VOV4.Sêdang - Kŏng ti on tơhrik Dak Nông nôkố dế rak ngăn 7 tíu biến áp 110KV, lối 4.000km troăng trung, hạ áp. Sap ing apoăng hơnăm troh nôkố, lâp kong pơlê hiăng ai 4 rôh trâm xía vâ ‘na on tơhrik cao áp xua kuăn pơlê ko loăng kơtong a troăng kơxái.

Kŏng nhân rơnêu, rak ngăn troăng kơxái on tơhrik vâ rak tơniăn hdrối vâ mot tung rôh kong mê têa lân lu

Vâ rak tơniăn ‘no on tơhrik hdrối rơnó mê hngê, têa lân lu, rơtế ƀă ‘mâi rơnêu rak vế troăng kơxái on tơhrik, PC Dak Nông hiăng lăm séa ngăn đi đo ko tah tơkâng loăng, tơdrêng amê hnối mơdêk tơdroăng ki hnê tối kuăn pơlê pôi tá pro xôi a kĭng troăng ai trăng on tơhrik.

Ko trâ mâu nhâ loăng ki tơ’lêi tơđôu, kơtong tu troăng kơxái on

Pôa Lê Huy Thiệp, kăn phŏ pơkuâ ngăn On tơhrik Dak Nông, ăm ‘nâi:

“Troh nôkố mê kŏng ti hiăng ko tah tâi tâng mâu loăng a kơpong kĭng troăng ki mơni kô tơđôu kơtong tu a kơxái on tơhrik. Malối cho mâu kơpong ki hdi tơnêi vâ mơjiâng pro kế tơmeăm mê kŏng ti hiăng tơrŭm ƀă mâu tơring, cheăm rak ngăn tơniăn vâ tơdroăng kố, châ rak vế krá tơniăn ‘no on tơhrik”.

Katarina Nga tơplôu ƀă tơbleăng