭm ƀă mâu tơring, pơlê kong kơdrâm rĕng tŏng kum, pơkâ tơleăng mâu tơdroăng ki tơvâ tơvân vâ kum mơdêk tơdroăng ki mơjiâng pro ƀă tê mơdró kế tơmeăm pêi lo ing chiâk deăng rak tơniăn tơ’lêi hlâu, tơniăn hbrâ mơdât pơreăng COVID-19.

Dak Nông kum tơrŭm tê kế tơmeăm pêi lo ing chiâk deăng dêi kong pơlê 

Ki nhên gá khu ki mê kô chêh riân inâi, rĕng ‘nâi nhên mâu tơdroăng ki tơvâ tơvân, xơpá ƀă mâu tơdroăng ki pâ thế dêi khu ki pêi kơdrum, tíu ki tê roê uâ pơliê, mơdiê kế tơmeăm pêi lo ing chiâk deăng. Tơdrêng amê hnối tơbleăng tơdroăng, mơjiâng mâu túa pơkâ tơdjêp pơla ngế ki pêt ƀă mâu hngêi kơmăi uâ pơliê kế tơmeăm pêi lo ing chiâk deăng, khu mơdró kâ tê ngi kong têa ê, tíu ki tê roê ki kân, siêu thĭ.

A kong pơlê Dak Nông, nôkố plâi ƀơr ƀă sầu riêng cho péa hdrê plâi ki ai ƀăng tơnêi pêt kân má môi dế pơxiâm mot tung rơnó krí, laga xua tơdjâk dêi pơreăng mê tơdroăng ki tê dế trâm hên xơpá.

Katarina Nga tơplôu ƀă tơbleăng